(មីយ៉ាន់ម៉ា)៖ ក្រុមអ្នកជួយសង្រ្គោះមីយ៉ាន់ម៉ា បានឱ្យដឹងថា ចំនួនអ្នកស្លាប់នៅក្នុងហេតុការណ៍លិចទូក ដឹកអ្នកដំណើរមួយគ្រឿងកាលពីថ្ងៃចុងសប្ដាហ៍កន្លងទៅ បានកើនឡើងដល់ ៣២នាក់ និងជាង ១៥០នាក់ត្រូវ បានជួយសង្រ្គោះ ខណៈមនុស្សជាច្រើននាក់ផ្សេងទៀតនៅតែបន្តបាត់ខ្លួន នៅឡើយ។ នេះបើយោងតាម ការចេញផ្សាយរបស់សារព័ត៌មានបារំាង Le Figaro ​​នៅយប់ថ្ងៃចន្ទ ទី១៧ ខែតុលា ឆ្នាំ២០១៦។

លោក Sa Willy Frank អ្នកដឹកនាំក្រុមអ្នកជួយសង្រ្គោះ បានប្រាប់ទៅភ្នាក់ងារសារព័ត៌មានបារំាង AFP ថា «មកទល់នឹងពេលនេះ យើងបានរកឃើញសាកសព មនុស្ស៣២នាក់ រីឯ៦០នាក់នៅបន្តបាត់ខ្លួននៅឡើយ»។ ដោយឡែកបើយោងតាមអ្នកតំណាងរាស្ត្រ ក្នុងទីក្រុង Sagaing លោក Kyaw Htay Lwin ទូកដឹកអ្នកដំណើរ ដែលក្រឡាប់លិចខាងលើអាចផ្ទុកមនុស្សបានត្រឹមតែ១២០នាក់ប៉ុន្តែទូកនេះបែរជាដឹក លើសចំណុះដល់ទៅជាង៣០០នាក់។

គួរបញ្ជាក់ថា ហេតុការណ៍លិចទូកដឹកអ្នកដំណើរនេះ បានកើតឡើង កាលពីថ្ងៃសៅរ៍ នៅម៉ោងប្រមាណជា ៥៖០០នាទីព្រឹក នៅឯទន្លេ Chindwin ក្នុងទីក្រុង Sagaing ស្ថិតនៅ​ចំងាយ១៣៧គីឡូម៉ែត្រពីភាគពាយ័ព្យ ទីក្រុង Mandalay ​នៃភាគកណ្ដាលប្រទេសមីយ៉ាន់ម៉ា៕