(សេអ៊ូល)៖ យោងតាមសេចក្តីរាយការណ៍មួយរបស់ កូរ៉េខាងជើង បានឲ្យដឹងនៅថ្ងៃសៅរ៍នេះថា យន្តហោះ B-1B របស់អាមេរិក ដែលមានសមត្ថភាពក្នុងការទម្លាក់គ្រាប់បែកនុយក្លេអ៊ែរ បានធ្វើការ ហោះហើរនៅក្បែរឧបទ្វីបកូរ៉េ សាជាថ្មីម្តងទៀត បន្ទាប់ពីបានបង្ហាញវត្តមានរបស់ខ្លួននៅលើដែនអាកាស របស់ប្រទេស កូរ៉េខាងត្បូង ចំនួនពីរលើករួចមកហើយនោះ។ នេះបើតាមការចេញផ្សាយដោយ ទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅមុននេះបន្តិច នាព្រឹកថ្ងៃសៅរ៍ ទី០៨ ខែតុលា ឆ្នាំ២០១៦។

ស្ថានីយវិទ្យុ Pyongyang Broadcasting របស់កូរ៉េខាងជើងបានធ្វើការផ្សព្វផ្សាយថា «ពួកចក្រពត្តិនិយម អាមេរិក បានចល័តយន្តហោះយុទ្ធសាស្រ្ត B-1B ដែលមានសមត្ថភាពទម្លាក់គ្រាប់បែក ពីមូលដ្ឋាន ទ័ពជើងអាកាស Andersen ស្ថិតនៅលើកោះហ្គាំ ទៅកាន់ដែនអាកាសក្បែរឧបទ្វីបកូរ៉េ នៅថ្ងៃសុក្រ ម្សិលមិញនេះ ដោយបាននាំយកមកជាមួយ នូវការគំរាមកំហែងផ្នែកយោធាផងដែរ»។

ស្ថានីយវិទ្យុដដែលបានបន្តថា «ទង្វើដ៏ឆោតល្ងង់របស់ពួកចក្រពត្តិនិយមអាមេរិក ក្នុងការព្យាយាម រៀបចំបើកការវាយប្រហារដោយអាវុធនុយក្លេអ៊ែរ មកលើកូរ៉េខាងជើង គឺបានឈានដល់ដំណាក់កាល ដែលមិនអាចមើលរំលងបានទៀតនោះឡើយ»។  ដោយឡែក កូរ៉េខាងត្បូងបានធ្វើការអះអាងដែលជា ការឆ្លើយតបទៅ នឹងសេចក្តីរាយការណ៍ខាងលើនេះថា ខ្លួនមិនបានទទួលព័ត៌មានណាមួយ ពីសម្ព័ន្ធមិត្តអាមេរិក អំពីការចល័តយន្តហោះទម្លាក់គ្រាប់បែក B-1B នេះឡើយ។   

គួរបញ្ជាក់ថា អាមេរិកបានធ្វើការហោះហើរជាផ្លូវការ នូវយន្តហោះទម្លាក់គ្រាប់បែកយុទ្ធសាស្រ្តរបស់ខ្លួន នៅលើទឹកដីកូរ៉េខាងត្បូង ចំនួនតែពីរលើកប៉ុណ្ណោះ កាលពីខែកញ្ញាកន្លងទៅនេះដើម្បីបង្ហាញពី កម្លាំងយោធា ក្នុងគោលបំណងបង្ហាញសាច់ដុំដាក់កូរ៉េខាងជើង បន្ទាប់ពីការធ្វើតេស្តនុយក្លេអ៊ែរ លើកទីប្រាំរបស់ប្រទេសកុម្មុយនិស្តមួយនេះ៕