(ភ្នំពេញ)៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានជំរុញឱ្យជនរួមជាតិបន្តថែរក្សាសន្តិភាព ស្ថិរភាពនៅកម្ពុជា ដើម្បីថែរក្សានូវសមិទ្ធផលនានា ដែលកម្ពុជាសម្រេចបានដោយលំបាកបំផុត និងបន្តកសាងសមិទ្ធផលថ្មីៗ សម្រាប់ជាតិ និងប្រជាជន។
ការលើកឡើងរបស់សម្តេច បានធ្វើឡើងក្នុងឱកាសអញ្ជើញបិទសន្និបាតបូកសរុបលទ្ធផលការងារ ឆ្នាំ២០២៤ និងលើកទិសដៅការងារបន្តរបស់គណៈចលនាមហាជនគណបក្សប្រជាជនកម្ពុជា នាព្រឹកថ្ងៃពុធ ទី១៨ ខែធ្នូ ឆ្នាំ២០២៤នេះ នៅវិមាន៧មករា។
សម្តេចតេជោ ក៏ជំរុញឱ្យសមាជិកគណបក្សបន្តកសាងសមិទ្ធផលថ្មីៗ សម្រាប់ជាតិ និងប្រជាជន បំពេញភារកិច្ចការងារនៅក្នុងស្ថាប័នគ្រប់ជាន់ថ្នាក់ ហើយត្រូវរួមគ្នារក្សាឱ្យបានដាច់ខាត សន្តិភាព ស្ថិរភាពសង្គម ទោះលះបង់ក្នុងតម្លៃណាក៏ដោយ ត្រូវខិតខំរក្សាឱ្យបាននូវកំណើនម៉ាក្រូសេដ្ឋកិច្ច ដែលជាចំណង១ខ្សែ២ (រក្សាស្ថិរភាពនយោបាយ និងរក្សាស្ថិរភាពម៉ាក្រូសេដ្ឋកិច្ច)។
សម្តេចក៏បានបញ្ជាក់ដែរថា នាវាកម្ពុជាក្រោមការដឹកនាំរបស់គណបក្ស បានច្បាមយកមកវិញនូវសន្តិភាពពេញលេញជូនប្រជាជន ដែលជាគុណតម្លៃស្នូលនៃការចាប់ផ្តើមឡើងវិញក្នុងការកសាង និងអភិវឌ្ឍន៍មាតុភូមិដ៏បវរនៃយើងទាំងអស់ គ្នារហូតមកដល់បច្ចុប្បន្ន។ ដោយសារកត្តាសន្តិភាពនេះហើយ សេដ្ឋកិច្ចកម្ពុជា បានឆ្លងកាត់ការផ្លាស់ប្តូរគួរឱ្យ កត់សម្គាល់ដោយបានវិវត្តទៅជាសេដ្ឋកិច្ចទំនើប និងអាចបន្សំខ្លួនក្នុងសមាហរណកម្មសេដ្ឋកិច្ចសកល ហើយ សេដ្ឋកិច្ចកម្ពុជា ក៏បានបង្ហាញពីភាពធន់គួរឱ្យកត់សម្គាល់ផងដែរ។
សម្តេចបានបន្ថែមទៀតថា៖ យើងអាចសន្និដ្ឋានបានថា សន្តិភាព និងការអភិវឌ្ឍ គឺជាចុងខ្សែពីរ នៃចំណងតែមួយ មានន័យថាបើគ្មានសន្តិភាព មិនអាចអភិវឌ្ឍន៍បានទេ ហើយបើគ្មានការអភិវឌ្ឍ ប្រកបដោយចីរភាព បរិយាបន្ន និងសមធម៌ ក៏មិនអាចមានមូលដ្ឋានក្នុងការថែរក្សាសន្តិភាព និងស្ថិរភាពឱ្យនៅគង់វង្សបានដែរ។ នេះជាតថភាព ជាក់ស្តែង និងជាក្រឹត្យក្រមសត្យានុម័ត ដែលមន្ត្រីបក្សត្រូវយល់ដឹង និងខិតខំបំពេញការងារ ទាំងក្នុងក្របខណ្ឌ បក្ស និងរដ្ឋ ដោយតម្កល់បុព្វហេតុ ទស្សនៈ គោលជំហរ ក្នុងការរួមគ្នាការពារសន្តិភាព និងជំរុញការអភិវឌ្ឍនៅ កម្ពុជា។ មានសន្តិភាព ទើបពលរដ្ឋមានសិទ្ធិសេរីភាព មានសន្តិភាព ទើបប្រទេសជាតិមានការអភិវឌ្ឍរីក ចម្រើនទៅបាន៕
