(ពោធិ៍សាត់)៖ លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល នៅថ្ងៃទី២០ ខែមករា ឆ្នាំ២០២៥នេះ បានអញ្ជើញឆ្លៀតសួរសុខទុក្ខ និងពិនិត្យការរៀបចំបំពាក់សម្ភារៈបរិក្ខារពេទ្យ នៅមណ្ឌលសុខភាព ប៊ុន រ៉ានី សែនជ័យ ដំណាក់ទ្រយឹង ស្ថិតនៅក្នុងភូមិ ប៊ុនរ៉ានី សែនជ័យ តំណាក់ទ្រយឹង ឃុំព្រងិល ស្រុកភ្នំក្រវ៉ាញ ខេត្តពោធិ៍សាត់។

ក្នុងឱកាសនោះលោកសាស្រ្តាចារ្យរដ្ឋមន្រ្តី បានសួរសុខទុក្ខមន្រ្តីរាជការ និងបុគ្គលិកសុខាភិបាល ដែលបម្រើការងារនៅមណ្ឌលសុខភាព ប៊ុន រ៉ានី សែនជ័យ ដំណាក់ទ្រយឹង ដើម្បីផ្តល់ជាការលើកទឹកចិត្ត និងជំរុញការបម្រើសេវាសុខាភិបាលជូនប្រជាជន នៅតំបន់នោះ ជាពិសេសបងប្អូនអតីតយុទ្ធជន និងក្រុមគ្រួសារយុទ្ធជន ដោយស្មារតីទទួលខុសត្រូវខ្ពស់ និងប្រកបដោយគុណភាព ប្រសិទ្ធភាព ស័ក្តិសិទ្ធភាព និងសមធម៌។

លោកសាស្រ្តាចារ្យរដ្ឋមន្រ្តី បានណែនាំបន្ថែមដល់មន្រ្តីរាជការនៃមណ្ឌលសុខភាព ដោយត្រូវបង្កើនសមត្ថភាពបន្ថែមទៀត តាមរយៈការបណ្តុះបណ្តាលបន្ថែមការប្រើប្រាស់ម៉ាស៊ីន X-RAY និងម៉ាស៊ីន អេកូ ព្រមទាំង សូមចូលរួមថែទាំសម្ភារៈបរិក្ខាពេទ្យប្រើឱ្យបានគង់វង្សយូអង្វែង។

សូមជម្រាបថា មណ្ឌលសុខភាព ប៊ុន រ៉ានី សែនជ័យ ដំណាក់ទ្រយឹង មានផ្ទៃដីទំហំ បណ្តោយ ៣០០ម៉ែត្រ និងទទឹង ២០០ម៉ែត្រ ចំនួន ៣ អគារ រួមមាន៖ ១) អគារសង្រ្គោះបឋម និងជំងឺទូទៅ ១ខ្នង មាន ១៩បន្ទាប់ ២) អគារសម្ពព និងរោគស្រ្តី មាន ៩បន្ទប់ និង៣)អគារអន្តេវាសិក (អគារស្នាក់នៅ) មានកម្ពស់ ២ជាន់ មានចំនួន ២០បន្ទប់៕