(កណ្ដាល)៖ លោក នូ សុវណ្ណរិទ្ធ អភិបាលស្រុកអង្គស្នួល និងជាប្រធានអនុសាខាកាកបាទក្រហមកម្ពុជាស្រុក (ស្ដីទី) ខេត្តកណ្តាល បានចែកអំណោយដល់គ្រួសារក្រីក្រចំនួន១០គ្រួសារ នៅសាលាឃុំក្រាំងម្កាក់។
សមាសភាពអញ្ជើញចូលរួមក្នុងកម្មវិធីនេះរួមមានលោក ជួប រដ្ឋា អភិបាលរងស្រុក លោក សុិន សុវី នាយករដ្ឋបាលស្រុក លោក គុជ សុទ្ធា ប្រធានការិយាល័យសង្គមកិច្ច និងសុខមាលភាពសង្គម លោក ឃុន ឡុង តំណាងប្រធានការិយាល័យសុខាភិបាលស្រុកប្រតិបត្តិ លោក ប៊ូ ប៊ុនធួន ប្រធានការិយាល័យអប់រំ យុវជន និងកីឡា ស្រុក លោក ជឿន សិលា អនុប្រធានការិយាល័យសង្គមកិច្ច និងសុខមាលភាពសង្គម លោក លោកស្រី ក្រុមប្រឹក្សាឃុំ ស្មៀនឃុំ ប្រជាការពារឃុំ សរុបវត្តមាន៥៥នាក់ ស្រី ១៥នាក់។
នាឱកាសនោះដែរ លោកអភិបាលស្រុក បានថ្លែងថា ក្នុងករណីមានបញ្ហាខ្វះខាតសូមរាយការណ៍ជាបន្ទាន់ទៅក្រុមការងារនៅថ្នាក់ឃុំក្នុងការសម្របសម្រួល ប៉ុន្តែ ប្រសិនបើថ្នាក់ឃុំមិនមានលទ្ធភាព ថ្នាក់ឃុំសូមធ្វើការរាយការណ៍មកកាន់ក្រុមការងារថ្នាក់ស្រុកដើម្បីដោះស្រាយជូន។
លោកបានបន្តថា បើបងប្អូនមានបណ្ណសមធម៌ និងបណ្ណ ប.ស.ស គាត់អាចប្រើប្រាស់សម្រាប់ពិនិត្យសុខភាព ដោយមិនមានបង់ថវិកានោះទេ។ សម្រាប់រដូវធ្លាក់ខ្យល់នេះ សូមថែរក្សាសុខភាពឱ្យបានល្អ។
អំណោយដែលផ្តល់ជូនគឺមួយគ្រួសារទទួលបានអង្ករ ២០គីឡូ, មី ១កេស, ត្រីខ ៥កំប៉ុង, ទឹកត្រី ១យួរ, មុង ១, ភួយ ១, កន្ទេល ១, ក្រមា ១, អាវ ១, សាប៊ូ ៣ដុំ, ចានកាធុនធំ ១, បំពងទឹកក្តៅ ០១, ធុងទឹកតូច ០១, កំសៀវទឹកនិងតែកញ្ចប់ ០១, ចង្រ្កានហ្គាល និងចានស្រាក់ ០១, ឆ្នាំង ០២, ខ្ទះឆា វែក ផ្តិល ០១, កាំបិត កញ្ចែ្រងជ័រ ជ្រុញ ០១, អំបិល ស្ករ ០១ កញ្ចប់, ម៉ាស់ ០១ដុំ និងថវិកាចំនួន៣០,០០០រៀល៕
