(ភ្នំពេញ)៖ «កុំបង្កាត់ភ្លើងជម្លោះ និងកុំចាក់សាំងលើភ្លើងជម្លោះ» នេះជាសាររបស់លោក កឹម សុខា ប្រធានស្តីទីគណបក្សសង្គ្រោះជាតិ ថ្លែងនៅក្នុងជំនួបសំណេះ សំណាលជាមួយ ថ្នាក់ដឹកនាំមូលដ្ឋានរាជធានីភ្នំពេញ នៅទីស្នាក់ការកណ្ដាលគណបក្សសង្គ្រោះជាតិ។ លោក កឹម សុខា បានលើកជាយោបល់ថា «ដើម្បីឲ្យខ្មែរ យើងបានសេចក្តីសុខ រស់នៅ​ដោយ​សុខដុមរមនា​ និងមានការរីកចម្រើនឋិតថេរ លុះត្រាតែ​យើង ​ឈប់យកខ្មែរគ្នាឯងធើ្វជាសត្រូវ ឈប់គុំគួនសងសឹកគ្នា និង កាត់បន្ថយជម្លោះឲ្យបានច្រើនជាទីបំផុត»។

លោក កឹម សុខា បានសរសេរនៅលើ Facebook របស់លោក នារសៀលថ្ងៃទី០៦ ខែតុលា​ ឆ្នាំ២០១៦នេះយ៉ាងដូច្នេះថា «កុំបង្កាត់ភ្លើងជម្លោះ និងកុំចាក់សាំងលើភ្លើងជម្លោះ» !​ យើងទាំងអស់គ្នា ត្រូវទទួលស្គាល់ការពិតថា៖ 

១៖ ខ្មែរយើងនៅតែមានបញ្ហាជាច្រើន ហើយឫសគល់នៃបញ្ហានោះគឺ​ យើងឈ្លោះគ្នា បែកបាក់គ្នា មិនចេះចប់ ឈ្លោះគ្នាគ្រប់ទិសទី ឈ្លោះមិនចេះខ្មាស់គេ។
២៖ ប្រជាពលរដ្ឋខ្មែរយើង ចង់បានសេចក្តីសុខ ប្រកបដោយយុត្តិធម៌ និងការរីកចម្រើន។
៣៖ កាលណាយើងជាអ្នកដឹកនាំ​នៅតែបន្ត​ឈ្លោះគ្នា ក្មេងៗជំនាន់ក្រោយនឹងនៅតែបន្ដយកទម្លាប់ឈ្លោះគ្នានេះតទៅ​ទៀត។ ដូច្នេះបើយើងនៅតែបន្ដឈ្លោះ បែកបាក់គ្នា ​ប្រទេសជាតិ និងប្រជាពលរដ្ឋខ្មែរយើងនឹងគ្មានថ្ងៃចៀសផុតពីរណបប្រទេសណាមួយ ឬ ឲ្យផលប្រយោជន៍ទៅប្រទសណាមួយនោះទេ។

ជាយោបល់ខ្ញុំ ដើម្បីឲ្យខ្មែរយើងបានសេចក្តីសុខ រស់នៅ​ដោយ​សុខដុមរមនា​ និងមានការរីកចម្រើនឋិតថេរ លុះត្រាតែ​យើង ​ឈប់យកខ្មែរគ្នាឯងធើ្វជាសត្រូវ ឈប់គុំគួនសងសឹកគ្នា និងកាត់បន្ថយជម្លោះឲ្យបានច្រើនជាទីបំផុត។

ថ្លែងនៅក្នុងជំនួបសំណេះសំណាលជាមួយ ថ្នាក់ដឹកនាំមូលដ្ឋានរាជធានីភ្នំពេញ នៅទីស្នាក់ការកណ្ដាលគណបក្សសង្គ្រោះជាតិ៕