(ភ្នំពេញ)៖ ក្រសួងរ៉ែ និងថាមពល បានសម្រេចបិទការដ្ឋានវាយថ្ម របស់លោក លឹម ហេង ដែលស្ថិតនៅទីតាំងតំបន់ភ្នំ ឃុំប្រាសាទ ស្រុកមង្គលបុរី ខេត្តបន្ទាយមានជ័យ ក្រោយកើតមានឧបទ្ទវហេតុ បាក់ភ្នំសង្កត់មនុស្ស៣នាក់ស្លាប់ យ៉ាងអាណោចអាធ័ម កាលពីថ្ងៃទី១៦ ខែតុលា ឆ្នាំ២០១៦។
សេចក្ដីសម្រេចរបស់ក្រសួងរ៉ែ និងថាមពលបានឲ្យដឹងថា ក្រសួងសម្រេចព្យូរអាជ្ញាប័ណ្ណអណ្តូងរ៉ែ និងការដ្ឋានវាយថ្មី របស់លោក លឹម ហេង ដោយត្រូវបញ្ឈប់រាល់សកម្មភាពធ្វើអាជីវកម្មនៅការដ្ឋាន ទាំងស្រុង ដើម្បីក្រុមមន្ដ្រីអធិការកិច្ចធនធានរ៉ែ ចុះធ្វើការស៉ើបអង្កេត និងវាយតម្លៃ។
ក្រសួងបានបញ្ជាក់ថា ក្នុងរយៈពេលព្យូរអាជ្ញាបណ្ណ និងផ្អាកសកម្មភាពនេះ មិនអនុញ្ញាតិឲ្យលោក លឹម ហេង រួចផុតពីកាតព្វកិច្ចទាំងឡាយ ដែលមានមកដល់បច្ចុប្បន្ន និងកព្វកិច្ចបន្ដ រហូតដល់មានការសម្រេចជាថ្មីពីក្រសួងរ៉េ និងថាមពល។ លោក លឹម ហេង ត្រូវធ្វើរបាយការណ៍លម្អិត អំពីឧបទ្ទវហេតុដែលកើតឡើងនិងរបាយការណ៍ការដោះស្រាយផ្សេងៗ ជាមួយគ្រូសាររងគ្រោះដាក់ជូនក្រសួងរ៉ែ និងថាមពល។
សូមជម្រាបថា នៅរសៀលថ្ងៃទី១៦ ខែតុលា ឆ្នាំ២០១៦ មានករណីដ៏រន្ធត់មួយ កើតឡើងដោយសារបាក់ថ្មភ្នំមួយកន្លែង ស្ថិតក្នុងភូមិភ្នំធំខាងត្បូង ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ បណ្ដាលឱ្យមនុស្សចំនួន ៣នាក់បានស្លាប់។
អ្នកដែលស្លាប់ទាំង៣នាក់មានឈ្មោះ ទី១.ហែម គឹមលេង ហៅឡុំ អាយុ៥២ឆ្នាំ, ទី២.លឹម គឹមឡុង អាយុ២៦ឆ្នាំ និងទី៣.ឈ្មោះ ថង ស៊ីថ ហៅសាន់ អាយុ៣៦ឆ្នាំ អ្នកទាំង៣ រស់នៅភូមិភ្នំដំបងត្បូង ឃុំអូរប្រាសាទ ស្រុកមង្គលបូរី៕
