(ភ្នំពេញ)៖ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានថ្លែងកោតសរសើរដល់ រាជរដ្ឋាភិបាល នីតិកាលទី៧ នៃរដ្ឋសភា ដែលថ្មីៗនេះបានប្រកាសឱ្យមានការចុះបញ្ជីនៃក្រុមអ្នកសេដ្ឋកិច្ចក្រៅប្រព័ន្ធតាមប្រព័ន្ធឌីជីថល ដែលកាន់តែផ្ដល់ភាពងាយស្រួល និងកក់ក្ដៅដល់បងប្អូនអ្នកនៅក្នុងសេដ្ឋកិច្ចក្រៅប្រព័ន្ធ និងបានជំរុញមានឱ្យយកចិត្តទុកដាក់ចំពោះសេដ្ឋកិច្ចក្រៅប្រព័ន្ធឱ្យបានខ្លាំងថែមទៀត។
សម្ដេចតេជោ ហ៊ុន សែន បានថ្លែងដូចនេះនៅព្រឹកថ្ងៃទី១៨ ខែធ្នូ ឆ្នាំ២០២៤នេះ នាឱកាសដែលសម្តេចអញ្ជើញជាអធិបតីបិទសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារបន្ត របស់គណៈចលនាមហាជនគណបក្សប្រជាជនកម្ពុជា នៅវិមាន៧មករា ដោយមានការចូលរួមពីសមាជិក សមាជិកា អចិន្ត្រៃយ៍បក្ស ព្រមទាំងសមាជិក សមាជិកា នៃគណៈកម្មាធិការកណ្តាលគណបក្សជាច្រើនរូបទៀតផងដែរ។
សន្និបាតនេះធ្វើឡើងដើម្បីបូកសរុបលទ្ធផលការងារក្នុងរយៈពេលមួយឆ្នាំកន្លងទៅ ក្នុងតួនាទីជាស្ថាប័នជំនួយការឱ្យគណៈកម្មាធិការកណ្តាល លើការងារដឹកនាំ តម្រង់ទិស និងសម្របសម្រួលការងារចលនាមហាជនរបស់គណបក្ស ក្នុងស្រទាប់មហាជន រួមមាន យុវជន ស្ត្រី កម្មករនិយោជិត និងអង្គការសង្គមនានា សំដៅរៀបចំទិសដៅការងារបន្ត ដែលឆ្លើយតបទៅនឹងតម្រូវការ និងសំណូមពររបស់មហាជន ស្របតាមបរិបទនៃការវិវឌ្ឍថ្មីៗរបស់សង្គម។
ជាមួយគ្នានោះដែរ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ក៏បានថ្លែងកោតសរសើរដល់រាជរដ្ឋាភិបាលលើការប្រមូលចំណូល និងបានជំរុញការយកចិត្តទុកដាក់ប្រមូលចំណូលឱ្យអស់លទ្ធភាពបន្ថែមទៀត ទាំងថ្នាក់ជាតិ និងថ្នាក់ក្រោមជាតិផងដែរ។
សូមបញ្ជាក់ដែរថា កាលពីថ្ងៃទី១៦ ខែធ្នូ ឆ្នាំ២០២៤ កន្លងទៅថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្ពោធដាក់ឱ្យដំណើរការថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ ដោយសម្តេចបានចាត់ទុក «ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ» នេះជាវឌ្ឍនភាពដ៏សំខាន់មួយនៅក្នុងការអនុវត្ត «យុទ្ធសាស្រ្តជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ ២០២៣-២០២៨»។
