(កំពង់ធំ)៖ តាមរយៈវីដេអូដ្រូនមួយចំនួននេះ អ្នកទស្សនាប្រហែលជាមិនដឹងទេថា ពន្លឺភ្លឺចញ្ចាចតាមដងវិថីខ្វាត់ខ្វែងនេះគឺជាទីជនបទនោះឡើយ, ទិដ្ឋភាពសុប្រកាសទាំងនេះដែរ ហាក់ដូចជាបុរីជនបទមួយដ៏ស្រស់ឆើតឆាយនាពេលរាត្រី រំពៃឱ្យអ្នកទស្សនាឆ្ងល់ថា តើគេរៀបចំទីជនបទនេះបានស្អាតដូចម្ដេច ហើយមូលដ្ឋាននេះស្ថិតនៅទីណា?
នៅក្នុងមូលដ្ឋានស្រុកតាំងគោក ខេត្តកំពង់ធំ មានឃុំមួយឈ្មោះថា ឃុំពង្រ តាមរយៈប្រាសាទបុរាណមួយនាសម័យអង្គរ ដែលជាសិល្បៈក្នុងរចនាបថឃ្លាំង រជ្ជកាលព្រះបាទសូរ្យវរ្ម័នទី១ សតវត្សទី១១នោះ សរបញ្ជាក់ឱ្យដឹងបានថា មូលដ្ឋានដ៏ចំណាស់នេះអាចមានមនុស្សរស់នៅតាំងមុនសម័យអង្គរទៅទៀត។ បច្ចុប្បន្នឃុំពង្រគឺជាមូលដ្ឋានសុខសាន្តមួយដែលនៅចន្លោះខាងក្រោមផ្លូវជាតិលេខ៦ និងវាលស្រែដ៏ធំធេងខាងកើតបឹងទន្លេសាប។ អ្វីដែលគួរឱ្យកត់សម្គាល់នោះ ដ្បិតជាទីជនបទមានសាវតាចំណាស់ក៏ពិតមែន ប៉ុន្តែមើលចុះ! ឃុំពង្រនៃស្រុកតាំងគោកនេះពោរពេញទៅដោយផ្លូវបេតុងវែងៗសន្ធឹងញែកកាត់កណ្ដាលគេហប្រជា។ ផ្លូវទាំងនេះក៏ដើរតួជាសរសៃឈាមសេដ្ឋកិច្ចភ្ជាប់ពីផ្លូវជាតិលេខ៦រហូតដល់វាលស្រែវាស្រូវ លម្អដោយដើមផ្កាក្ងោកនិងផ្កាចម្រុះផ្សេងៗយ៉ាងស្រស់ប្រិមប្រិយ ហាក់ដូចជាបុរីខេមរាដ៏សុខសាន្តភិរម្យក្រោមម្លប់សន្តិភាព។
នៅឃុំពង្រនេះមានមេឃុំឈ្មោះថា អ៊ុំ គឹមសាន។ លោកអ៊ំ អ៊ុំ គឹមសាន ក៏ជាអតីតនាយកសាលាមួយរូបដែលមានឆន្ទៈចង់កសាងមូលដ្ឋានភូមិឃុំរបស់ខ្លួនឱ្យបន្តការរីកចម្រើនទៅមុខ ស្របពេលសន្តិភាពកំពុងផ្ដល់ជាម្លប់ដ៏ត្រជាក់ត្រជុំដល់កម្ពុជិកគ្រប់គ្នា។ លោកអ៊ំ អ៊ុំ គឹមសាន បានបញ្ជាក់ថា ផ្លូវបេតុងនានាដែលជាសមិទ្ធផលថ្មីលើទឹកដីឃុំពង្រនេះ គឺមានប្រវែងសរុបជិត៥គីឡូម៉ែត្រ ដែលមួយចំនួនធំគឺជាសរសៃឈាមសេដ្ឋកិច្ចសម្រាប់ប្រជាពលរដ្ឋក្នុងមូលដ្ឋាន ពីព្រោះសុទ្ធតែជាផ្លូវដែលតភ្ជាប់ពីផ្លូវជាតិ ពីទីប្រជុំជន និងភូមិដ្ឋានប្រជាពលរដ្ឋទៅកាន់ទៅវាលទំនាបកសិកម្ម ដែលជាទីប្រកបមុខរបរដ៏ចាំបាច់បំផុតរបស់ប្រជាពលរដ្ឋនៅឃុំពង្រ ក៏ដូចជាស្រុកតាំងគោកផងដែរ។
