(ឧត្ដរមានជ័យ)៖ កម្លាំងនគរបាលស្រុកអន្លង់វែង នៅព្រឹកថ្ងៃទី១០ ខែតុលា ឆ្នាំ២០១៦នេះ បានឃាត់ខ្លួនជនសង្ស័យ២នាក់ប្ដីប្រពន្ធ តាមដីការរបស់សាលាដំបូងខេត្តឧត្តរមានជ័យ ដែលពាក់ព័ន្ធក្នុងករណីគ្រឿងញៀន។
មន្ដ្រីនគរបាល បានឲ្យដឹងថា ការឃាត់ខ្លួននេះ កម្លាំងជំនាញអនុវត្តដីកាបង្គាប់ឲ្យចាប់ខ្លួន លេខ០៥៥ ដបច/១៦ និងលេខ០៥៦ ដបច /១៦ ចុះថ្ងៃទី០៥ ខែតុលា ឆ្នាំ២០១៦ របស់ លោក អ៊ាក ផល្លា ចៅក្រមស៊ើសួរ នៃសាលាដំបូងខេត្តឧត្តរមានជ័យ។ មន្ដ្រីដដែល បញ្ជាក់ថា ជនសង្ស័យទាំង២ ទី១-ឈ្មោះជា ភឿន ហៅទីន អាយុ៣៩ឆ្នាំ ជាប្ដី មុខរបរយោធា ទី២-ឈ្មោះ ប៉ិច មុំ អាយុ៤៣ឆ្នាំ ជាប្រពន្ធ ដែលជនសង្ស័យទាំង២ ពាក់ព័ន្ធករណី ជួញដូរសារធាតុញៀន ប្រព្រឹត្តនៅភូមិអូរតាម៉ែង ឃុំអន្លង់វែង ស្រុកអន្លង់វែង កាលពីថ្ងៃទី១៩ ខែមិថុនា ឆ្នាំ២០១៦។
បច្ចុប្បន្នជនសង្ស័យត្រូវបានសមត្ថកិច្ច កំពុងរៀបចំសំណុំរឿង ដើម្បីបញ្ជូនចាត់ការបន្តតាមនិតិវិធី៕
