(បន្ទាយមានជ័យ)៖ រដ្ឋបាលខេត្តបន្ទាយមានជ័យ នៅព្រឹកថ្ងៃទី០៧ ខែតុលា ឆ្នាំ២០២៤នេះ បានទទួលរៀបចំកិច្ចប្រជុំស្តីពីការត្រៀមប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ នៅថ្ងៃទី៨-៩ ខែតុលា ឆ្នាំ២០២៤។

កិច្ចប្រជុំនេះ មានការចូលរួមពី លោក កុលផេង វឌ្ឍនា ប្រធានគណគណៈមេប្រយោគទូទាំងប្រទេស ប្រចាំខេត្តបន្ទាយមានជ័យ, លោក យឹម សំណាង អភិបាលរងខេត្ត, លោក ច័ន្ទម៉ារា ដូណា ប្រធានក្រុមការងារអង្គភាពប្រឆាំងអំពើពុករលួយខេត្តបន្ទាយមានជ័យ,​លោក ស្រេង សុផល អភិបាលក្រុងសិរីសោភ័ណ, លោក ឈូ ប៊ុនរឿង ប្រធានមន្ទីរអប់រំ យុវជន និងកីឡា ខេត្តបន្ទាយមានជ័យ និងអ្នកពាក់ព័ន្ធជាច្រើនរូបទៀត។

លោក​ ឈូ ប៊ុនរឿង បានឲ្យដឹងថា ការប្រឡងសញ្ញបត្រមធ្យមសិក្សាទុតិយភូមិឆ្នាំសិក្សា២០២៤-២០២៥នេះ ខេត្តបន្ទាយមានជ័យ មានសិស្សចូលប្រឡងចំនួន៦,២៣៥នាក់ ស្រីមានចំនួន៣,៥៦៩នាក់។ ក្នុងនោះ មានមណ្ឌលប្រឡងចំនួន៨ រួមមាន៖ មណ្ឌលបឋមសិក្សា ហ៊ុន សែន សុភី,​ មណ្ឌលវិទ្យាល័យ ហ៊ុន សែន ខ្លាកូន, មណ្ឌលសាកលវិទ្យាល័យមានជ័យ, មណ្ឌលវិទ្យាល័យសិរីសោភ័ណ, មណ្ឌលវិទ្យាល័យសម្ដេចឪ, មណ្ឌលសាកលវិទ្យាល័យគ្រប់គ្រង UME, មណ្ឌលវិទ្យាល័យអូអំបិល និងមណ្ឌលអនុវិទ្យាល័យទឹកថ្លា។

ជាមួយគ្នានេះ លោក កុលផេង វឌ្ឍនា បានលើកទឹកចិត្តដល់បេក្ខជនទាំងអស់ ត្រូវខិតខំប្រឹងប្រែង ហើយក្នុងករណីមិនទទួលបានជោគជ័យ កុំអស់សង្ឃឹម ពោលខិតខំតស៊ូរៀនសូត្រឡើងវិញ ដើម្បីប្រឡងជាប់នៅឆ្នាំក្រោយ ឬអាចចូលរៀនតាមសាលាបណ្តុះបណ្តាលវិជ្ជាជីវ: រៀននៅថ្នាក់បរិញ្ញាប័ត្ររងបានដែរ។

លោក ស្រេង សុផល ក៏បានជូនដំណឹងដល់ម្ចាស់ ប្រកបអាជីវកម្មដ្ឋាន ដូចជាថតចម្លងទាំងអស់ ក្នុងក្រុងសិរីសោភ័ណ ត្រូវផ្អាកដំណើរការរយៈពេល៣ថ្ងៃចាប់ពីថ្ងៃទី៧ ដល់ថ្ងៃទី៩ ខែតុលា ឆ្នាំ២០២៤ ដើម្បីការពារសណ្ដាប់ធ្នាប់តាមដងផ្លូវ និងមណ្ឌលប្រឡង។ សមត្ថកិច្ចជំនាញអាជ្ញាធរមូលដ្ឋាន កងកម្លាំងមានសមត្ថកិច្ច ត្រូវសហការគ្នាជួយតាមដាន ត្រួតពិនិត្យការពារសណ្ដាប់ធ្នាប់ និងអនុវត្តទៅតាមច្បាប់ដែលពាក់ព័ន្ធជាធរមានផងដែរ៕