តាំងពីចាប់ផ្ដើមកសាងផ្លូវបេតុងនៅមូលដ្ឋានឃុំពង្រដំបូងនៅឆ្នាំ២០២១ លោកមេឃុំ អ៊ុំ គឹមសាន កត់សម្គាល់ឃើញថា អាជ្ញាធរស្រុកតាំងគោក ព្រះចៅអធិការវត្តគុហនគរ ប្រជាពលរដ្ឋ ក៏ដូចជាសប្បុរសជននានា ខិតខំសស្រាក់សស្រាំងយ៉ាងខ្លាំងក្នុងកិច្ចការកសាងសមិទ្ធផលសាធារណៈ សាមគ្គីគ្នាក្នុងការរៀបចំតុបតែងលម្អសោភ័ណភាពនៅតាមផ្លូវ ពិសេសគឺការលះបង់របងថ្មនិងដីនៅជាប់ចំណីផ្លូវរបស់ប្រជាពលរដ្ឋ (គិតជាតម្លៃរាប់ម៉ឺនដុល្លារ) ដើម្បីពង្រីកទទឹងផ្លូវ និងធ្វើបណ្ដាញលូបង្ហូរទឹកភ្លៀង ការចូលរួមដាំដើមឈើនិងដើមផ្កានៅអមសងខាងផ្លូវ ការចូលរួមជាកម្លាំងនិងថវិកាក្នុងការទិញបង្គោលនិងអំពូលសូឡាយកមកដំឡើងបំភ្លឺតាមផ្លូវជាដើម ពោលគឺដើម្បីបុព្វហេតុផលប្រយោជន៍រួម ផលប្រយោជន៍សាធារណៈក្នុងមូលដ្ឋាន។
ព្រះគ្រូមុនីសីលវង្ស តុន ពិសី គឺជាព្រះចៅអធិការវត្តគុហនគរ ជាព្រះសង្ឃដែលប្រកបដោយនវានុវត្តភាព ព្រះអង្គបានចូលរួមយ៉ាងច្រើនជាមួយសកម្មភាពនិងបុព្វហេតុសាធារណៈ ជាក់ស្ដែងការកសាងផ្លូវបេតុងមួយចំនួននៅមូលដ្ឋានឃុំពង្រតាំងពីឆ្នាំ២០២១ ខណៈរហូតមកដល់ពេលមានប្រវែងសរុបជាង២គីឡូម៉ែត្រ ក្នុងចំណោមផ្លូវបេតុងសរុបជិត៥គីឡូម៉ែត្រក្នុងឃុំពង្រ ប្រសិនបើគិតជាថវិកាមានប្រមាណ៤០ម៉ឺនដុល្លារហើយ។ ខណៈអមសងខាងផ្លូវបេតុងទាំងនោះ ក៏មានដាំនូវដើមផ្កាក្ងោកលម្អសោភ័ណភាពផ្លូវផងដែរ ពិសេសផ្លូវសំខាន់ៗក្នុងឃុំពង្រនេះក៏ជាផ្លូវទេសចរណ៍ដែលតភ្ជាប់ពីផ្លូវជាតិលេខ៦មកកាន់ប្រាសាទនិងវត្តគុហនគរ ដែលជារមណីយដ្ឋានទេសចរណ៍វប្បធម៌បេតិកភណ្ឌតែមួយគត់នៅស្រុកតាំងគោក។
ការចូលរួមស្ថាបនាផ្លូវបេតុងនិងការបំភ្លឺលម្អទាំងនេះ កើតចេញពីការចូលរួមរបស់ប្រជាពលរដ្ឋ សប្បុរសជនទាំងក្នុងប្រទេសនិងក្រៅប្រទេស ពិសេសគឺប្រជាពលរដ្ឋនៅក្នុងឃុំពង្រ ស្រុកតាំងគោកនេះតែម្ដង។ ព្រះគ្រូចៅអធិការក៏បានចម្រើនពរថ្លែងអំណរគុណយ៉ាងអនេកកប្បកាចំពោះសប្បុរសជន ប្រជាពលរដ្ឋ ក៏ដូចជាអាជ្ញាធរគ្រប់លំដាប់ថ្នាក់ ដែលបានរួបរួមសាមគ្គីបំពេញការងារមនុស្សធម៌ សង្គមធម៌ សម្រេចបាននូវសមិទ្ធផលបម្រើប្រយោជន៍សាធារណៈ។
