(ភ្នំពេញ)៖ ព័ត៌មានផ្ទៃក្នុងបក្សសង្គ្រោះជាតិបានទម្លាយឱ្យដឹងថា នៅថ្ងៃទី១៨ ខែតុលា ឆ្នាំ២០១៦ លោក​ សម រង្ស៊ី បានប្រាប់លោក យឹម សុវណ្ណ​ អំពីការធ្វើប្រជាភិថុតថ្មីមួយឈុតទៀត ដើម្បីជាការតថ្លៃនយោបាយចង់វិលចូលស្រុកផង និងចង់បោកសកម្មជនខ្លួនឯងផង ដោយប្រាប់ឱ្យលោក យឹម សុវណ្ណ​ ធ្វើជាអ្នកនាំសារនិយាយបន្តថា «លោក​ សម រង្ស៊ី ចង់ជាប់គុកជំនួសសកម្មជនរបស់ខ្លួន»។ តើនេះជាសម្តីអ្នកក្លាហាន? ទេ! មិនមែនទេ។ នេះជាសម្តីជនកំសាក និងជាសម្តីជនបោកប្រាស់ដែលគ្មានខួរ និងគ្មានការខ្មាសអៀនតែប៉ុណ្ណោះ។ ហេតុអ្វី​ ? ខ្ញុំសូមចែករំលែក ៣ចំណុចដូចតទៅ៖

១៖ សម រង្ស៊ី ជាទណ្ឌិត​​ គឺជាជនមានទោសរួចស្រាប់ទៅហើយ។ ដូច្នេះ​មិនចាំបាច់យកអ្នកដទៃណាជាថ្នូរជំនួស ឬបោកអារម្មណ៍អ្នកណាទេ ! មកចូលគុកដោយខ្លួនឯងតែម្តងទៅ​។ គុកនៅបើកទ្វារចាំជានិច្ច។ តែការពិតឧបាយកលថ្មីនេះ​ កើតឡើងមិនដល់មួយសប្តាហ៍ផងទេ គឺក្រោយពេលដែលទណ្ឌិត សម​ រង្ស៊ី ខ្លួនឯងធ្វើលិខិតសុំ ព្រះមហាក្សត្រ ឱ្យលើកលែងទោស​ តែមិនបានសម្រេច។ នេះជាភាពបរាជ័យដ៏អាម៉ាសរបស់ សម រង្ស៊ី។ ឧបាយកលនយោបាយ ប្រជាភិថុតនេះ​ ក៏ជាការប្រមាថស្ថាប័នជាតិ និងព្រះមហាក្សត្រផងដែរ ដែល សម រង្ស៊ី ព្រហើនហ៊ានបំពាន ព្រះរាជសិទ្ធិដោយសារកំហឹងផ្ទាល់ខ្លួន​ និង​ដោយល្ងីល្ងឺ។ តើមានអ្នកណាហ៊ានថ្លើមធំដោះដូរអ្នកទោសបាន ? មានច្បាប់មកពីណា? គ្មានទេ។ តើអ្វីដែល សម រង្ស៊ី ធ្វើនេះចង់បញ្ជាក់អត្តសញ្ញាណសួរពូជថា «ឈាមរបស់ពូជក្បត់ជាតិ គឺព្រហើនបែបនេះ!?»។

២៖ អំពីផ្លូវច្បាប់​៖ គ្មានផ្លូវច្បាប់នៅលើពិភពលោកនេះ ឱ្យមានការជាប់គុកជំនួសទេ គឺគ្មានទាល់តែសោះ​។ ប្រទេសណាក៏មិនធ្វើបានទេ។ សូម្បីឋាននរក ក៏មិនបើកទ្វារឱ្យស្លាប់ជំនួសដែរ។ តែក្នុងល្បែងប្រជាភិថុត ខ្វះការគិតគ្រប់ជ្រុងជ្រោយ និងខ្វះសីលធម៌នេះ​ ខ្ញុំសូមចែករំលែកទិដ្ឋភាពខ្លះ​ ដើម្បីឱ្យ សម រង្ស៊ី បានភ្លឺភ្នែក ជាពិសេសកុំឱ្យសកម្មជនខ្លះ នៅបន្តចាញ់បោកជនមានទោសឥតល្ហែរដូចជា សម រង្ស៊ី នេះ​។

សម រង្ស៊ី អាចធ្វើឱ្យសកម្មជនខ្លួន​​ ដែលខ្លួនបានបោកប្រើ ហើយជាប់គុក​កន្លងមក មានដូចជា ហុង សុខហ៊ួរ, អ៊ុំ សំអាន, មាជ​ សុវណ្ណារ៉ា និងមនុស្សមួយចំនួនទៀត អាចទទួលស្ថានសម្រាលពីតុលាការបាន ប្រសិនបើ សម រង្ស៊ី ប្រកាសថា ខ្លួនជាមេក្លោងរាល់ឧបាយកលឧក្រិដ្ឋក្លែងឯកសារសន្ធិសញ្ញា ផែនទី និងជាមេក្លោង រៀបចំផែនការបង្ករឱ្យមានអំពើហិង្សានានាកន្លងមក។ តើ សម រង្ស៊ី ពិតជាក្លាហានក្នុងផ្លូវច្បាប់ដ៏ត្រឹមត្រូវបែបនេះទេ ? ចម្លើយ គឺមិនផេះទេ។ តើមនុស្សប៉ុន្មាននាក់ ហើយដែលជាប់គុកដោយសារ សម រង្ស៊ី ? លោក យឹម សុវណ្ណ ជាអ្នកនាំសម្តីឱ្យ សម រង្ស៊ី អាចរាប់ចំនួនបាន !

