(កំពត)៖ ក្រសួងទេសចរណ៍ សហការជាមួយរដ្ឋបាលខេត្តកំពត រដ្ឋបាលក្រុងកំពត មន្ទីរទេសចរណ៍ មន្ទីរបរិស្ថាន លោកគ្រូ អ្នកគ្រូ សិស្សានុសិស្ស យុវជន ក្រុមហ៊ុនប្រមូលសំរាម ចុះធ្វើ «យុទ្ធនាការកម្ពុជាស្អាត កំពតស្អាត» រយៈពេល៤ថ្ងៃ ចាប់ពីថ្ងៃទី១២-១៥ ខែធ្នូ ឆ្នាំ២០២៤ នាឱកាសបុណ្យសមុទ្រលើកទី១១ ជុំទី៣ ក្រោមប្រធានបទ «អបអរសាទរបេតិកភណ្ឌ និងនិរន្តរភាពតំបន់ឆ្នេរ»។
យុទ្ធនាការនេះរៀបចំឡើងក្នុងគោលបំណងដើម្បីផ្សព្វផ្សាយបញ្ជ្រាបការយល់ដឹងអំពីការគ្រប់គ្រងសំរាមឱ្យបានត្រឹមត្រូវ កុំបោះសំរាមចោលផ្តេសផ្តាសបណ្តាលឱ្យខូចសោភណភាព ប៉ះដល់ភាពស្អាតនៃទីក្រុង និងតំបន់ឆ្នេរសមុទ្រ ជាពិសេសដើម្បីអបអរពិធីបុណ្យសមុទ្រនៅខេត្តកំពតនេះតែម្តង។ យន្តការគ្រប់គ្រងសំរាមមុន អំឡុងពេលនិងក្រោយពិធីបុណ្យសមុទ្រត្រូវបានរៀបចំឡើងយ៉ាងយកចិត្តទុកដាក់រដ្ឋបាលខេត្តកំពត។
* ថ្ងៃទី១២-១៥ ខែធ្នូ ឆ្នាំ២០២៤៖ ក្រុមការងារអនាម័យប្រចាំការចំនួនប្រមាណ៨០រូប ធ្វើការសម្អាតតាមទីតាំង ស្ពានរថភ្លើង ផ្លូវព្រះអង្គដួង ផ្លូវលេខ៧៣៥ រង្វង់មូលទុរេន ពហុកីឡដ្ឋានជាតិ ស្ពានកំពង់បាយ រង្វង់មូលទឹករលក រមណីយដ្ឋានស្រះឈូក តាមឆ្នេរព្រែកពីស្ពានឥន្ធនូដល់ស្ពានត្រើយកោះ ផ្លូវជាតិលេខ៣ លេខ៣៣ ផ្លូវជំវិញក្រុង។
* ថ្ងៃទី១២ ខែធ្នូ ឆ្នាំ២០២៤៖ ក្រុមការងារបានជួបសំណេះសំណាល និងផ្សព្វផ្សាយអំពីយុទ្ធនាការកម្ពុជាស្អាត កំពតស្អាត ដល់បងប្អូនក្រុមការងារសម្អាតអនាម័យក្រុងប្រមាណ១០០នាក់ ទៅទីតាំងរង្វង់មូលទុរេន។
* ថ្ងៃទី១៤ ខែធ្នូ ឆ្នាំ២០២៤៖ ក្រុមការងារសហការជាមួយរដ្ឋបាលខេត្តកំពត ក្រុងកំពត មន្ទីរទេសចរណ៍ មន្ទីរបរិស្ថាន បានរៀបចំផ្សព្វផ្សាយយុទ្ធនាការកម្ពុជាស្អាត កំពតស្អាត ដោយមានការអញ្ជើញចូលរួមពីលោក មឿង គង្គា អភិបាលរងនៃគណៈអភិបាលខេត្តកំពត ដោយការចូលរួមពីយុវជន មន្ត្រីរាជការ ក្រុមការងារអនាម័យសរុបប្រមាណ៥០០នាក់។
ក្រៅពីនេះ ក្រុមការងារក៏បានរៀបចំចងបដាផ្សព្វផ្សាយអំពីទេសចរណ៍ និងបដាអប់រំមួយចំនួនផងដែរ៕
