(រីយ៉ាដ, អារ៉ាប៊ីសាអូឌីត)៖ សម្តេចតេជោ ហ៊ុន សែន ប្រធានសភាកម្ពុជា បានស្នើប្រទេសអារ៉ាប៊ីសាអូឌីត ជួយទិញអង្ករពីកម្ពុជា ហើយជំរុញអ្នកវិនិយោគចូលមកវិនិយោគលើការកែច្នៃស្រូវអង្ករ ដើម្បីនាំចូលទៅប្រទេសអារ៉ាប៊ីសាឌីតវិញ។ ដោយឡែកប្រធានសភាអារ៉ាប៊ីសាអូឌីត បានប្រកាសថា នឹងបើកស្ថានទូតនៅកម្ពុជានាពេលឆាប់ៗខាងមុខ ដើម្បីពង្រឹងចំណងមិត្តភាព និងកិច្ចសហប្រតិបត្តិការទាំងឡាយឱ្យកាន់តែខ្លាំងក្លាថែមទៀត។
នៅព្រឹក ថ្ងៃទី៩ ខែធ្នូ ឆ្នាំ២០២៤នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានអញ្ជើញជួបពិភាក្សាការងារជាមួយលោកបណ្ឌិត អាប់ឌុលឡា ម៉ូហាម៉េដ អ៊ីប្រាហ៊ីម អាល-សេក្ខ (Abdullah Mohammed Ibrahim Al-Sheikh) ប្រធានសភាអារ៉ាប៊ីសាអូឌីត នៅវិមានរដ្ឋសភា រាជធានីរីយ៉ាដ។
ជាកិច្ចចាប់ផ្តើមនៃជំនួបនោះ ប្រធានសភាអារ៉ាប៊ីសាអូឌីត បានស្វាគមន៍យ៉ាងកក់ក្ដៅចំពោះ សម្ដេចតេជោ និងគណៈប្រតិភូ និងបានអរគុណសម្តេចតេជោ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រអារ៉ាប៊ីសាអូឌីត។ លោកប្រធានសភា បានសម្តែងក្តីរីករាយក្នុងការទទួល និងជួបសម្តេចតេជោ ដោយផ្ទាល់។
សម្តេចតេជោ ហ៊ុន សែន បានថ្លែងអំណរគុណលោកប្រធានសភា ចំពោះការទទួលស្វាគមន៍ សម្តេច និងគណៈប្រតិភូយ៉ាងកក់ក្តៅ ជាពិសេសពេលសម្តេចអញ្ជើញដល់ព្រលានយន្តហោះនៃរាជធានីរីយ៉ាដ។ សម្តេចតេជោ បន្ថែមថា ទស្សនកិច្ចពេលនេះនឹងជំរុញទំនាក់ទំនងទ្វេភាគីរវាងប្រទេសទាំងពីរបន្ថែមទៀត ជាពិសេសការជំរុញការផ្លាស់ប្តូរប្រជាជន និងប្រជាជន ទេសចរណ៍ និងកីឡា ព្រមទាំងទំនាក់ទំនងពាណិជ្ជកម្ម និងវិនិយោគ។
សម្តេចតេជោ ហ៊ុន សែន បានលើកឡើងថា កម្ពុជា និងអារ៉ាប៊ីសាអូឌីត គួរចាប់ផ្តើមធ្វើកិច្ចសហប្រតិបត្តិការស្នូល តាមរយៈកម្ពុជានាំចេញអង្ករមកអារ៉ាប៊ីសាអូឌីត ដោយសារកម្ពុជាមានប្រព័ន្ធស្រោចស្រពល្អជាងមុន និងមានអតិរេកស្រូវ។ សម្តេចតេជោ បានស្នើប្រធានសភា ជំរុញវិនិយោគិនអារ៉ាប៊ីសាអូឌីត ឱ្យមកវិនិយោគរៀបចំម៉ាស៊ីនកិនស្រូវ ស្តុក និងវេចខ្ចប់នៅកម្ពុជា សម្រាប់នាំចេញអង្ករមកប្រទេសអារ៉ាប៊ីសាអូឌីត និងប្រទេសនានាក្នុងតំបន់។
សម្តេចតេជោ បានគូសរំលេចថា មានប្រទេសមិនច្រើននោះទេ ដែលផ្តល់ឱកាសឱ្យវិនិយោគដោយផ្ទាល់ដូចនេះ។ សម្តេចតេជោ បានលើកឡើងថា អារ៉ាប៊ីសាអូឌីតមានសន្តិសុខថាមពល រីឯកម្ពុជា មានសន្តិសុខស្បៀង។ ប្រទេសទាំងពីរអាចបំពេញឱ្យគ្នាទៅវិញទៅមក។
សម្តេចតេជោ បានលើកឡើងផងដែរថា កម្ពុជា និងអារ៉ាប៊ីសាអូឌីត ប្រកាន់របបរាជាធិបតេយ្យដូចគ្នា អាស្រ័យហេតុនេះ ត្រូវរឹតចំណងមេត្រីភាព។
សម្តេចតេជោ បានថ្លែងអំណរគុណ ព្រះមហាក្សត្រអារ៉ាប៊ីសាអូឌីត ដែលព្រះអង្គទ្រង់ប្រោសប្រទានដល់សាសនិកឥស្លាមកម្ពុជាពី ២០នាក់ ទៅ១០០នាក់ បានចូលរួមបុណ្យហាជី (Hajj) ជារៀងរាល់ឆ្នាំ និងបានសព្វព្រះរាជហប្ញទ័យផ្តល់អាហារូបករណ៍ដល់យុវជនកម្ពុជា។
