(នីហ្សេរីយ៉ា)៖ ភរិយាប្រធានាធិបតីនីហ្សេរីយ៉ា លោក Muhammadu Buhari បាននិយាយថា លោកស្រីអាចនឹងមិនបោះឆ្នោតគាំទ្រស្វាមីរបស់ខ្លួន នៅអាណត្តិក្រោយនេះទេ លុះត្រាតែលោក Buhari រុះរើរដ្ឋាភិបាលរបស់លោកជាមុនសិន ។ នេះបើយោងតាមការចុះផ្សាយដោយ សារព័ត៌មាន Channel News Asia​ នៅថ្ងៃសុក្រ ទី១៤​ខែតុលា ឆ្នាំ ២០១៦។

លោកស្រី Aisha Buhari នៅក្នុងបទសម្ភាសន៍ជាមួយ ស្ថានីយ៍ទូរទស្សន៍ BBC បានអះអាងថា ប្ដីរបស់ខ្លួនមិន បានដឹងឡើយថា មន្ត្រីរដ្ឋាភិបាល ដែលលោកតែងតំាង មានមួយចំនួនធំត្រូវបាន តែងតំាងឡើងក្រោមឥទ្ធិពល មនុស្សមួយក្ដាប់តូច។ លោកស្រី  Aisha​ បានបន្តថា «គាត់មិនទាន់ ផ្ដល់ចម្លើយឱ្យខ្ញុំទេ ប៉ុន្តែខ្ញុំបានសម្រេចចិត្ត រួចហើយ បើសិនជារឿងបែបនេះនៅតែកើត​មាន​រហូតដល់ឆ្នាំ២០១៩ នោះខ្ញុំនឹងមិនធ្វើយុទ្ធនាការស្នើឱ្យស្ត្រី នីហ្សេរីយ៉ាទំាងអស់ បោះឆ្នោតឱ្យគាត់ (លោក Muhammadu Buhari ) ដូចដែលខ្ញុំធ្លាប់បានធ្វើកាលពីពេល មុន ហើយខ្ញុំក៏នឹងមិនធ្វើរបៀបនេះម្ដងទៀតនោះដែរ»

គួររំលឹកថា​ លោក Muhammadu Buhari មានអាយុ ៧៣ឆ្នាំ និងជាអតីតមេដឹកយោធា បានជាប់ឆ្នោតជា ប្រធានាធិបតីនៅឆ្នាំ២០១៥ បន្ទាប់ពីលោកបានសន្យាយ៉ាងមុតមំាថា នឹងបោសសំអាតក្រុម Boko Haram ក៏ដូចជាអំពើ ពុកលួយនៅក្នុងប្រទេសនីហ្សេរីយ៉ា។ យ៉ាងណាក៏ដោយ លោក Muhammadu Buhari ហាក់មិនទាន់បញ្ជាក់ទេថា លោកនឹងចូលរួមឈរឈ្មោះក្នុងការបោះឆ្នោត នៅឆ្នាំ២០១៩ ឬក៏អត់៕