(ភ្នំពេញ)៖ ក្រសួងសុខាភិបាល បានចេញមកច្រានចោលចំពោះការផ្សព្វផ្សាយលើបណ្តាញសង្គមដែលបានលើកឡើងថា ខេត្តព្រះសីហនុ និងខេត្តតាកែវ ជាខេត្តមានអត្រាមេរោគអេដស៍ខ្ពស់ជាងគេក្នុងលំដាប់លេខ១ និងលេខ២។ ក្នុងសេចក្តីបំភ្លឺនេះ ក្រសួងបានបញ្ជាក់ផងដែរថា គិតត្រឹមឆ្នាំ២០២៣ កម្ពុជាមានអ្នករស់នៅជាមួយមេរោគអេដស៍ចំនួន ៧៦,០០០នាក់ ក្នុងនោះ ៦៩,៤១៣នាក់ កំពុងទទួលការព្យាបាលដោយឱសថ។
ការចេញមកពីបញ្ជាក់ពីស្ថានភាពជំងឺអេដស៍នៅកម្ពុជា ធ្វើឡើងបន្ទាប់ពីមានគណនីហ្វេសប៊ុក ឈ្មោះ Hea Ra កាលពីថ្ងៃទី៨ ខែធ្នូ ឆ្នាំ២០២៤ បានបង្ហោះព័ត៌មានថា « HIV-មេរោគេអដស៍កំពុងកើនឡើងខ្លាំង TOP1 ព្រះសីហនុ TOP2 តាកែវ។ បង្កើនការប្រុងប្រយ័ត្ន 70,000នាក់ផ្ទុក 7,000នាក់ រត់គេចមិនទទួលការព្យាបាល»។
ព័ត៌មានដែលបានចុះផ្សាយខាងលើនេះ ជាព័ត៌មានមិនពិត ខ្វះមូលដ្ឋានច្បាស់លាស់ និងបានបង្កឱ្យមាន ការភាន់ច្រឡំយ៉ាងធ្ងន់ធ្ងរ។ ជាងនេះទៅទៀត ខ្លឹមសារបំភាន់នេះ បានឈានទៅដល់ការបង្កើតវីដេអូប្រតិកម្ម ដែលបង្ហាញពីការព្រួយបារម្ភហួសហេតុ អំពីស្ថានភាពមេរោគអេដស៍ និងជំងឺអេដស៍នៅក្នុងខេត្តតាកែវ។
ទោះបីជាម្ចាស់គណនីបានកែតម្រូវខ្លឹមសារនៃការបង្ហោះជាបន្តបន្ទាប់ក៏ដោយ ក៏នៅតែមាន ទំព័រហ្វេសប៊ុកជាច្រើន បន្តផ្សព្វផ្សាយនិងចែករំលែក ព័ត៌មានមិនពិតខាងលើ ដោយមិនបានផ្ទៀងផ្ទាត់ការ ពិតពីអ្នកជំនាញគ្រប់គ្រងទិន្នន័យដែលមានសមត្ថភាព ជាអ្នកផ្តល់សេវាក្នុងការបង្ការ ថែទាំ និងព្យាបាល មេរោគអេដស៍និងជំងឺអេដស៍។ ព័ត៌មានមិនពិតដែលកំពុងត្រូវបានបន្តផ្សព្វផ្សាយនេះ ធ្វើឱ្យមានការភាន់ ច្រឡំទាក់ទងនឹងករណីជំងឺអេដស៍នៅខេត្តតាកែវ។
ក្រសួងបានបញ្ជាក់ថា ប្រទេសកម្ពុជា ត្រូវបានពិភពលោកទទួលស្គាល់ថា ស្ថិតក្នុងគន្លងផ្លូវក្នុងការឈានទៅសម្រេច បានគោលដៅសកល ៩៥%-៩៥%-៩៥% មានន័យថា ៩៥%នៃអ្នកដែលមិនបានដឹងខ្លួនថាផ្ទុកមេរោគ អេដស៍បានដឹងពីស្ថានភាពនៃមេរោគអេដស៍របស់ខ្លួន, ៩៥% បានដឹងខ្លួនថា ផ្ទុកមេរោគអើដស៍បានទទួល ការព្យាបាលដោយឱសថប្រឆាំងមេរោគអេដស៍ និង ៩៥%នៃអ្នកដែលបានទទួលការព្យាបាលមានបន្ទុក មេរោគអេដស៍ក្នុងឈាមត្រូវបានបង្ក្រាប (Viral Suppressed)។ ជាលទ្ធផលនៅឆ្នាំ២០២៣ សម្រេច បាន ៨៩% នៃ៩៥%ទី១, ៩៨%នៃ៩៥ទី២ និង ៩៨% នៃ៩៥%ទី៣។
សម្រាប់ក្រសួងសុខាភិបាល សមិទ្ធផលដ៏គួរឱ្យកត់សម្គាល់នេះ បានឆ្លុះបញ្ចាំងពីប្តេជ្ញាចិត្ត និងការគាំទ្រពេញទំហឹងពីថ្នាក់ដឹកនាំកំពូល ពីឯកឧត្តមសាស្ត្រាចារ្យរដ្ឋមន្ត្រី ថ្នាក់ដឹកនាំក្រសួងសុខាភិបាល មន្ត្រីសុខាភិបាលថ្នាក់ជាតិ និងថ្នាក់ក្រោមជាតិ អាជ្ញាធរជាតិប្រយុទ្ធនឹងជំងឺអេដស៍ កាកបាទក្រហមកម្ពុជា ក្រសួងសេដ្ឋកិច្ចនិងហិរញ្ញវត្ថុ អង្គការដៃគូអភិវឌ្ឍន៍ ម្ចាស់ជំនួយ អង្គការសង្គមស៊ីវិល និងបណ្តាញក្រុមប្រជាជនចំណុច ក្នុងការឆ្លើយតបទៅនឹងមេរោគេអដស៍។
