(ភ្នំពេញ)៖ ក្រសួងវប្បធម៌ និងវិចិត្រសិល្បៈ បានជូនដំណឹងថា ព្រឹត្តិការណ៍វប្បធម៌តាមតំបន់ លើកទី២ ឆ្នាំ២០២៤ នឹងធ្វើឡើងចាប់ពីថ្ងៃទី២ ដល់ថ្ងៃទី៣ ខែវិច្ឆិកា ឆ្នាំ២០២៤ នៅវិទ្យាល័យទូកមាស ស្រុកបន្ទាយមាស ខេត្តកំពត ពីម៉ោង ៨ ព្រឹក ដល់ម៉ោង ១១ យប់។
បើតាមក្រសួងវប្បធម៌ ព្រឹត្តិការណ៍នេះ នឹងនាំមកនូវទស្សនីយភាព រួមមាន៖ គំនូរ ក្បាច់ខ្មែរ ការសម្តែងចាប៉ីដងវែង ល្ខោនបុរាណ និងសិល្បៈសហសម័យផងដែរ។ បន្ថែមពីនេះ មានការស្វែងយល់អំពី ស្មូន ក្អម ឆ្នាំង ការចូលរួមត្បាញកន្ទេលចចូត រួមទាំងមានកម្មវិធីយុវជនដាល់អំបុក ការសម្តែងសិល្បៈយីកេ ព្រមទាំងការសម្តែងសៀក របស់អង្គការហ្វាពន្លឺសិល្បៈទៀតផង។ មិនតែប៉ុណ្តោះ កម្មវិធីនឹងមានការកម្សាន្តដូចជា ការផាត់ពណ៌គំនូរ ល្បែងកម្សាន្តកុមារ សំណួរ-ចម្លើយល្បងប្រាជ្ញា ការទស្សនាស្តង់ផលិតផលផងដែរ។
ក្រសួងវប្បធម៌ បានអញ្ជើញមហាជន ចូលរួមគាំទ្រ ទស្សនាកម្សាន្តសិល្បៈទស្សនីយភាពចម្រុះ ដោយសេរី៕
