(កំពង់ស្ពឺ)៖ នៅតាមមុខផ្សារ និងមុខរោងចក្រជាច្រើនកន្លែង តាមបណ្តោយផ្លូវជាតិលេខ៤ក្នុងភូមិសាស្ត្រខេត្តកំពង់ស្ពឺ កំពុងទទួលរងការបំផ្លាញបរិស្ថានយ៉ាងធ្ងន់ធ្ងរ ខណៈដែលសំរាមត្រូវ​បានគេបោះចោលពាសវាលពាសកាល។

ប្រជាពលរដ្ឋ បាននិយាយថា នៅតាមបណ្តាមុខរោងចក្រ គេមិនបានឃើញក្រុមហ៊ុន ឬរោងចក្រទាំងនោះ ដាក់ធុងសំរាមសម្រាប់បងប្អូនកម្មករ-កម្មារិនី សម្រាប់ចោលសំរាមនោះទេ គឺបណ្តែតបណ្តោយឲ្យមានការចោលសំរាមពាសវាលពាសកាល ក្នុងនោះគេបានសង្កេតឃើញមានសំរាមប្រភេទថង់ផ្លាស់ស្ទិច កំប៉ង់ជរ័ ចានបាយជ័រ។ល។ ដែលជារបស់មិនអាចរលាយភ្លាមៗ ជាហេតុធ្វើឲ្យបរិស្ថានកង្វក់យ៉ាងធ្ងន់ធ្ងរ។ ប្រជាពលរដ្ឋដែលរស់នៅក្បែរចំណុចរោងចក្រមួយចំនួនបានលើកឡើងថា សំរាមទាំងនោះ នៅពេលមានខ្យល់ភ្លៀងម្តងៗ វាបានហើរហុយប៉ាតណាប៉ាណី គួចពេញផ្លូវបាន​បង្កឲ្យ​បាត់បង់អនាម័យយ៉ាងខ្លាំង ហើយបានធ្វើឲ្យមានការរំខានដល់ការលក់ដូរចំណីអាហាថែមទៀតផង។ ប្រជាពលរដ្ឋបានបញ្ជាក់ថា «សំរាមទាំងនេះ គឺបណ្តាលមពីការចោល​របស់បង​ប្អូនជាកម្មករ-កម្មការរិនីរោងចក្រ ទាំងនោះ ដែលរាល់ម៉ោងចេញមកហូបអាហាពេលថ្ងៃត្រង់ ហើយខាងរោងចក្រមិនមានធុងសំរាមដាក់ឲ្យពួកគាត់សម្រាប់ចោលទេ ដោយក្នុងម្នាក់ចោល​សំរាមជាប្រភេទថង់ កែវ ចានជ័រ មិនក្រោមពី ៣ទៅ៤ ថង់ជាសំរាមឡើយ»។

បើតាមការលើកឡើងខាងលើ រោងចក្រនិមួយៗ ត្រូវគោរពច្បាប់ស្តីពីបរិស្ថាន ហើយកន្លងមកមន្រ្តីបរិស្ថាន ក៏បានធ្វើការអប់រំណែនាំដល់ រោងចក្រ សហគ្រាស ផ្សារ និងទីប្រជុំជននានាផងដែរ ហើយរាជរដ្ឋាភិបាលក៏ចេញនៅ អនុក្រឹត្យ (លេខ ១១៣ អនក្រ បក) ស្តីអំពីការគ្រប់គ្រងសំរាម សំណល់រឹងទីប្រជុំជនក្នុងនោះមាត្រា៤២ បានចែងថា «បុគ្គលដែលបោះចោលសំរាម សំណល់រឹងទីប្រជុំ​ជននៅលើទីសាធរណៈ តាមដងផ្លូវ ទីវាល ដីកម្មសិទ្ធិ ឬកន្លែងដែលរដ្ឋបាលរាជធានី ក្រុង ស្រុក ខណ្ឌបានហាមឃាត់ការបោះចោលសំរាម សំណល់រឹង ត្រូវទទួលការពិនយ័អន្តរការណ៍ជាប្រាក់ និងទណ្ឌ​កម្មដូចខាងក្រោម៖ ២ម៉ឺនរៀលចំពោះអ្នកទេសចរណ៍ ប្រមូលវិចខ្ចប់ដាក់ធុងសំរាមដែលអាជ្ញាធរកំណត់ផងដែរ, ៥ម៉ឺនរៀល ចំពោះអ្នកលក់ដូរតាមដងផ្លូវសាធារណៈ ប្រមូលវិចខ្ចប់​ដាក់ធុងសំរាមដែលអាជ្ញាធរកំណត់ផងដែរ, ១៥ម៉ឺនរៀល ចំពោះអ្នកលក់ដូរតាមផ្ទះ ភោជនីយដ្ឋាន ទីកំសាន្ត ប្រមូលវិចខ្ចប់ដាក់ធុងសំរាមដែលអាជ្ញាធរកំណត់ផងដែរ, ២០ម៉ឺនរៀលចំពោះទីផ្សារ អាជីវ​កម្ម សេវាកម្ម សិប្បកម្ម ហើយត្រូវទទួលខុសត្រូវប្រមូលសម្អាតដឹកចេញយកទៅទីលាន, ៤០ម៉ឺនរៀលជំពោះរោងចក្រ សហគ្រាស ក្រុមហ៊ុន ហើយត្រូវទទួលខុសត្រូវប្រមូល​សម្អាតដឹកចេញ​យកទៅទីលាន។ ការថែរក្សាបរិស្ថានត្រូវតែផ្តើមចេញពីយើងទាំងអស់គ្នា បរិស្ថានផ្តើមពីយើងបែបនេះ មានតែយើងជាមនុស្សណឹងហើយដែលត្រូវទទួលរងឥទ្ធិពលពីបញ្ហាបរិស្ថានវិញ ដូច្នេះយើងទាំងអស់គ្នាត្រូវថែរក្សាបរិស្ថានដើម្បីសុខភាពយើង៕