(ភ្នំពេញ)៖ លោក Santo Darmosumarto ឯកអគ្គរដ្ឋទូតឥណ្ឌូនេស៊ីប្រចាំកម្ពុជា បានថ្លែងថា ការចាក់ឫសដោយការគោរពគ្នាទៅវិញទៅមក តម្លៃរួម និងការផ្លាស់ប្តូរវប្បធម៌គ្នារវាងប្រទេសទាំង២ គឺជាការជំរុញទំនាក់ទំនងទ្វេភាគីឲ្យរឹងមាំ។
លោក Santo Darmosumarto ថ្លែងបែបនេះ ក្នុងព្រឹត្តិការណ៍ នៃការសម្ដែងវប្បធម៌ Harmony in Motion ឆ្លុះបញ្ចាំងពីការកសាងមិត្តភាពរវាងកម្ពុជា និងឥណ្ឌូនេស៊ី តាមរយៈសិល្បៈ នាយប់ថ្ងៃទី៦ ខែធ្នូ ឆ្នាំ២០២៤ នៅសាលសន្និសីទចតុមុខរាជធានីភ្នំពេញ។
ការសម្ដែងរបាំបែបសិល្បៈវប្បធម៌នេះ ធ្វើឡើងក្នុងគោលបំណង ដើម្បីបង្ហាញពីភាពជិតស្និទ្ធរវាងប្រទេសឥណ្ឌូនេស៊ី និងកម្ពុជា ដែលមានទំនាក់ទំនងការទូតអស់រយៈពេល៦៥ឆ្នាំមកហើយ។
លោក Santo Darmosumarto បានថ្លែងបែបនេះថា «ការចាក់ឫសដោយការគោរពគ្នាទៅវិញទៅមក តម្លៃរួម និងការផ្លាស់ប្តូរវប្បធម៌គ្នារវាងប្រទេសទាំង២ គឺជាការជំរុញឲ្យទំនាក់ទំនងទ្វេរភាគីកាន់តែរឹងមាំ»។
លោកគូសបញ្ជាក់ថា តាមរយៈការផ្លាស់ប្តូរវប្បធម៌ដូចជា BSBI និងព្រឹត្តិការណ៍ដូចជាយប់នេះ កម្ពុជា និងឥណ្ឌូនេស៊ី នឹងបន្តកសាងស្ពាន នៃការយល់ដឹងរវាងប្រជាជាតិទាំងពីរ ដោយធានាថាមិត្តភាពរបស់ប្រទេសទាំងពីរស្ថិតស្ថេរសម្រាប់មនុស្សជំនាន់ក្រោយ។
លោកបានបន្តថា ភាពជាដៃគូនឹងបញ្ជាក់ឡើងវិញនូវការប្តេជ្ញាចិត្តរបស់ឥណ្ឌូនេស៊ី ចំពោះកិច្ចសហប្រតិបត្តិការវប្បធម៌ និងថ្លែងអំណរគុណចំពោះការគាំទ្រយ៉ាងពេញទំហឹងរបស់ក្រសួងវប្បធម៌ និងវិចិត្រសិល្បៈកម្ពុជា សម្រាប់ព្រឹត្តិការណ៍នេះ ដែលឆ្លុះបញ្ចាំងពីទំនាក់ទំនងជិតស្និទ្ធ និងមានអត្ថន័យរវាងប្រទេសទាំងពីរ លោកបន្ថែមថា សិល្បៈ និងវប្បធម៌គឺជាឧបករណ៍ដ៏មានអានុភាពក្នុងការតភ្ជាប់ និងបំផុសគំនិតប្រជាជាតិ៕
