(ព្រះសីហនុ)៖ លោកបណ្ឌិត គី សេរីវឌ្ឍន៍ ប្រធានវិទ្យាស្ថានទំនាក់ទំនងភាសាចិន នៃរាជបណ្ឌិត្យសភាកម្ពុជា បានគូសបញ្ជាក់ថា តាមរយៈ «វេទិកាវិនិយោគនៅខេត្តព្រះសីហនុ» នឹងដោះស្រាយការព្រួយបារម្ភរបស់វិនិយោគិន ចំពោះនិតិវិធីនៃការដាក់ទុនវិនិយោគនៅកម្ពុជា។​

ការលើកឡើងបែបនេះរបស់លោក បានធ្វើឡើងនាឱកាសដែលលោក អញ្ជើញចូលរួម «វេទិកាវិនិយោគក្នុងខេត្តព្រះសីហនុ» ដែលមានការចូលរួមពីវិនិយោគិនជាតិ និងអន្តរជាតិជាច្រើនរូបផ្សេងទៀត ដែលរៀបចំឡើងនៅថ្ងៃទិ១៧ ខែធ្នូ ឆ្នាំ២០២៤ ក្នុងសណ្ឋារគារសុខា ខេត្តព្រះសីហនុ។

លោកបណ្ឌិត គី សេរីវឌ្ឍន៍ បានឱ្យដឹងថា អ្នកវិនិយោគទាំងអស់នៅមានការព្រួយបារម្ភថា ប្រសិនជាទៅសុំច្បាប់អនុញ្ញាតដើម្បីវិនិយោគ តើពួកគាត់ត្រូវទៅណា, រៀបចំអាជ្ញាបណ្ណនៅទីតាំងណា, ប្រកាសសុំប៉ាតង់ ត្រូវធ្វើដូចម្ដេច...នៅមានការរារែកច្រើន ដូច្នេះ «វេទិកាវិនិយោគនៅខេត្តព្រះសីហនុ» នឹងជួយដោះស្រាយការព្រួយបារម្ភរបស់វិនិយោគិន ចំពោះនិតិវិធីនៃការដាក់ទុនវិនិយោគនៅកម្ពុជា។

ជាមួយគ្នានេះ លោក បានបន្តថា ដើម្បីស្វែងយល់បន្ថែមពីនីតិវិធីស្នើសុំអនុញ្ញាតវិនិយោគទុននៅកម្ពុជា, វិនិយោគិន អាចទាក់ទងសាកសួរព័ត៌មានទៅកាន់ គណៈកម្មាធិការជម្រុញការងារខេត្តព្រះសីហនុ ដែលជាការសម្រួលមួយដ៏ល្អ ឬវិនិយោគិនអាចមកសិក្សាផ្ទាល់អំពីខេត្តព្រះសីហនុ ក៏ដូចជាអគារដែលជាប់គាំងផងដែរ៕