(ភ្នំពេញ)៖ នៅព្រឹកថ្ងៃទី២១ ខែតុលា ឆ្នាំ២០១៦នេះ មន្រ្តីនគរបាលខណ្ឌមានជ័យ បានយកដីកាជំនុំជម្រះករណីលោក សោម សឿន ប្តឹងលោក សម រង្ស៊ី រឿងទិញ Facebook Like ក្លែងក្លាយ ទៅប្រគល់ជូននៅទីស្នាក់ការកណ្តាល គណបក្សសង្គ្រោះជាតិ ប៉ុន្តែត្រូវបានមន្រ្តីគណបក្សសង្គ្រោះជាតិមិនទទួលយក។

លោក ម៉េង វិមានតារា អធិការរង នគរបាលខណ្ឌមានជ័យ ដែលយកដីកានេះទៅប្រគល់នៅទីស្នាក់ការគណបក្សសង្គ្រោះជាតិនោះ បានបញ្ជាក់ថា មិនមានមន្រ្តីគណបក្សណាម្នាក់ ចេញមកទទួលយកដីកានោះឡើយ គ្រាន់តែចេញមកសួរនាំប៉ុណ្ណោះ ហេតុដូច្នេះហើយលោកក៏យកដីកានោះមកវិញតែម្តង។

សូមជំរាបថា សាលាដំបូងរាជធានីភ្នំពេញ នៅព្រឹកថ្ងៃទី១៧ ខែតុលាថ្មីៗនេះ បានបើកសវនាការសំណុំរឿងលោក សម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស ដែលចោទប្រកាន់សម្តេចតេជោនាយករដ្ឋមន្ត្រីថា បានទិញ Facebook Like ដើម្បីបង្កើនប្រជាប្រិយភាព លើបណ្ដាញសង្គមដ៏ពេញនិយមមួយនេះ។ សវនាការនេះ ដឹកនាំដោយលោក អ៊ឹម វណ្ណៈ ជាចៅក្រមជំនុំជម្រះ និងលោក សៀង សុខ ជាតំណាងអយ្យការ។

សាលាដំបូងរាជធានីភ្នំពេញ បានសម្រេចលើកពេលសវនាការរឿងក្តីលោក សម រង្ស៊ី ទៅថ្ងៃទី៨ ខែវិច្ឆិកា ឆ្នាំ២០១៦វិញ ដោយមូលហេតុមេធាវីតំណាងលោក សោម សឿន ដាក់ពាក្យសុំពន្យារពេល និងដោយសារអវត្តមានមេធាវីការពារលោក សម រង្ស៊ី ផងដែរ។

លោក សម រង្ស៊ី ដែលបច្ចុប្បន្នមានឈ្មោះជា «ទណ្ឌិត» ក៏នៅមានសំណុំរឿងជាច្រើនទៀត ដែលកំពុងដំណើរការនៅសាលាដំបូងរាជធានីភ្នំពេញ។

ពាក្យបណ្ដឹងព្រហ្មទណ្ឌ ចុះថ្ងៃទី១០ ខែមីនា ឆ្នាំ២០១៦ លោក សោម សឿន អាយុ៦៤ឆ្នាំ ជារដ្ឋមន្ត្រីអមនាយករដ្ឋមន្ត្រី បានប្តឹងលោក សម រង្ស៊ី អាយុ៦៧ឆ្នាំ ប្រធានគណបក្សសង្គ្រោះជាតិ ដោយភ្ជាប់ការបង្ហោះផ្សាយព័ត៌មានលើទំព័រហ្វេសប៊ុករបស់លោក សម រង្ស៊ី កាលពីថ្ងៃទី៩ ខែមីនា ឆ្នាំ២០១៦ ។

ក្នុងពាក្យបណ្ដឹងបានបញ្ជាក់ថា នៅថ្ងៃទី៩ ខែមីនា ឆ្នាំ២០១៦ នៅលើទំព័រហ្វេសប៊ុករបស់លោកសម រង្ស៊ី (Sam Rainsy) បានបង្ហោះអត្ថបទ ដែលមានខ្លឹមសារមូលបង្កាច់ខុសពីការពិត ដែលចោទប្រកាន់លោក សោម សឿន ថា បានណែនាំដល់មន្ត្រី អ្នកគាំទ្រ និង បណ្តាញ រួមទាំងមន្ត្រីរាជការស៊ីវិល ប៉ូលិសនិងទាហាន ដើម្បីបង្កើតគណនីក្លែងក្លាយ ក្នុងគោលបំណងផ្តល់ការ Like សិប្បនិម្មិត ដល់ទំព័រហ្វេសប៊ុករបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយភ្ជាប់ជាមួយការអត្ថាធិប្បាយថា «Like មួយចំនួនធំដែលបង្ហាញលើទំព័រហ្វេសប៊ុករបស់សម្តេច គឺបានមកពីការទិញ ឬ ជួលមនុស្សក្រីក្រ ដែលអត់ការងារធ្វើឲ្យបង្កើត Accounts (គណនី) Facebook ក្លែងក្លាយដើម្បីផ្ដល់ Like សិប្បនិម្មិត ក្លែងបន្លំជូនសម្ដេច»។

ក្នុងពាក្យបណ្ដឹង បានចាត់ទុកថា ការបង្ហោះនេះបានធ្វើឲ្យប៉ះពាល់ដល់កិត្តិយសថ្នាក់ដឹកនាំជាតិ និង លោក សោម សឿន យ៉ាងធ្ងន់ធ្ងរ។ លោក សោម សឿន បានសំណូមពរឲ្យតុលាការផ្តន្ទាទោសលោក សម រង្ស៊ី ទៅតាមច្បាប់ និង ទាមទារសំណងជម្ងឺចិត្តចំនួន២០លានរៀល៕