ទន្ទឹមនឹងភាពជោគជ័យដែលយើងសម្រេចបាននេះ មេរោគអេដស៍ នៅមិនទាន់ឈានដល់គោលដៅ នៃការលុបបំបាត់បានទាំងស្រុងពីប្រទេសកម្ពុជានោះទេ។ ក្នុងឆ្នាំ២០២៣ យើងមានអ្នករស់នៅជាមួយ មេរោគអេដស៍ចំនួន ៧៦,០០០នាក់ ក្នុងនោះ ៦៩,៤១៣នាក់ កំពុងទទួលការព្យាបាលដោយឱសថ ប្រឆាំងមេរោគអេដស៍គិតត្រឹមត្រីមាសទី៣ ឆ្នាំ២០២៤។ ដូចនេះមានអ្នករស់នៅជាមួយមេរោគអេដស៍ប្រមាណជា ៧,០០០នាក់ដែលមិនទាន់ដឹងខ្លួនថាផ្ទុកមេរោគអេដស៍ ហើយមិនទាន់ទទួលបានសេវាព្យាបាល។ ម៉្យាងទៀតនៅឆ្នាំ២០២៣ មានអ្នកឆ្លងថ្មីនៃមេរោគអេដស៍ចំនួន ១,២០០នាក់ ក្នុងនោះ ៨៦ភាគរយ គឺស្ថិតក្នុងចំណោមប្រជាជនចំណុច និងដៃគូរួមភេទរបស់ពួកគាត់។ ក្រុមប្រជាជនចំណុចត្រូវបានចាត់ទុកថា ជាក្រុមដែលមានការប្រឈមមុខខ្ពស់នឹងការឆ្លងមេរោគអេដស៍ រួមមាន ក្រុមស្ត្រីបម្រើសេវាកំសាន្ត ក្រុម បុរសរួមភេទជាមួយបុរស ក្រុមអ្នកបំលែងភេទជាស្រ្តី ក្រុមអ្នកប្រើប្រាស់ និងអ្នកចាក់គ្រឿងញៀន។
ខេត្តតាកែវ គិតត្រឹមថ្ងៃទី៣០ ខែកញ្ញា ឆ្នាំ២០២៤ អ្នកដែលកំពុងរស់នៅជាមួយមេរោគអេដស៍ កំពុងទទួលការបង្ការថែទាំ និងការព្យាបាលដោយឱសថប្រឆាំងនឹងមេរោគអេដស៍មានសរុបចំនួន ២,៨១៤នាក់ ក្នុងនោះស្រ្តីមានចំនួន ១,៥៣៥ នាក់។ ដោយឡែកមានអ្នកជំងឺត្រឹមតែ ១៤នាក់ ប៉ុណ្ណោះដែលបានចាកចេញពីសេវាជាបណ្តោះអាសន្ន និងកំពុងកិច្ចខិតខំប្រឹងប្រែងតាមដាន ទំនាក់ទំនងដើម្បីនាំពួកគាត់វិល ត្រឡប់មកសេវាថែទាំ និងព្យាបាលវិញ។
មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ នៃក្រសួងសុខាភិបាល បានបដិសេធ និងច្រានចោលចំពោះការផ្សព្វផ្សាយព័ត៌មានណាដែលមិនពិត គ្មានមូលដ្ឋានច្បាស់លាស់ និងសំណូមពរដូចខាងក្រោម៖
* រាល់ទំព័រហ្វេសប៊ុក តកតុក ឬវេទិការណាដែលបានផ្សព្វផ្សាយ និងចែក រំលែកព័ត៌មានមិនពិតនេះ សូមលុបចេញ ឬធ្វើការកែតម្រូវភ្លាមៗ។
* សូមសាធារណជនមេត្តាជៀសវាង ក្នុងការជឿ ឬចែករំលែកព័ត៌មានដែលមិនមានប្រភពច្បាស់លាស់។
បើទោះបីជាយ៉ាងណា ក្រសួងសុខាភិបាល អំពាវឱ្យប្រជាជន ក្រុមប្រជាជនប្រឈមមុខខ្ពស់នឹងការឆ្លងមេរោគអេដស៍ យុវវ័យ ត្រូវប្រកាន់ភ្ជាប់នូវផ្នត់គំនិត និងឥរិយាបថវិជ្ជមាន ក្នុងការបង្ការ ការចម្លងមេរោគអេដស៍ ដើម្បីបង្ការខ្លួនយើង គ្រួសារយើង សហគមន៍យើង និងសង្គមជាតិយើងពីការរីករាលនៃមេរោគអេដស៍ ព្រោះ ថា «យើងអាចភ្លេចអេដស៍ តែអេដស៍ពុំភ្លេចយើងឡើយ » និងបើបានប្រព្រឹត្តឬសង្ស័យថាខ្លួនបានប្រឈម នឹងការឆ្លងមេរោគអេដស៍ ចូលប្រញាប់រួសរាន់ទៅស្វែងរកសេវាផ្តល់ប្រឹក្សា និងធ្វើតេស្តឈាមរកមេរោគអេដស៍ ដោយស្ម័គ្រចិត្ត និងរក្សាការសម្ងាត់ ដើម្បីឆាប់បានដឹងពីស្ថានភាពផ្ទុកមេរោគអេដស៍ដែលអាចប្រើប្រាស់ ក្នុង ការសម្រេចចិត្ត ទៅទទួលសេវាថែទាំ និងព្យាបាលបន្តបានទាន់ពេលវេលា៕