៣៖ ល្បិចនយោបាយបោកបញ្ឆោតនេះនៅលើគោកពេក៖ អ្វីដែល សម រង្ស៊ី និយាយ ហើយបានពឹងលោក យឹម សុវណ្ណ​ បន្ទរបន្ថែមនោះ គឺអាចផ្តល់​ចម្លើយមួយ​ និងគ្រាន់ជាសារបញ្ឆោតចិត្តសកម្មជនកំពុងជាប់គុកទាំងប៉ុន្មាននាក់ឱ្យលឺថា៖ «អ្ហែង ទ្រាំជាប់គុកទៀតទៅ​។ អញធ្វើអ្វីមិនបាន ដើម្បីជួយខ្លួនឯងមិនបានផង។ អញដឹងដែរ ច្បាប់មិនឱ្យមានជាប់គុកជំនួសទេ។ តែបើអញមិននិយាយសោះ​ វាស្ងាត់ពេក»។ ចរិតបែបនេះ អ្នកណាក៏ដឹងដែរថា បើ សម រង្ស៊ី នៅក្នុងស្រុក ក៏មិនហ៊ាននិយាយបែបនេះទេ។ បោកគ្នាឱ្យជាប់គុក ហើយឥឡូវនេះតាមបោកគ្នាដល់ក្នុងគុកទៀត sic !

ម្យ៉ាងទៀត ហេតុអ្វីបានជាចាត់ទុកថា នេះជាការបោកបញ្ឆោតថ្មីមួយទៀតរបស់ សម រង្ស៊ី ? ងាយយល់ទេ​។ បើ សម រង្ស៊ី ក្លាហានហ៊ានចូលគុកមែន គឺហ៊ានចូលតាំងពីជាង១០ឆ្នាំមុន គឺតាំងពីឆ្នាំ២០០៦មកម្ល៉េះ ដែលមានរឿងក្តីជាមួយសម្តេចក្រុមព្រះ​ នរោត្តម រណឬទ្ធិ ឯណោះ​។ កុំតែ​មកអង្វរ សម្តេចតេជោ ហ៊ុន សែន ឱ្យជួយស្នើសុំលើកលែងទោសទៅព្រះមហាក្សត្រ​ កុំអីគុក។ ហើយបើ សម រង្ស៊ី ចូលគុកតាំងពីពេលនោះ​ ក៏ប្រហែលជាគ្មានឱកាសបោកប្រើឱ្យគេឯងឱ្យធ្វើខុស ហើយមានទោសរហូតជាប់គុកដូចសព្វថ្ងៃនេះដែរ។ និយាយឱ្យខ្លី​ សម រង្ស៊ី នេះជាមេអុជអាលនាំចង្រៃដល់គ្រួសារប្រពន្ធកូនគេមិនតិចនាក់ទេ។

បោកគេតាំងពីមុនគេចូលគុក រហូតតាមបោកអ្នកជាប់ក្នុងគុកទៀត។ ល្បិចជាន់កែងឯងហើយ ! សម រង្ស៊ី ភ្លេចថា ល្បិចថ្មីនេះ គឺក្នុងផ្លូវច្បាប់បញ្ជាក់ថា សម រង្ស៊ី ជាមេក្លោងគ្រប់បទល្មើស និងគ្រប់ឧក្រិដ្ឋកម្ម។ បើចង់ចូលគុក មកបំពេញកាតព្វកិច្ចទោសក្នុងគុកលើបទល្មើសរបស់ខ្លួនឯងឱ្យរួចរាល់សិនទៅ​។ រឿងដទៃទៀតក៏គង់តែពាក់ព័ន្ធដែរទេ ពីព្រោះភស្តុតាងជាខ្សែសង្វាក់ និងចម្លើយឆ្លើយដាក់មានគ្រប់គ្រាន់ហើយ។ ប្រពន្ធ ហុង សុខហ៊ួរ ក៏កំពុងជេរ សម រង្ស៊ី ស្ទើររាល់ថ្ងៃដែរ។ គាត់និយាយថា ប្តីគាត់ជាប់គុកដោយសារចង្រៃធ្វើតាម សម រង្ស៊ី។

បក្សនយោបាយមួយ​ដែលមានក្បាលម៉ាស៊ីនដឹកនាំបែបនេះ ពេញមួយជីវិតនយោបាយរបស់សកម្មជន គឺគ្មានឱកាសឯណាបង្កើតគំនិតល្អ ដើម្បីជួយអភិវឌ្ឍជាតិនោះទេ។ ដាក់ជើង​ ដាក់គូថ កន្លែងណា ជេរប្រមាថកិត្យានុភាពជាតិកន្លែងនោះ។ ដូច្នេះជួយអ្វីបាន ​បើវ៉ល់ពេញក្នុងបក្ស ដែលកើតពីក្តីក្តាំ ដោយសារការបំភ្លៃ ការជេរប្រមាថ លាភពណ៌ និងគំនិតទុច្ចរិតមិនឈប់ឈរយ៉ាងនេះ។ ក្នុងជាតិនេះគ្រប់គ្រាន់ហើយ! មិនបានជួយអ្វីដល់គេឯងទេ បានត្រឹមនាំគេឱ្យជាប់គុក. បើមានជាតិក្រោយមែន សម រង្ស៊ី កុំបាច់ចាប់កំណើតជាមនុស្សអី៕

ដោយ៖ និស្សិត