(ភ្នំពេញ)៖ ស្រាប្រភេទ Cognac (ស្រាគោញាក់) របស់ក្រុមហ៊ុន Martell Heritage មានឈ្មោះថា «Martell» បានបង្ហាញវត្តមានរបស់ខ្លួនហើយ នៅក្នុងទីផ្សារប្រទេសកម្ពុជា ដែលជាស្រាមានរសជាតិ ឈ្ងុយឆ្ងាញ់នាំចូលមក ពីប្រទេសបារាំង ​ជាប្រទេសផលិតស្រា ដ៏ល្បីល្បាញនៅលើពិភពលោក។

ស្រា Martell Noblige បានដាក់បង្ហាញខ្លួន នៅសណ្ឋាគារ សុខា​ភ្នំពេញ នាយប់ថ្ងៃទី ០៦ ខែតុលា ឆ្នាំ ២០១៦នេះ ក្រោមវត្តមានរបស់ លោក Jaques MENIER ​ជានាយក Martell Heritage ដ៏ល្បីល្បាញ និងមានការចូលរួម ពីសំណាក់អតិថិជន ក៏ដូចជាពាណិជ្ជករជាដៃគូជាច្រើន​នាក់ ដើម្បីស្តាប់ការណែនាំ ពីប្រភេទ​ស្រា Cognac ក៏ដូចជាជាភ្លក្ស នូវរសជាតិស្រាដ៏ល្អនេះ។

លោក Jaques MENIER ជានាយក Martell Heritage ថ្លែងប្រាប់ឲ្យ​​ដឹងថា ជាមួយមរតក នៃការផលិតស្រា Cognac ជាង៣០០ឆ្នាំ នៅប្រទេសបារាំង Martell House បានបង្កើតនូវស្រា Cognac ដ៏ប្រណិតឈានមុខគេ ដែលរសជាតិមានការទទួលស្គាល់ថា ល្អវិសេសមែន។ Martell Noblige បានបន្តផលិត​តាម​បែបប្រពៃណីដើម ដែលចំរាញ់ចេញពីផ្លែទំពាំងបាយជូរ ​ដាំនៅតំបន់ Cognac។

លោកបន្តថា ពេលយើងស្រង់ក្លិន រសជាតិដ៏ប្រហើរ​ ពីផ្លែឈើនៅជាប់នឹងច្រមុះរបស់យើង ជាមួយក្លិនឈើ។ Vanilla  រសជាតិផ្អែម​ពីផ្លែទំពាំងបាយជូរ និង​ក្លិនឈ្ងុយម៉្យាង បានប្រមូលផ្តុំគ្នា នៅក្នុងស្រានេះទាំងអស់។ Martell Noblige បានផ្តល់នូវរសជាតិពិសេស ដែលជាលទ្ធផល នៃការចំរាញ់ចំនួន២លើក។ ជាទូទៅស្រា Cognac មានរសជាតិងាយកត់សម្គាល់ ស្រួលទទួលទាន អាចពិសារលាយជាមួយទឹក ​ពិសារសុទ្ធ ឬ​លាយជាស្រាក្រឡុក​ក៏បាន។

លោក Jaques MENIER បញ្ជាក់ថា ពាក្យ Noblige ត្រូវបានបង្កើតឡើង ដោយ Martell  ជាការផ្សំពីភាសាបារាំង​ចំនួន២ពាក្យ «Noblesse Oblige» ដែលសំដៅ ទៅលើការទទួលខុសត្រូវ ប្រកបដោយកិត្យានុភាព និង​អនុភាពនៃវណ្ណៈអភិជន។ វាជាភាពចាំបាច់មួយ ដែលត្រកូលអភិជនបារាំង ត្រូវតែកំណត់នូវក្រមសីលធម៌ និង ធ្វើជាគំរូល្អ​ដល់អ្នកដទៃ។ Martell មានទស្សនៈនេះ តាំងពីដើម ហើយ​ឥឡូវនេះ ក៏ចង់រំឭក និងចែកចាយវាដល់សង្គមបច្ចុប្បន្ន តាមរយៈ Martell Noblige នេះ។

សូមបញ្ជាក់ថា សា្រ Martell Noblige ត្រូវបានច្រកដាក់ក្នុងដបថ្លាឆ្លុះ ហើយរចនាម៉ូត ចេញនូវរូបរាងប្លែក។ វាគឺជាស្រាដែលចំរាញ់ចេញ​យ៉ាងល្អ និង​ទាន់សម័យ។ ការរចនាទាំងអស់ វាបង្ហាញពីភាពអស្ចារ្យ ដែលផ្តល់ទំនុកចិត្តដល់អ្នកទទួលទាន ជាពិសេសសំរាប់ប្រទេសកម្ពុជា ដែលចង់សាកនូវអ្វីដែលថ្មី ហើយល្អ​ប្លែក៕