(គូឡាឡាំពួរ)៖ រដ្ឋមន្ត្រីការពារជាតិម៉ាឡេស៊ី លោក Hishammuddin Hussein បាននិយាយថា ប្រទេសក្នុង តំបន់អាស៊ីគ្នេយ៍ ឬ អាស៊ានទំាងអស់ គួរតែចាត់វិធានការឲ្យសកម្មភាពជាមុន ​ដើម្បីការពារសន្តិសុខក្នុងតំបន់ ខណៈរដ្ឋាភិបាល​អ៊ីរ៉ាក់ កំពុងចាប់ផ្ដើមប្រតិបត្តិការយោធាដើម្បី វាយយកទីក្រុង Mosul​ ពីពួក ISIS​ មកវិញ។ នេះបើតាមការចុះផ្សាយរបស់ សារព័ត៌មាន Channel News Asia​ នៅរសៀលថ្ងៃចន្ទ ទី១៧ ខែតុលា ឆ្នាំ២០១៦។

ថ្លែងប្រាប់អ្នកសារព័ត៌មាននៅឯសភាជាតិ នៅថ្ងៃចន្ទនេះ លោក Hishammuddin បាន គូសបញ្ជាក់ថា ភ្នាក់ងារចារកម្មអន្តរជាតិបានប្រាប់លោកថា ក្រុមសកម្មប្រយុទ្ធ ISIS មួយចំនួនតូច​ត្រូវបានគេរំពឹងថាអាចនឹងរត់ភៀស ខ្លួនពីប្រទេស អ៊ីរ៉ាក់ និង ស៊ីរី ទៅកាន់ប្រទេសកំណើត របស់ពួកគេវិញ ដូចជា បារំាង ឬបណ្ដាប្រទេសដ៏ទៃទៀត ដែលពួកគេយល់ថាមានសុវត្ថិភាព។
រដ្ឋមន្ត្រីការពារជាតិម៉ាឡេស៊ីរូបនេះ បានបន្ថែមថា ​«​យើងត្រូវតែចាត់វិធានការឲ្យបានយ៉ាង សកម្មជាងមុនដើម្បីការពារ ឬទប់ស្កាត់គ្រោះថ្នាក់ដែលអាចនឹងកើតឡើង នៅក្នុងតំបន់ តាមរយៈភាពជាអ្នកដឹកនាំ អាស៊ាន របស់យើង»។

គួរបញ្ជាក់ថា នាយករដ្ឋមន្ត្រីអ៊ីរ៉ាក់ លោក Haïdar al-Abadi បានប្រកាសនៅចន្ទនេះ ពីការចាប់ផ្ដើមធ្វើប្រតិបតិ្តការយោធា វាយលុកដណ្ដើមយកទីក្រុង Mosul ពីពួក ISIS មកវិញ បន្ទាប់ពីបានបាត់បង់ចាប់តំាងពីខែមិថុនា ឆ្នាំ២០១៤មក ដែលប្រតិបត្តិការនេះ បានកើតមាន ឡើងតែប៉ុន្មានថ្ងៃប៉ុណ្ណោះ បន្ទាប់ពីរដ្ឋាភិបាលតួកគី ព្រលយពាក្យថា រដ្ឋាភិបាលអ៊ីរ៉ាក់ គ្មានលទ្ធភាពធ្វើអ្វីដោយឯកឯងនោះឡើយ៕