(កំពង់ធំ)៖ នៅលើផ្លូវលំក្រាលកៅស៊ូលេខ២៧១៨ នៅត្រង់ចំណុចភូមិយាយទៀង ឃុំបល្ល័ង្ក ស្រុកបារាយណ៍ នៅថ្ងៃទី០៨ ខែតុលា ឆ្នាំ២០២៤ មានគ្រោះថ្នាក់ចរាចរណ៍ កើតឡើង១ករណី ក្នុងដំណើរច្រាសទិសគ្នា ពីកើតទៅលិច បណ្តាលឲ្យស្រ្តីម្នាក់ស្លាប់ និងរបួសធ្ងន់ស្រាល២នាក់ ព្រមទាំងខូចខាត ម៉ូតូ១គ្រឿង និងរថយន្ត១គ្រឿង។
តាមរបាយការណ៍របស់សមត្ថកិច្ចមូលដ្ឋាន ដែលបណ្ដាញព័ត៌មាន Fresh News ទទួលបាននៅថ្ងៃទី០៨ ខែតុលានេះ បានឲ្យដឹងថា រថយន្តម៉ាក CAMRY បាឡែន ពណ៌ខ្មៅ ពាក់ផ្លាកលេខភ្នំពេញ2I-7098 អ្នកបើកបរមិនស្គាល់ អត្តសញ្ញាណរត់គេចខ្លួន បាត់បន្សល់ទុករថយន្តនៅកន្លែងកើតហេតុ បើកពីកើតទៅលិច។
ដោយឡែក ម៉ូតូម៉ាកហង់ដាឌ្រីម០១៩ ពណ៌ខ្មៅ ពាក់ផ្លាកលេខកំពង់ធំ1M-3564 បើកបរដោយឈ្មោះ យ៉ោក វណ្ណនី ភេទស្រីអាយុ ៣៧ឆ្នាំ រស់នៅភូមិបឹង ឃុំចើងដើង ស្រុកបារាយណ៍ ខេត្តកំពង់ធំ បើកពីលិចទៅកើត (ស្លាប់ភ្លាមៗនៅកន្លែងកើតហេតុ) ពាក់មួកសុវត្ថិភាព។
អ្នករួមដំណើរទី១៖ ឈ្មោះ គុណ ស៊ីណែត ភេទប្រុស អាយុ១៥ឆ្នាំ ត្រូវជាកូនអ្នកបើកបរ (របួសស្រាល) ពាក់មួកសុវត្ថិភាព និងអ្នករួមដំណើរទី២៖ ឈ្មោះ គុណ ឧត្តម ភេទប្រុស អាយុ៨ឆ្នាំ ត្រូវជាកូនអ្នកបើកបរ (របួសធ្ងន់) ពាក់មួកសុវត្ថិភាព។
បច្ចុប្បុន្ន សមត្ថកិច្ចបានប្រមូលវត្ថុតាង យកមករក្សាទុកនៅអធិការដ្ឋាន នគរបាលស្រុកបារាយណ៍ ខេត្ដកំពង់ធំ៕
