(ម៉ុងត្រេអាល់, កាណាដា)៖ ក្នុងដំណើរស្វះស្វែងកៀរគរអ្នកវិនិយោគនៅប្រទេសកាណាដា លោកឧបនាយករដ្ឋ​មន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានឆ្លៀតជួបសំណេះសំណាលសួរសុខ​ទុក្ខ​ប្រជា​ពលរដ្ឋខ្មែរ រស់នៅក្រុងម៉ុងត្រេអាល់ ខេត្តកេបិច មុនគណៈប្រតិភូធ្វើដំណើរចេញពីក្រុង​ម៉ុង​ត្រេអាល់ ខេត្តកេបិច ប្រទេសកាណាដា ត្រឡប់ទៅកាន់សហរដ្ឋអាម៉េរិកវិញ។

ជំនួបធ្វើឡើងនាថ្ងៃសុក្រ ទី២៧ ខែកញ្ញា ឆ្នាំ២០២៤នោះ ពលរដ្ឋខ្មែររស់នៅក្រុងម៉ុងត្រេអាល់ បានទទួលស្វាគមន៍​យ៉ាងកក់ក្ដៅចំពោះឧបនាយករដ្ឋមន្ត្រី ពិសេសបានថ្លែងអំណរគុណចំពោះកិច្ចខិតខំប្រឹងប្រែងរបស់​គណៈប្រតិភូ​ក្នុងការទាក់ទាញ និងជំរុញវិនិយោគពីកាណាដាទៅកម្ពុជាបានកាន់តែច្រើន ដើម្បីបង្កើតការងារជូន​ប្រជាពលរដ្ឋ​ខ្មែរ និងជំរុញកំណើនសេដ្ឋកិច្ចជាតិ។

លោកឧបនាយករដ្ឋមន្ត្រី ស៊ុន ចាន់ថុល បានសម្តែងក្តីនឹករលឹក និងរីករាយ បានជួយសំណេះសំណាល និងអាហារសាមគ្គីជាមួយប្រជាពលរដ្ឋនៅក្រុងម៉ុងត្រេអាល់។ លោកឧបនាយករដ្ឋមន្ត្រី បានជម្រាបជូនអំពីកិច្ចខិតខំប្រឹងប្រែង​របស់រាជរដ្ឋាភិបាលក្នុងបន្តកសាងហេដ្ឋារចនាសម្ព័ន្ធទាំងផ្នែករឹង និងទន់ពាសពេញផ្ទៃប្រទេស ក៏ដូចជាហេដ្ឋារចនាសម្ព័ន្ធតាមបណ្តោយព្រំដែនជាដើម។

បន្ថែមពីលើនោះ លោកឧបនាយករដ្ឋមន្ត្រី បានបន្តអំពាវនាវឱ្យពលរដ្ឋខ្មែរទាំងអស់សហការគ្នាផ្សព្វផ្សាយសមិទ្ធផលដែលកម្ពុជាសម្រេចបាននាពេលកន្លងមកនេះក្រោមការដឹកនាំរបស់សម្ដេចអគ្គមហាសេនាបតីតេជោអតីតនាយករដ្ឋមន្ត្រី និងសម្ដេចមហាបវរធិបតីនាយករដ្ឋមន្ត្រីនាពេលបច្ចុប្បន្ន។

ពលរដ្ឋខ្មែរដែលបានចូលរួមទាំងអស់បានបង្ហាញភាពសប្បាយរីករាយចំពោះភាពរីកចម្រើនលូតលាស់នៃសង្គមជាតិកម្ពុជា ក្រោយពីបានស្ដាប់ប្រសាសន៍របស់លោកឧបនាយករដ្ឋមន្រ្តីដោយផ្ទាល់ ពិសេសជាងនេះពលរដ្ឋខ្មែរបានជូនពរឱ្យដំណើរបេសកកម្មរយៈពេលប្រមាណ ២សប្ដាហ៍នេះទទួលបានលទ្ធផលជោគជ័យ៕