សម្តេចតេជោ បានលើកឡើងថា នៅកម្ពុជាព្រះពុទ្ធសាសនាជាសាសនារបស់រដ្ឋ ក៏ប៉ុន្តែកម្ពុជា មិនព្រងើយកន្តើយនឹងសហគមមូស្លីមឡើយ ដែលទទួលបានការយកចិត្តទុដាក់ខ្ពស់ ជាពិសេសការបញ្ចូលទៅក្នុងស្ថាប័នព្រឹទ្ធសភា រដ្ឋសភា រាជរដ្ឋាភិបាល កងទ័ព និង ថ្នាក់ក្រោមជាតិ។
សម្តេចតេជោ ក៏បានជម្រាបទៅប្រធានសភាអារ៉ាប៊ីសាអូឌីតផងដែរថា នៅកម្ពុជាមានការរៀបចំគណៈជាន់ខ្ពស់ឥស្លាមដែលមានឋានៈស្មើនឹងសម្តេចព្រះសង្ឃរាជ។ កម្ពុជា គឺជាប្រទេសគំរូនៃការអនុវត្តគោលនយោបាយសុខុដុមនីយកម្មសាសនានៅអាស៊ីអាគ្នេយ៍។
សម្តេចតេជោ បានគូសបញ្ជាក់ថា អារ៉ាប៊ីសាអូឌីត មានប្រជាប្រិយភាពកាន់តែខ្លាំងនៅក្នុងតំបន់ អាស្រ័យមានការប្រកួតកីឡាអន្តរជាតិ ជាពិសេសការធ្វើជាម្ចាស់ផ្ទះនៃការប្រកួត World Cup នាពេលកន្លងទៅ។ ឆ្លៀតក្នុងឱកាសនោះ សម្តេចតេជោ ក៏បានអញ្ជើញប្រធានសភាមកបំពេញទស្សនកិច្ចនៅកម្ពុជានាពេលខាងមុខ។
ជាកិច្ចឆ្លើយតប លោកប្រធានសភា បានបញ្ជាក់ថា ការលើកឡើងរបស់សម្តេចតេជោ មានសារៈសំខាន់ណាស់ ហើយលោកនឹងយកចិត្តទុកដាក់ និងយកទៅពិចារណា។ លោកប្រធានសភា បានលើកឡើងថា ប្រទេសអារ៉ាប៊ីសាអូឌីត នឹងបើកស្ថានទូត នៅកម្ពុជាក្នុងពេលដ៏ខ្លីខាងមុខនេះ។ ការបើកស្ថានទូតទូតនេះ នឹងបង្កភាពងាយស្រួលដល់ការជំរុញ និងពង្រឹងបន្ថែមទៀតនូវទំនាក់ទំនងទ្វេភាគី រវាងប្រទេសប្រទេសទាំងពីរ។
លោកប្រធានសភា បានបន្ថែមថា អារ៉ាប៊ីសាអូឌីត យកចិត្តទុកដាក់ខ្លាំងលើការលើកកម្ពស់សេដ្ឋកិច្ច និងសាសនា និងការធ្វើកិច្ចសហប្រតិបត្តិការលើវិស័យផ្សេងៗទៀត ជាពិសេស វិស័យប្រេងដែលជាវិស័យសំខាន់បំផុតរបស់អារ៉ាប៊ីសាអូឌីត។ ប្រទេសជាច្រើនមានទំនាក់ទំនងជាមួយអារ៉ាប៊ីសាអូឌីត តាមរយៈការផ្សាភ្ជាប់វិស័យសេដ្ឋកិច្ច។
លោកប្រធានសភាអារ៉ាប៊ីសាអូឌីត ប្រកាសស្វាគន៍ចំពោះសំណូមពររបស់សម្តេចតេជោ ពាក់ព័ន្ធការផ្តល់អាហារូបករណ៍ផ្តល់ដល់យុវជនកម្ពុជា និងការរៀបចំឱ្យមានការប្រកួតកីឡារវាងប្រទេសទាំងពីរនៅអារ៉ាប៊ីសាអូឌីត ព្រមទាំងរីករាយនឹងធ្វើការជាមួយសម្តេចតេជោ។
លោកប្រធានសភា បន្ថែមថា នៅក្នុងរដ្ឋសភារបស់អារ៉ាប៊ីសាអូឌីត មានគណៈកម្មការទទួលបន្ទុកជាមួយកម្ពុជា ក៏ប៉ុន្តែទំនាក់ទំនងមិនទាន់ស៊ីជម្រៅនៅឡើយទេ។ លោកបញ្ជាក់ថា គណៈកម្មការទាំងសងខាង ត្រូវធ្វើកិច្ចសហប្រតិបត្តិការជាមួយគ្នាឱ្យបានច្រើននៅពេលអនាគត។
លោកប្រធានសភាអារ៉ាប៊ីសាអូឌីត បានសម្តែងក្តីរីករាយក្នុងការទទួលយកការអញ្ជើញរបស់សម្តេចតេជោ ក្នុងការបំពេញទស្សនកិច្ចនៅកម្ពុជា នាពេលសមស្រមខាងមុខ។
សម្តេចតេជោ និងលោកប្រធានសភាអារ៉ាប៊ីសាអូឌីត ក៏បានផ្លាស់ប្តូរយោបល់គ្នាលើស្ថានការណ៍តំបន់ និងអន្តរជាតិផងដែរ៕
