(ភ្នំពេញ)៖ ក្រសួងការបរទេសកម្ពុជា បានឱ្យដឹងថា នៅរសៀលថ្ងៃទី១៦ ខែធ្នូ ឆ្នាំ២០២៤នេះ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានជួបពិភាក្សាតាមទូរស័ព្ទជាមួយលោក ម៉ារីត សាងៀមផុង្ស រដ្ឋមន្ត្រីក្រសួងការបរទេសថៃ។
បើតាមក្រសួងការបរទេសកម្ពុជា ជំនួបតាមទូរស័ព្ទនេះ រដ្ឋមន្ត្រីការបរទេសទាំងពីរបានចែករំលែកទស្សនៈដូចគ្នាថា ប្រទេសទាំងពីរមានទំនាក់ទំនងមិត្តភាពដ៏កក់ក្តៅ និងកិច្ចសហប្រតិបត្តិការដែលត្រូវបានពង្រីក និងបានឯកភាពធ្វើការជាមួយគ្នា ដើម្បីជំរុញទំនាក់ទំនងភាពជាដៃគូយុទ្ធសាស្ត្រ ព្រមទាំងលើកកម្ពស់កិច្ចសហប្រតិបត្តិការនៅក្នុងក្របខ័ណ្ឌពហុភាគី។
ភាគីទាំងពីរទន្ទឹងរង់ចាំការរៀបចំសកម្មភាពរួមគ្នា ដើម្បីប្រារព្ធខួបលើកទី៧៥ នៃការបង្កើតទំនាក់ទំនងការទូតរវាងព្រះរាជាណាចក្រទាំងពីរនៅឆ្នាំ២០២៥ផងដែរ៕
