(ភ្នំពេញ)៖ ធនាគារឯកទេស «វីង ខេម​បូឌា» ដែលជាធនាគារ ផ្តល់សេវាផ្ទេរប្រាក់ល័តដំបូងគេ នៅក្នុងប្រទេសកម្ពុជា បានទទួលពានរង្វាន់ ជាធនាគារឯកទេសផ្នែក សេវាហិរញ្ញវត្ថុចល័ត ឈានមុខគេនៅកម្ពុជា ក្នុងឆ្នំា ២០១៦ ដែលផ្តល់ដោយស្ថាប័ន «Global Business Outlook»។

សេវាហិរញ្ញវត្ថុ បានជះឥទ្ធិពលខ្លំាងបំផុត នៅក្នុងការពង្រីកសក្តានុពល សេដ្ឋកិច្ចក្នុងប្រទេស​ ក៏ដូចជាការជួយកាត់បន្ថយ ភាពក្រីក្រតាមរយៈការជួយពង្រឹង សេដ្ឋកិច្ចផងដែរ។ ទន្ទឹមនឹងការឈរលើ ទស្សនៈវិស័យរបស់ខ្លួន «វីង» ទទួលបានស្នាដៃនេះ ក៏ដោយសារតែការផ្តល់ជូន នូវសេវាហិរញ្ញវត្ថុ ដែលមានតំលៃសមរម្យ ប្រកបដោយភាពងាយស្រួល និងមានសុវត្ថិភាព ជូនដល់ប្រជាជន មិនមានគណនីធនាគារ ដែលភាគច្រើនជាប្រជាជន រស់នៅតាមតំបន់ ដាច់ស្រ​យាល ដែលការច្រៀតចូល របស់វិស័យធនាគារ នៅតំបន់ទាំងនោះ នៅមានកម្រិតទាបនៅឡើយ។

រង្វាន់នេះ បានបង្ហាញថា «វីង» បានខិតខំយ៉ាងខ្លំាង ដើម្បីកសាង​មូលដ្ឋានគ្រឹះ ដ៏រឹងមំាក្នុងការ ជំរុញសេវាផ្ទេរប្រាក់ ទៅកាន់អ្នកដែលមាន​ ឬក៏គ្មានគណនីធនាគារ។ ជាមួយភ្នាក់ងារ «វីង» ជិត ៥០០០ កន្លែង នៅទូទាំង២៥ខេត្តក្រុង ប្រជាជនកម្ពុជាទំាងអស់ អាចបង់វិក្កយបត្រ ឬ​ទទួលប្រាក់ពីសាច់ញាត្តិ ដែលធ្វើការនៅទី​ក្រុង ឬក៏ ដាក់ប្រាក់​ចូ​លទៅក្នុងគណនី បានដោយងាយស្រួល។

«រង្វាន់ដែលយើងទទួលបាន នៅថ្ងៃនេះ  បង្ហាញថា វីង មិនត្រឹមតែជាធនាគារឈានមុខគេ ប៉ុណ្ណោះទេ ប៉ុន្តែថែមទំាងជាធនាគារឯកទេស ដែលមានទំនុកចិត្ត និងមានផ្តល់សេវាផ្ទេរ ប្រាក់ឈានមុខគេ នៅក្នុងប្រទេសផងដែរ។ លើសពីនេះទៅទៀត នេះគឺជាការឆ្លុះបញ្ចំាង ពីការប្តេជ្ញាចិត្ត ក្នុងការផ្តល់ជូនសេវាកម្ម ដែលមានភាពងាយស្រួល រហ័ស និងមានសុវត្ថិភាពបំផុត សម្រាប់ប្រជាជនកម្ពុជា»។ នេះបើយោងតាមប្រសាសន៍ របស់លោក ចូចូ ម៉ាឡូឡូស អគ្គនាយក នៃធនាគារឯកទេស វីង។

លោក​ បានបន្តទៀតថា «យើងមានគោលបំណង ក្នុងការផ្តល់ជូនអតិថិជន នូវបទពិសោធដ៏ល្អបំផុត នៅក្នុងវិស័យសេវាហិរញ្ញវត្ថុចល័ត ដូចជា ការផ្ទេរប្រាក់ បញ្ជូលលុយទូរស័ព្ទ បង់វិក្កយបត្រ និងសេវាទូទាត់ប្រាក់ តាមអនឡាញជាដើម។ ជាមួយគ្នានេះដែរ វីង មានគោលបំណង ក្នុងការរក្សាកិត្តិនាម ជាធនាគារឯកទេសផ្នែក​សេវាហិរញ្ញវត្ថុ ឈានមុខគេ និងល្អបំផុត លើវិស័យផ្ទេរប្រាក់ នៅក្នុងប្រទេសកម្ពុជា»។

គួរបញ្ជាក់ផងដែរថា «Global Business Outlook» គឺជាក្រុមហ៊ុន ដែលមានទីតំាងនៅចក្រភពអង់គ្លេស និងធ្វើការផ្តោត​ទៅលើវិស័យធនាគារ ក្រុមហ៊ុនធានារ៉ាប់រង និងឧស្សាហកម្មសំខាន់ៗ ផ្សេងៗទៀត៕