(ត្បូងឃ្មុំ)៖ រដ្ឋបាលខេត្តត្បូងឃ្មុំបានរៀបចំវគ្គបណ្ដុះបណ្ដាលស្ដីពីការរៀបចំ និងកសាងផែនការអភិវឌ្ឍន៍ រយៈពេល៥ឆ្នាំ (២០២៥-២០២៩) និងផ្សព្វផ្សាយសិក្ខាសាលា សមាហរណកម្មកម្មវិធីវិនិយោគស្រុក-ក្រុង ក្រោមអធិបតីភាពលោក ឡុង ធាម ប្រធានក្រុមប្រឹក្សាខេត្ត និងលោក ប៉ែន កុសល្យ អភិបាលខេត្តត្បូងឃ្មុំ នាថ្ងៃទី២២ ខែតុលា ឆ្នាំ២០២៤ នៅសាលាខេត្ត។
ក្នុងនោះមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត នាយក-នាយករង រដ្ឋបាល-ទីចាត់ការ និងមន្រ្តីជំនាញរដ្ឋបាលខេត្ត បណ្ដាមន្ទីរ-អង្គភាព ក្រុមប្រឹក្សានិងអភិបាល-ក្រុង ព្រមទាំងអ្នកពាក់ព័ន្ធ។
លោក ប៉ែន កុសល្យ បានគូសបញ្ជាក់ថា វគ្គបណ្ដុះបណ្ដាលនេះមានសារសំខាន់នឹងធ្វើឲ្យសិក្ខាកាមដែលបានចូលរួម ទទួលបានការយល់ដឹងពីការរៀបចំផែនការឡើង ស្របតាមសេចក្ដីណែនាំបច្ចេកទេសរបស់ថ្នាក់ជាតិ ដោយមានការចូលរួមក្នុងដំណើរការវិភាគស្ថានភាព សក្ដានុពល បញ្ហាប្រឈម និងតម្រូវការនានា ពីមន្ទីរ/អង្គភាព ទីចាត់ការចំណុះសាលាខេត្ដ ក្រុមប្រឹក្សា និងគណៈអភិបាលក្រុង-ស្រុក និងអ្នកពាក់ព័ន្ធនានា ដើម្បីរៀបចំផែនការអភិវឌ្ឍន៍រយៈពេល៥ឆ្នាំ របស់រដ្ឋបាលខេត្តត្បូងឃ្មុំឲ្យកាន់តែសុក្រឹត្យបន្ថែមទៀត។
លោក ប៉ែន កុសល្យ បន្តថា បន្ថែមលើនេះ នឹងធានាឲ្យមានគណនេយ្យភាពពិតប្រាកដជូនប្រជាពលរដ្ឋ ដែលបានលើកគម្រោងអភិវឌ្ឍន៍សម្រាប់ដោះស្រាយបញ្ហានានាដែលជួបប្រទះនូវមូលដ្ឋាន តាមរយៈការកសាងផែនការអភិវឌ្ឍ៥ឆ្នាំ ដើម្បីរួមចំណែកបំពេញគោលបំណងកាត់បន្ថយភាពក្រីក្ររបស់ប្រជាពលរដ្ឋ បានទាន់ពេលវេលា ស្របតាមផែនការយុទ្ធសាស្ត្របញ្ចកោណ ដំណាក់កាលទី១ ក្រោមការដឹកនាំដ៏ត្រឹមត្រូវ ឈ្លាសវៃ ប្រកបដោយថាមពលរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
លោកអភិបាលខេត្តបានណែនាំដល់សមាជិក-សមាជិកាទាំងអស់សូមយកចិត្តទុកដាក់ទៅលើការកសាងផែនការ ដោយស្មារតីទទួលខុសត្រូវខ្ពស់ជួយគាំទ្រជំរុញ និងលើកទឹកចិត្តដល់មន្ត្រីជំនាញ ដើម្បីឲ្យខ្លឹមសារ អត្ថន័យ អត្តរូប នៃការកសាងផែនការអភិវឌ្ឍន៍ ឆ្លើយតបទៅនឹងសេចក្តីត្រូវការកិច្ចអភិវឌ្ឍន៍មូលដ្ឋានរបស់ប្រជាពលរដ្ឋ។
លោក អេង ណារ៉េត ប្រធានមន្ទីរផែនការខេត្តត្បូងឃ្មុំ បានបញ្ជាក់ពីគោលបំណងនៃវគ្គបណ្ដុះបណ្ដាលនេះ គឺដើម្បីផ្ដល់ការណែនាំជាគោលនយោបាយសម្រាប់ធ្វើឱ្យប្រសើរឡើងនូវប្រព័ន្ធ និងកិច្ចដំណើការកសាងផែនការ ដែលមានស្វ័យភាពក្នុងការរៀបចំផែនការ ការត្រួតពិនិត្យ និងការកែលម្អប្រព័ន្ធ និងនីតិវិធីនៃការកសាងផែនការតាមចរឹកលក្ខណៈផ្សេងៗគ្នានៃប្រភេទរដ្ឋបាលថ្នាក់ក្រោមជាតិនីមួយៗ ព្រមទាំងផ្ដល់ការណែនាំអំពីយន្តការ និងការអភិវឌ្ឍសមត្ថភាពរបស់រដ្ឋបាលថ្នាក់ក្រោមជាតិក្នុងការរៀបចំកសាង និងអនុវត្តផែនការរបស់ខ្លួន៕
