(កណ្ដាល​)៖ ​រឿង​សហាយ​ស្មន់​ឈាន​ដល់ ការ​​សម្លាប់​មនុស្ស​ច្រក​បាវ​ បណ្តែត​ទឹក​ទន្លេ​ នៅ​ស្រុក​ស្អាង​ រហូតមកទល់​ពេល​នេះ​ ជនល្មើស​ពីរ​នាក់​ ដែល​ជា​ប្តី​ប្រពន្ធ​នឹង​គ្នា​ត្រូវ​បាន ​តុលាការ​ផ្តន្ទា​ទោស​តាម​ច្បាប់​ហើយ​។

សាលា​ដំបូង​ខេត្ត​កណ្ដាល​ នៅព្រឹក​ថ្ងៃ​ទី​១២​ ខែ​តុលា​ បាន​ប្រកាស​សាលក្រម​ផ្តន្ទា​ទោស​ប្តី ​ដាក់​ពន្ធនាគារ​រយៈពេល​៣០ឆ្នាំ​ និង​ ប្រពន្ធ​ ដាក់​ពន្ធនាគារ​រយៈពេល​២០ឆ្នាំ​ ក្រោម​ការ​ចោទប្រកាន់​ពី​បទ​ឃាតកម្ម​គិត​ទុក​ជា​មុន​ តាម​មាត្រា​២០០ នៃ​ក្រម​ព្រហ្មទណ្ឌ​។

ហេតុ​ការណ៍​ឃាតកម្ម​ដ៏​ព្រៃផ្សៃ​នេះ​ កើត​ឡើង​​កាលពី​ថ្ងៃទី​២៣​ ខែ​មិថុនា​ ឆ្នាំ​២០១៦​ នៅចំណុច​ភូមិ​តានូ​ ឃុំ​ស្អាង​ភ្នំ​ ស្រុក​ស្អាង​ ខេត្ត​កណ្ដាល​  ។  

សមត្ថកិច្ច​ បញ្ជាក់​ថា​ ជនដៃដល់​ជា​ប្តី​មាន​ឈ្មោះ​ ខេម ខេង អាយុ២៩ឆ្នាំ​និង​ប្រពន្ធ​ ឈ្មោះចាប សុខជឿន អាយុ២៦ឆ្នាំ​ ត្រូវ​បាន​សមត្ថកិច្ច​ព្រហ្មទណ្ឌ​កម្រិត​ធ្ងន់ ​នៃ​ស្នងការដ្ឋាន​នគរបាល​ខេត្ត​កណ្ដាល​ ឃាត់​ខ្លួន​កាលពី​ថ្ងៃទី​៣​ ខែ​កក្កដា​ ឆ្នាំ​២០១៦​។

នៅ​ដំណាក់កាល​សមត្ថកិច្ច​ ឈ្មោះ​ ខេម​ ខេង​ បាន​សារភាព​ថា​ ខ្លួនពិតជាបានសម្លាប់ឈ្មោះ លៃ លីន ពិតប្រាកដមែនដោយមូលហេតុ ឈ្មោះ លៃ លីន លបលួច ទាក់ទងស្រឡាញ់ប្រពន្ធរបស់ខ្លួន ហើយខ្លួនក៍តាមទាន់ ពេលអ្នកទាំង​ពីរ​អោបថើបគ្នា។ បន្ទាប់មក​ខ្លួន​បានប្រាប់ប្រពន្ធឲ្យ​ទូរស័ព្ទ​ហៅឈ្មោះ លៃ លីន មកដើម្បីសម្លាប់។  

រហូត​ដល់​ថ្ងៃទី២៣ ខែមិថុនាឆ្នាំ២០១៦ ខ្លួនបានឲ្យប្រពន្ធ ណាត់​ឈ្មោះ លៃ លីន មកជួបនៅផ្ទះ ហើយខ្លួនបានរៀបចំចរន្តអគ្គិសនីដើម្បីត្រៀមឆក់ ពេលឈ្មោះ លៃ លីន មកដល់ផ្ទះខ្លួន ក៍យកប្រដាប់ឆក់ នោះឆក់ទៅលើ ឈ្មោះ លៃ លីន បណ្ដាលឲ្យសន្លប់ហើយ ក៍យកត្បូងចប វាយលើក្បាលបន្ថែមទៀត បន្ទាប់មកក៍យកថង់ផ្លា​ស្ទិក​ ច្រកក្បាល យកកៅស៊ូ រិតកង់ រិតកបន្ថែមកុំឲ្យចេញឈាម និងយកការ៉ុង មានថង់ផ្លាស្ទីចខាងក្នុងច្រកសសពសែង​ពីរ​នាក់ ប្ដី ប្រពន្ធ យកមកទម្លាក់ចោល នៅត្រពាំងតាណែម ដែលមានចម្ងាប្រហែល២០០ម៉ែត្រពីផ្ទះ រួចងូតទឹកចូលដេក។ ចំណែកចបកាប់ទុកក្នុងរោងគោ​និង​ខ្សែភ្លើង ដែក ដង​ឫស្សី​ ទុកនៅក្រោមគ្រែ ក្នុងផ្ទះ៕