លក្ខណៈពិសេសសំខាន់ៗរបស់ថ្នាលមានដូចជា ការប្រើប្រាស់បច្ចេកវិទ្យា AI-Assisted ដើម្បីសម្រួលដល់ការបំពេញទិន្នន័យ, ការទាញយកទិន្នន័យដោយស្វ័យប្រវត្តិចេញពីអត្តសញ្ញាណប័ណ្ណ, ការចូលទៅប្រើប្រាស់ប្រព័ន្ធដោយប្រើប្រាស់ថ្នាល CamDigiKey សម្រាប់មន្ត្រី និងបុគ្គលិកផ្នែកខាងក្រោយ ដើម្បីធានានូវការកំណត់អត្តសញ្ញាណរបស់អ្នកប្រើប្រាស់បានត្រឹមត្រូវ និងច្បាស់លាស់ ការផ្លាស់ប្តូរទិន្នន័យតាមរយៈថ្នាលផ្លាស់ប្តូរទិន្នន័យកម្ពុជា (CamDx) របស់រាជរដ្ឋាភិបាលកម្ពុជា ការបញ្ចាក់ភាពត្រឹមត្រូវ និងពិតប្រាកដរបស់វិញ្ញាបនបត្រតាមរយៈថ្នាល verify.gov.kh និងកាផ្ទៀងផ្ទាត់ទិន្នន័យជាមួយទិន្នន័យអត្តសញ្ញាណកម្ម និងទិន្នន័យរបស់រាជរដ្ឋាភិបាលទៅកាន់ក្រសួងស្ថាប័នពាក់ព័ន្ធផ្អែកតាមតម្រូវការក្នុងការរៀបចំ និងផ្តល់កញ្ចប់អត្ថប្រយោជន៍ជូនប្រជាជនក្នុងសេដ្ឋកិច្ចក្រៅប្រព័ន្ធ។
ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធនេះ នឹងអនុញ្ញាតឱ្យមានមធ្យោបាយចុះឈ្មោះជាច្រើនជម្រើស ជូនប្រជាពលរដ្ឋដោយឥតបង់ថ្លៃសេវា និងតាមការស្ម័គ្រចិត្តដោយពឹងផ្អែកលើព័ត៌មានពីការធ្វើស្វ័យប្រកាស។ ការចុះឈ្មោះនេះផ្តោតចំពោះក្រុមគោលដៅរួមមាន៖ សហគ្រាសធុនមីក្រូ កម្មករ-និយោជិតនៃសហគ្រាសធុនមីក្រូ កម្មករ-និយោជិតម្តងម្កាល និងបុគ្គលស្វ័យនិយោជន៍ ដែលប្រកបអាជីវកម្ម មុខរបរ និង/ឬ ការងារ នៅក្នុងសេដ្ឋកិច្ចក្រៅប្រព័ន្ធ។
ដើម្បីធានាដល់កិច្ចដំណើរការថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ ក្រុមការងារបានសាកល្បង ចំពោះក្រុមគោលដៅអ្នកសេដ្ឋកិច្ចក្រៅប្រព័ន្ធចំនួន ១៥១នាក់ ដែលជាលទ្ធផលបានបង្ហាញថា អ្នកសេដ្ឋកិច្ចក្រៅប្រព័ន្ធភាគច្រើនរហូតដល់៧៣% បានចំណាយពេលចុះឈ្មោះចន្លោះពី ៥-១០នាទី និង១៧% បានចំណាយពេលចុះឈ្មោះក្រោម ៥នាទី និង ១០% ចំណាយពេលលើសពី ១៥នាទី។
ប្រជាពលរដ្ឋអ្នកសេដ្ឋកិច្ចក្រៅប្រព័ន្ធដែលបានចុះឈ្មោះលើថ្នាលឌីជីថលនេះ នឹងទទួលបានវិញ្ញាបនបត្រចុះឈ្មោះអ្នកសេដ្ឋកិច្ចក្រៅប្រព័ន្ធក្នុងទម្រង់ឌីជីថល ដែលមានតម្លៃគតិយុត្តក្នុងកម្រិតមួយអាចប្រើប្រាស់សម្រាប់ទទួលបានអត្ថប្រយោជន៍ពីកិច្ចអន្តរគមន៍របស់រាជរដ្ឋាភិបាល៕