បើតាមព្រះថេរដីការបស់ព្រះគ្រូ តុន ពិសី ការចូលរួមកសាងផ្លូវ កសាងសមិទ្ធផលសាធារណៈ គឺបានទាំងប្រយោជន៍ធំធេងក្នុងផ្នែកអាណាចក្រ និងបានបំពេញកុសលផលបុណ្យក្រាស់ក្រែលក្នុងផ្លូវធម៌នៃផ្នែកពុទ្ធចក្រ និយាយឱ្យខ្លីតាមផ្លូវធម៌ មនុស្សដើរឆ្លងកាត់កាន់តែច្រើន បានមគ្គផលក៏កាន់តែច្រើនដែរ។
មូលហេតុអ្វីបានជាព្រះគ្រូ តុន ពិសី ចូលរួមយ៉ាងសកម្មក្នុងកិច្ចការសាធារណៈបែបនេះ នោះក៏ព្រោះតែពាក្យថា «គុណ» មួយម៉ាត់គត់។ ពាក្យ «គុណ» នេះ ថ្វីដ្បិតថាខ្លី ប៉ុន្តែអត្ថន័យនិងសារតានៃពាក្យនេះ គឺវែងឆ្ងាយដូចផ្លូវហើយជ្រាលជ្រៅខ្លាំងណាស់។ គុណនេះ គឺគុណរបស់ពុទ្ធបរិស័ទដែលផ្ដល់នូវទំនុកចិត្តមកលើព្រះអង្គជាព្រះចៅធិការ ជាអ្នកដឹកនាំវត្តគុហនគរ ដូច្នេះព្រះគ្រូមានតែតាំងព្រះទ័យធ្វើអ្វីជាប្រយោជន៍សាធារណៈ ដើម្បីតបនូវឧបការគុណជូនចំពោះញាតិញោមពុទ្ធបរិស័ទវិញ សំដៅចូលរួមជំរុញការលើកស្ទួយជីវភាពរបស់ពួកគាត់ឱ្យកាន់តែប្រសើរឡើង ពិសេសលើកកម្ពស់មុខមាត់ភូមិឃុំស្រុកឱ្យកាន់តែរីកចម្រើនមានកិត្តិនាមរោចនៈដូចពន្លឺរស្មី។
ជាគោលបំណងធំរបស់ព្រះគ្រូចៅអធិការ តុន ពិសី ចំពោះការតស៊ូ លះបង់ ចូលរួមទាំងកម្លាំងកាយស្មារតីនេះ គឺគ្មានអ្វីក្រៅពីចង់នៅកសាងនិងថែរក្សាសមិទ្ធផលនៅក្នុងមាតុភូមិកំណើតដ៏បវរមួយនេះ និងចង់ឃើញយុវជនជំនាន់ក្រោយបង្កើនស្មារតីចូលរួម និងបន្តនូវកិច្ចការជាប្រយោជន៍សាធារណៈឱ្យសម្រេចបានសមិទ្ធផលធំធេងបន្តទៀត ព្រោះសន្តិភាពកំពុងបន្តមានហើយ ដូច្នេះយើងត្រូវជួយគ្នាការពារថែរក្សាឱ្យបានគង់វង្ស ហើយខិតខំអភិវឌ្ឍកម្ពុជទេសមួយនេះឱ្យកាន់តែរុងរឿងស្នងកិត្តិនាមមត៌កអង្គរឡើងវិញ។
សូមជម្រាបដែរថា ដោយស្មារតីចូលរួមទាំងផ្នែកអាណាចក្រ និងពុទ្ធចក្រយ៉ាងដូច្នេះហើយ ទើបជួយឱ្យមូលដ្ឋានឃុំពង្រ នៃស្រុកតាំងគោក កាន់តែត្រូវបានភ្ញៀវទេសចរស្គាល់និងចូលទស្សនានៅរមណីយដ្ឋានប្រាសាទគុហនគរ ប្រជាពលរដ្ឋធ្វើដំណើរ ដឹកជញ្ជូនទៅមកប្រកបដោយភាពងាយស្រួល។ ទិដ្ឋភាពរមណីយសុខសាន្តនេះ សមដូចពេលគេថា បុរីជនបទក្រោមម្លប់សន្តិភាព៕
