(កែប)៖ កម្លាំងជំនាញអាវុធហត្ថខេត្ត បានឃាត់ខ្លួនជនចែកចាយនិងប្រើប្រាស់ថ្នាំញៀនម្នាក់ និងថ្នាំ១កញ្ចប់តូច កាលពីវេលាម៉ោង១១៖៣០នាទី ថ្ងៃទី០៧ ខែតុលា ឆ្នាំ២០១៦ ស្ថិតក្នុងភូមិថ្មី សង្កាត់ព្រៃធំ ក្រុងកែប។
មន្ត្រីជំនាញអាវុធហត្ថ នៃមន្ទីរយុត្តិធម៌ខេត្តកែប បានប្រាប់ឲ្យដឹងថា កម្លាំងអាវុធហត្ថនៃបញ្ជាការដ្ឋានកងរាជអាវុធហត្ថខេត្ត បានចុះបង្ក្រាបករណីចរាចរ និងចែកចាយសាធាតុញៀននៅចំណុចក្នុងភូមិសាស្ត្រខាងលើ ឈានទៅឃាត់ខ្លួន ជនសង្ស័យបានម្នាក់ឈ្មោះ ង៉ែត ផុន ភេទប្រុស អាយុ១៩ឆ្នាំ មុខរបរជាងសំណង់ រស់នៅភូមិអូរក្រសារ សង្កាត់អូរក្រសារ ក្រុងកែប ខេត្តកែប។
ដកហូតបានវត្ថុតាងរួមមាន៖ ម្សៅពណ៌សថ្លា ០១កញ្ចប់តូច ម៉ូតូម៉ាក SUZUKI Next ០១ គ្រឿងពណ៌ស(គ្មានស្លាកលេខ) និងទូរស័ព្ទម៉ាក NEIN Phone ០១ គ្រឿង។
បច្ចុប្បន្នជនសង្ស័យ និងវត្ថុតាងឃាត់ទុកនៅទីបញ្ជាការដ្ឋានកងរាជអាវុធហត្ថខេត្តកែបដើម្បីកសាងណុំរឿង ចាត់ការតាមនីតិវិធីច្បាប់៕
