(ភ្នំពេញ)៖ នៅថ្ងៃអាទិត្យ ទី០៩ ខែតុលា ឆ្នាំ២០១៦ខាងមុខនេះ ប្រិយមិត្តអ្នកគាំទ្រ កំពូលតារាភាពយន្តថៃ លោក James Jirayu និងកញ្ញា Bella Ranee បើទោះជាគ្មានសំបុត្រ VIP ក៏នៅតែអាចមានឱកាស ចូលរួមជួបដោយផ្ទាល់ ជាមួយតារាប្រុស-ស្រីទាំងពីរដួងខាងលើនេះបាន ដោយសេរីនៅផ្សារទំនើបអ៉ីអន ។
លោក James និងកញ្ញា Bella នឹងមកដល់ទឹកដីប្រទេសកម្ពុជា ដើម្បីជួបជាមួយប្រិយមិត្តរបស់ខ្លួន ក្នុងរយៈពេលពីរថ្ងៃទៀតប៉ុណ្ណោះ គឺនៅថ្ងៃទី៩ ខែតុលា ឆ្នាំ២០១៦ នៅឯផ្សារទំនើបអ៉ីអន ទីតាំង Daylight Plaza វេលាម៉ោង១២ និង៣០នាទីថ្ងៃត្រង់ រហូតដល់ម៉ោង៣រសៀល។ ដំណើរមកដល់របស់ពួកគេ គឺតបតាមការអញ្ជើញ របស់ស្ថានីយទូរទស្សន៍ភីអិនអិន ដើម្បីចូលរួមក្នុងកម្មវិធី «វេទិកាតារាថៃប្រចាំPNN 2016» ក្រោយពីមានការសំណូមពរយ៉ាងច្រើន ពីសំណាក់ប្រិយមិត្តកម្ពុជា មកកាន់ភីអិនអិន។
នៅមុនការមកដល់ របស់កំពូលតារាសម្តែង ប្រចាំទូរទស្សន៍ប៉ុស្តិ៍លេខបីថៃ លោក James Jirayu និងកញ្ញា Bella Ranee ក៏បានបង្ហាញពីក្តី រំភើបរបស់ខ្លួនជាខ្លាំង មុនជំនួបជាមួយប្រិយមិត្តកម្ពុជា តាមរយៈការផ្ញើរវីដេអូឃ្លីប របស់ពួកគេមកពីប្រទេសថៃ។ នៅក្នុងវីដេអូឃ្លីបរួមគ្នា អ្នកទាំងពីរបាននិយាយថា «សួស្តីអ្នកគាំទ្រទាំងអស់គ្នា នៅកម្ពុជា ពួកយើងនឹងទៅជួបអ្នក នៅកម្ពុជា នៅថ្ងៃទី៩ ខែតុលា ឆ្នាំ២០១៦ នេះហើយ។ ពួកយើងទន្ទឹងចាំជួបអ្នកទាំងអស់គ្នា! ជួបគ្នាក្នុងពេលឆាប់ៗនេះណា!»។
ជាមួយគ្នានេះ ភីអិនអិន ក៏បានរៀបចំកម្មវិធីផ្សងសំណាង មួយចំនួន ដើម្បីប្រិយមិត្តទទួលបានសំបុត្រ VIP ចូលរួមក្នុងកម្មវិធី «វេទិកាតារាថៃប្រចាំPNN 2016» ដែលបានធ្វើឡើងតាំងពី ខែកញ្ញា។ រហូតមកដល់ពេលនេះ ភីអិនអិន បានរកឃើញអ្នកឈ្នះ សំបុត្រ VIP រួចរាល់ហើយ។ ប្រិយមិត្តដែលឈ្នះ សំបុត្រVIP សូមទៅទទួលសំបុត្រ នៅអគារ LYP Group ដែលមានអាសយដ្ឋាន ផ្ទះលេខ៣៤៤ មហាវិថីម៉ៅសេទុង សង្កាត់ទួលស្វាយព្រៃទី១ ខណ្ឌចំការមន ចាប់ពីថ្ងៃទី៦ ដល់៨ តុលា ឆ្នាំ២០១៦ ដោយភ្ជាប់ជាមួយនូវប័ណ្ណសម្គាល់ខ្លួន និងលេខទូរស័ព្ទ។
យ៉ាងណាមិញ សម្រាប់មិត្តយុវវ័យ ឬសាធារណជន ដែលមានបំណងចូលរួមកម្មវិធី «វេទិកាតារាថៃប្រចាំPNN 2016» នៅថ្ងៃទី៩ ខែតុលា ខាងមុខនេះ សូមកុំបារម្ភ ឬក៏មានការអាក់អន់ស្រពន់ចិត្ត ត្បិតលោកអ្នកនៅតែ អាចចូលរួមជួបផ្ទាល់ ជាមួយកំពូលតារាភាពយន្តថៃ ទាំងពីរបានដោយសេរី នៅផ្សារទំនើបអ៉ីអន ទីតាំង Daylight Plaza ចាប់ពីវេលាម៉ោង១២ និង៣០ នាទីថ្ងៃត្រង់ ហើយក៏នឹងមានការផ្សាយផ្ទាល់ លើកញ្ចក់ទូរទស្សន៍ PNN ផងដែរ។
សូមបញ្ជាក់ថា កម្មវិធី «វេទិកាតារាថៃប្រចាំPNN 2016» បើកទូលាយទៅដល់សាធារណជន ក៏ដូចជាប្រិយមិត្តទាំងឡាយ ដែលស្រឡាញ់ និងគាំទ្រកំពូលតារាទាំងពីរដួងនេះ ដើម្បីចូលរួមលេងហ្គេមកំសាន្ត និងជួបផ្ទាល់ជាមួយពួកគេ។ ទស្សនាវីដេអូខ្លី របស់ពួកគេសូមចុច https://www.facebook.com/PNNDramaFanClub/videos/702868736536186/៕
