(ភ្នំពេញ)៖ លោកវរសេនីយ៍ឯក ហុង ពិសិដ្ឋ អធិការនគរបាលខណ្ឌកំបូល បានចាត់ឲ្យនគរបាលប៉ុស្តិ៍ទាំង៧ សហការជាមួយរដ្ឋបាលខណ្ឌកំបូល ចុះផ្សព្វផ្សាយអំពីផលប៉ះពាល់ដែលកើតចេញពីបទល្មើសផ្សេងៗ ក្នុងនោះមាន ការជួញដូរ ចែកចាយ និងប្រេីប្រាស់គ្រឿងញៀន ក្មេងទំនេីង ព្រមទាំងគោលនយោបាយភូមិ សង្កាត់ មានសុវត្ថិភាពជូនដល់សិស្សានុសិស្សនៅសាលាបឋមសិក្សា អនុវិទ្យាល័យ និងវិទ្យាល័យចំនួន៧ទីតាំង ទូទាំងខណ្ឌ។
យុទ្ធនាការផ្សព្វផ្សាយខាងលើនោះ បានធ្វើឡើងនៅថ្ងៃទី១ ខែវិច្ឆិកា ឆ្នាំ២០២៤ ចំថ្ងៃបើកបវេសនកាលឆ្នាំសិក្សាថ្មី ២០២៤-២០២៥តែម្ដង ដោយមានការចូលរួមពីសំណាក់លោកគ្រូ អ្នកគ្រូ និងសិស្សានុសិស្សទាំងពីរភេទសរុបចំនួន៦,២៩៥នាក់។ ក្នុងគោលបំណងឲ្យសិស្សានុស្សទាំងអស់ចៀសវាងឲ្យឆ្ងាយពីបទល្មើសទាំងអស់ខាងលើ ហើយខិតខំសិក្សារៀនសូត្រ ធ្វើយ៉ាងណាក្លាយជាកូនល្អ សិស្សល្អ សិស្សពូកែ ជាទំពាំងស្នងឫស្សីសម្រាប់សង្គមជាតិទៅថ្ងៃអនាគត។
ដោយអនុវត្តតាមការណែនាំពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កន្លងមកអធិការដ្ឋាននគរបាលខណ្ឌកំបូល ប៉ុស្តិ៍នគរបាលរដ្ឋបាលទាំង៧ បានចុះធ្វើការផ្សព្វផ្សាយនូវផលប៉ះពាល់ការជួញដូរ ចែកចាយ និងប្រេីប្រាស់គ្រឿងញៀន បញ្ហាក្មេងទំនេីង ព្រមទាំងគោលនយោបាយភូមិ សង្កាត់ មានសុវត្ថិភាព នៅតាមបណ្ដាភូមិ និងសាលារៀននានាជាប្រចាំ។
ដោយឡែកនៅថ្ងៃទី១ ខែវិច្ឆិកា ឆ្នាំ២០២៤នេះ ក្រោមកិច្ចសហការជាមួយរដ្ឋបាលខណ្ឌកំបូល ប៉ុស្តិ៍នគរបាលរដ្ឋបាលទាំង៧ បានចុះផ្សព្វផ្សាយនៅតាមសាលាបឋមសិក្សា អនុវិទ្យាល័យ និងវិទ្យាល័យចំនួន៧ទីតាំងដែលស្ថិតនៅក្នុងសង្កាត់ទាំង៧របស់រដ្ឋបាលខណ្ឌកំបូល៕
