(កំពត)៖ លោកបណ្ឌិត ប៉ែន ស៊ីម៉ន អ្នកតំណាងរាស្រ្តមណ្ឌលកំពត ប្រធានគណៈកម្មការទី១០ នៃរដ្ឋសភា បានអញ្ជើញជាអធិបតី ក្នុងពិធីផ្សព្វផ្សាយខ្លឹមសារសង្ឃប្រកាស អនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣២ ឆ្នាំ២០២៤ ដែលបានរៀបចំប្រព្រឹត្តធ្វើឡើង នាព្រឹកថ្ងៃទី២០ ខែធ្នូ ឆ្នាំ២០២៤ នៅសាលប្រជុំសាលាខេត្តកំពត។
ក្នុងពិធីនេះ ក៏មានការនិមន្ត និងអញ្ជើញចូលរួមពីសំណាក់ ព្រះគម្ពីរត្ថេរ ញ៉ែត ចន្ទតារា ព្រះជលធីវាសីព្រះមេគណខេត្ត ព្រះគម្ពោតនិរោធសមាបត្តិមុនី ច័ន្ទ សុវណ្ណ ព្រះមហាសមុទ្ទមុនី ព្រះមេគណខេត្ត នៃគណៈធម្មយុត្តិកនិកាយ លោក តាក់ ហាប់ ប្រធានក្រុមប្រឹក្សាខេត្ត លោក ខាន់ សុខា អភិបាលរងខេត្ត តំណាងលោក ម៉ៅ ធនិន អភិបាលខេត្តកំពត ព្រះមន្ត្រីសង្ឃ ព្រះគ្រូចៅអធិការ អាចារ្យគណៈកម្មការវត្តទូទាំងខេត្តកំពត លោក-លោកស្រី សមាជិក សមាជិកាព្រឹទ្ធសភា រដ្ឋសភា លោក-លោកស្រី សមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពជុំវិញខេត្ត សរុប ៧៥៦អង្គ/នាក់។
លោក នាក់ យិតថូ ប្រធានមន្ទីរធម្មការ និងសាសនាខេត្តកំពត បានលើកឡើងក្នុងរបាយការណ៍ថា នៅក្នុងឆ្នាំ២០២៤នេះ ខេត្តកំពត មានវត្តចំនួន២៧៤វត្ត វត្តគណៈមហានិកាយ ចំនួន២៤៧វត្ត, វត្តគណៈធម្មយុត្តិកនិកាយ ចំនួន២៧វត្ត, មានព្រះសង្ឃ សរុបចំនួន២,៦៣៧អង្គ ក្នុងនោះគណៈមហានិកាយចំនួន២,៤៤៦អង្គ និងគណៈធម្មយុត្តចំនួន១៩១អង្គ។
ក្នុងឱកាសនោះ លោក ខាន់ សុខា អភិបាលរងខេត្ត បានលើកឡើងថា ក្នុងនាមលោក ម៉ៅ ធនិន អភិបាលខេត្ត និងក្នុងនាមរដ្ឋបាលខេត្ត សូមសម្ដែងនូវការដឹងគុណ និងថ្លែងអំណរព្រះគុណ ព្រះមន្ត្រីសង្ឃ ព្រះចៅអធិការវត្តគ្រប់ឋានានុក្រម ដែលកន្លងមកបានចូលរួមជួយគាំទ្រទាំងស្មារតី និងសម្ភារៈ ដល់ប្រជាពលរដ្ឋនៅមូលដ្ឋាន មានដូចជាៈ ការងារមនុស្សធម៌ ដោយធ្វើតាមរយៈកាកបាទក្រហមផង ការចុះជួយឧបត្ថម្ភដល់ប្រជាពលរដ្ឋ ជួបការលំបាកក្នុងជីវភាពដោយផ្ទាល់ជាមួយអាជ្ញាធរដែនដីផង ព្រមទាំងការសំដែងព្រះធម៍អប់រំដល់ប្រជាពុទ្ឋបរិស័ទ ឱ្យធ្វើតែអំពើល្អ សុចរិត បានយល់ដឹងអំពីតម្លៃ នៃគុណ ទោស បុណ្យ បាប ជាពិសេសការដឹងនូវគុណូបការៈចំពោះអ្នកដែលបានបូជាគ្រប់យ៉ាងក្នុងការរំដោះប្រជាពលរដ្ឋនៅទូទាំងប្រទេស បានរួចផុត អំពីរបបប្រល័យពូជសាសន៍ជាដើម។
មានមតិសំណេះសំណាល នាឱកាសនោះ លោកបណ្ឌិត ប៉ែន ស៊ីម៉ន បានលើកឡើងថា ព្រះមន្រ្តីសង្ឃ សមណសិស្សគ្រប់អង្គ ត្រូវមានស្មារតីប្រកាន់ភ្ជាប់នូវការបដិបត្តិធម៌វិន័យ ខិតខំព្យាយាមសិក្សារៀនសូត្រ និងធ្វើខ្លួនឲ្យក្លាយជាស្រែបុណ្យដ៏ល្អដល់ពុទ្ធបរិស័ទ ដើម្បីធានាបាននូវសណ្តាប់ធ្នាប់ របៀបរៀបរយ និងត្រូវចូលរួមលើកកម្ពស់កិត្យានុភាព តម្លៃ និងសេចក្តីថ្លៃថ្នូររបស់ព្រះសង្ឃ ព្រមទាំងចូលរួមថែរក្សាការពារ និងលើកស្ទួយព្រះពុទ្ធសាសនា ដែលជាសាសនារបស់រដ្ឋ ឲ្យបានគង់វង្សស្ថិតស្ថេរចីរកាល។
លោកបណ្ឌិត ប៉ែន ស៊ីម៉ន ក៏បានសូមថ្វាយបង្គំស្នើដល់ព្រះមេគណខេត្តកំពត ទាំង២គណៈ សូមធ្វើការណែនាំដល់ព្រះចៅអធិការគ្រប់វត្ត ឲ្យពង្រឹងនូវធម៌វិន័យដល់ភិក្ខុសាមណេរ សមទៅនិងអភិក្រមទាំង៥ របស់ព្រះពុទ្ធសាសនា រួមមាន៖ បព្វជ្ជា (ការបួស), បរិយត្តិ (ការសិក្សា), បដិបត្តិ (ការប្រតិបត្តិ), បដិវេធៈ (លទ្ធផល) និងបព្វាជនីយកម្ម (ការដាក់ទោស ឬបញ្ចប់ភារកិច្ច) និងបន្តថែរក្សាឱ្យបានអភិក្រម ស-៣ សម្រាប់វត្តអារាមរបស់ក្រសួងធម្មការ និងសាសនា គឺ៖ វត្តស្អាត, វត្តស្ងប់ និងវត្តស្វាង ដើម្បីឱ្យសាកសមជាខេត្ត ដែលកំពុងមានសក្តានុពលផ្នែកទេសចរណ៍ វប្បធម៌ បេតិកភណ្ឌ និងសាសនា៕
