(ម៉ានីល)៖ ប្រធានាធិបតីហ្វីលីពីន លោក​ Rodrigo Duterte បាននិយាយនៅថ្ងៃអាទិត្យនេះថា លោកនឹងលើកឡើងពីបញ្ហាដ៏ចម្រូងចម្រាស់នៃសាលក្រមសម្រេច របស់តុលាការអន្តរជាតិ ទីក្រុងឡាអេ ស្ដីពីសមុទ្រចិនខាងត្បូង ទៅពិភាក្សាគ្នាជាមួយនឹងថ្នាក់ដឹកនាំចិន និងសន្យាថា រឿងបាត់បង់ដែនអធិបតេយ្យភាព របស់ហ្វីលីពីននឹងមិនអាចកើតឡើងឡើយ បើទោះជាហ្វីលីពីនងាកទៅរកចិនក៏ដោយ។ នេះបើយោងតាមការចុះផ្សាយរបស់សារព័ត៌មាន Reuters ​នៅថ្ងៃអាទិត្យ ទី១៦ ខែតុលា ឆ្នាំ២០១៦។

ជាមួយគ្នានោះដែរ លោក Duterte ប្រធានាធិបតី បានសន្យាដែរថា លោកនឹងការពារដែនអធិបតេយ្យរបស់ហ្វីលីពីន និង មិនងាកចេញពីសាលក្រម សម្រេចកាលពីខែកក្កដា របស់តុលាទីក្រុងឡាអេឡើយ។

ថ្លែងនៅក្នុងសន្និសិទសារ ព័ត៌មាននៅឯគេហដ្ឋានក្នុងទីក្រុង Davao ប្រធានាធិបតីហ្វីលីពីនរូបនេះ បានទទួលស្គាល់ថា ពិតជាមានការព្រួយបារម្ភមួយចំនួន នៅហ្វីលីពីន ចំពោះចលនាផ្លាស់ប្ដូរយ៉ាងឆាប់រហ័សងាកទៅការផ្សាភ្ជាប់ទំនាក់ទំនងស្អិតរមួត ជាមួយនឹងទីក្រុងប៉េកាំង ដែលនេះអាចនឹងប៉ះពាល់ ដល់ដែនអធិបតេយ្យភាព។ ប៉ុន្តែលោកបានអះអាងថា រឿងបែបនេះនឹងមិនអាចកើតឡើងនោះទេ។

លោក Rodrigo Duterte បានបន្តថា «បញ្ហាចម្រូងចម្រាស់នឹងត្រូវលើយកមកពិភាពក្សា ប៉ុន្តែវាមិនមែនជាការកំហិតជាដាច់ខាតនោះទេ នៅក្នុងឱកាសនៃ ការបំពេញទស្សនកិច្ចទៅ កាន់ទីក្រុងប៉េកំាង ​នៅសប្ដាហ៍នេះ ហើយខ្ញុំក៏នឹងមិនធ្វើការចរចារណាមួយដែរ ពោលគឺយើងនៅតែទទូចថា ដែនដីជម្លោះនោះជារបស់យើង រីឯសាលក្រមសម្រេចនៃតុលាការទីក្រុងឡាអេ នឹងត្រូវបានអនុវត្ត»។

សូមជំរាបថា តុលាការអចិន្ត្រៃយ៍អន្តរជាតិទីក្រុង ឡាអេ កាលពីខែកក្កដា បានចេញសាលក្រមសម្រេច ដោយវិនិច្ឆ័យថាការទាមទារដែនអធិបតេយ្យភាព របស់ចិនលើសមុទ្រចិខាងត្បូង គឺមិនឈរលើមូលដ្ឋានច្បាប់អន្តរជាតិ តែទីក្រុងប៉េកំាងមិនបានទទួលស្គាល់សាលក្រមនេះទេ៕