(ស្ទឹងត្រែង)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានឧបត្ថម្ភគ្រឿងឧបភោគបរិភោគជូនដល់កងពលតូចអន្តរាគមន៍លេខ១២៨ នៃយោធភូមិភាគទី១។
គ្រឿងឧបភោគបរិភោគទាំងនេះ ត្រូវបាននាយឧត្តមសេនីយ៍ គឹម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី យកទៅប្រគល់ជូនដល់កងទ័ពកងពលតូចអន្តរាគមន៍លេខ១២៨ កាលពីថ្ងៃទី៥ ខែធ្នូ ឆ្នាំ២០២៤កន្លងទៅនេះ។
ក្នុងឱកាសនោះ នាយឧត្តមសេនីយ៍ គឹម ប៊ុនថាន បាននាំយកការផ្ដាំផ្ញើសួរសុខទុក្ខ និងក្តីនឹករលឹករបស់សម្តេចមហាបវរធិបតី និងលោកជំទាវបណ្ឌិត ជូនដល់កងទ័ពទាំងអស់នៃកងពលតូចអន្តរាគមន៍លេខ១២៨ផងដែរ។
កងពលតូចអន្តរាគមន៍លេខ១២៨ ជាកងពលមួយនៃយោធភូមិភាគទី១ ដែលឈរជើងការពារបូរណភាពទឹកដីនៅតាមព្រំដែនរវាងកម្ពុជា និងឡាវ មានឧត្ដមសេនីយ៍ទោ មៀច សាមុត ជាមេបញ្ជាការ។
ឧត្ដមសេនីយ៍ទោ មៀច សាមុត បានបញ្ជាក់ថា គ្រឿងឧបភោគ បរិភោគនេះ នឹងប្រើសម្រាប់ការងារមនុស្សធម៌ ជូនសមាគមអតីតយុទ្ធជន ប្រជាពលរដ្ឋ ឬគ្រួសារយោធិន ដែលមានការខ្វះខាត ឬជួបគ្រោះមហន្តរាយផ្សេងៗ។
ឧត្ដមសេនីយ៍ទោ មៀច សាមុត បានគោរពថ្លែងអំណរគុណយ៉ាងជ្រាលជ្រៅជូនចំពោះសម្តេចមហាបវរធិបតីនាយករដ្ឋមន្ត្រី និងលោកជំទាវបណ្ឌិត ដែលតែងតែយកចិត្តទុកដាក់ខ្ពស់ និងជាប់ជាប្រចាំសម្រាប់កងទ័ពឈរជើងការពារបូរណភាពទឹកដី ក៏ដូចជាសមាគមអតីតយុទ្ធជន ប្រជាពលរដ្ឋដែលមានជីវភាពខ្វះខាត ជនងាយរងគ្រោះ និងអ្នកទទួលរងគ្រោះដោយគ្រោះមហន្ដរាយផ្សេងៗ៕
