(អូស្ដ្រាលី)៖ លោក Bruce Atkinson ប្រធានព្រឹទ្ធសភា ប្រចាំនៅរដ្ឋ Victoria បានសរសើរកម្ពុជាថា ជាប្រទេសដែលមានប្រវត្តិសាស្ត្រដ៏សម្បូរបែប និងមានវប្បធម៌ល្អអស្ចារ្យ ប៉ុន្តែលោកបញ្ជាក់ថា ថ្ងៃនេះ មានមនុស្សដែលនៅបន្តរិះគន់ រដ្ឋាភិបាលនៅក្នុងប្រទេសកម្ពុជា ហើយក្នុងនាមលោកជាអ្នកនយោបាយរបស់រដ្ឋ លោកមិនគាំទ្រខាងណានោះទេ ព្រោះកម្ពុជាមិនមែនជាប្រទេសរបស់លោក ហើយលោកមិនមានមតិយោបល់ អំពីកម្ពុជាឡើយ​។

ការលើកឡើង របស់លោក Bruce Atkinson ត្រូវបានធ្វើឡើង នៅពេលដែលលោកបាន ចូលរួមពិសារអាហារសាមគ្គីមហាគ្រួសារ ខ្មែរនៅទីក្រុង Melbourne ប្រទេសអូស្ត្រាលី កាលពីចុងសប្តាហ៍មុន គ្រាដែលប្រជាពលរដ្ឋខ្មែរជាង៦០០នាក់ បានជួបជុំគ្នា ស្វាគមន៍លោក ហ៊ុន ម៉ាណែត កូនប្រុសនាយករដ្ឋមន្ត្រីកម្ពុជា។

នៅក្នុងការលើកឡើងរបស់ លោក Bruce Atkinson ប្រមាណជាង១១នាទី ក្នុងឱកាសនោះ ត្រូវគេឃើញថា ពុំបានលើកឡើងដូចអ្វី ដែលវិទ្យុអាស៊ីសេរី ផ្សាយព័ត៌មានបំផ្លើសថា ការដែលលោក Bruce Atkinson ចូលរួមជាមួយលោក ហ៊ុន ម៉ាណែត នោះ គឺដើម្បីឆ្លៀតឱកាសបញ្ជូនសារ ទៅកាន់រដ្ឋាភិបាលក្រុងភ្នំពេញ ឲ្យគោរពសិទ្ធិមនុស្ស និងច្បាប់ទម្លាប់ ដែលការពិតលោក បានបញ្ជាក់ថា ប្រទេសកម្ពុជាបានចំណាយពេលដ៏យូរគួរសម ដើម្បីងើបផុតពីសម័យកាល ដ៏ខ្មៅងងឹតនោះ។

លោក បានបញ្ជាក់យ៉ាងដូច្នេះថា «ថ្មីៗនេះ ខ្ញុំបានធ្វើដំណើរទៅប្រទេស រ៉្វាន់ដា ហើយខ្ញុំភ្ញាក់ផ្អើល ចំពោះការផ្សះផ្សាជាតិនៅទីនោះ ២០ឆ្នាំក្រោយ ការដួលរលំ​នៃរបបប្រល័យពូជសាសន៍នៅប្រទេសនោះ ហើយថ្ងៃនេះ មានមនុស្សដែលនៅបន្តរិះគន់រដ្ឋាភិបាល នៅក្នុងប្រទេសកម្ពុជា ​ក្នុងនាមជាអ្នកនយោបាយរបស់រដ្ឋ ខ្ញុំមិនគាំទ្រខាងណានោះទេ។ កម្ពុជាមិនមែនជាប្រទេសរបស់ខ្ញុំ ដូច្នេះ​ខ្ញុំមិនមានមតិយោបល់អំពីកម្ពុជាទេ»។

សូមជម្រាបថា ដំណើរបេកកម្ម របស់លោកហ៊ុន ម៉ាណែត ទៅកាន់ប្រទេសអូស្ត្រាលីរយៈពេល៦ថ្ងៃមកនេះ គឺបាន​ទទួលការស្វាគមន៍ភ្លូកទឹក ភ្លូកដី ពិសេស គឺអាជ្ញាធរតាមតំបន់នីមួយៗ នៃប្រទេសអូស្ត្រាលី បានស្វាគមន៍ក្រុមការងារលោកហ៊ុន ម៉ាណែត ទាំងក្នុងពិធីពិសារអាហារសាមគ្គី ក៏ដូចជាជំនួបពិភាក្សា​ការងារ ផងដែរ ។

សូមបញ្ជាក់ថា លោក ហ៊ុន ម៉ាណែត និងក្រុមការងារយុវជន នឹងបំពេញទស្សនកិច្ចនៅក្រៅ ប្រទេសរយៈពេល១៣ថ្ងៃ ហើយដំណើរ ទស្សនកិច្ចនៅអូស្ត្រាលី និងប្រទេសនូវ៉ែលហ្សេឡង់ នាពេលនេះ គឺបន្ទាប់ពីដំណើរចុងក្រោយ ដែលបានធ្វើនៅ សហរដ្ឋអាមេរិក និងប្រទេសកាណាដា ដើម្បីការសាកសួរសុខទុក្ខប្រជាពលរដ្ឋខ្មែរ និងអ្នកគាំទ្រនៅក្រៅប្រទេស តាមការអញ្ជើញរបស់ប្រជាពលរដ្ឋខ្មែរ ដែលនៅក្រៅស្រុកទាំងនោះ។ ដំណើរទស្សនកិច្ចនៅអូស្ត្រាលី នឹងបញ្ចប់នៅថ្ងៃទី១៤ ខែតុលាខាងមុខនេះ ប៉ុន្ដែនឹងបន្តទៅកាន់ ប្រទេសនូវ៉ែលហ្សេឡង់ ថែមទៀត៕​