(ភ្នំពេញ)៖ លោក ម៉ម​ ប៊ុនហេង រដ្ឋមន្ដ្រីក្រសួងសុខាភិបាល បានប្រកាសបដិសេធចោលទាំងស្រុង ជុំវិញព័ត៌មានរបស់ស្ថានទូត អាមេរិក ប្រចាំនៅកម្ពុជា ដែលបានផ្សាយថា កម្ពុជាកំពុងមានជំងឺ «Zika» ខណៈដែលក្រសួងសុខាភិបាល និងស្ថាប័នពាក់ព័ន្ធ បាននឹងកំពុងយកចិត្តទុកដាក់ជាទីបំផុត។

លោករដ្ឋមន្ដ្រី បានបញ្ជាក់ប្រាប់ អង្គភាព Fresh News នៅយប់ថ្ងៃទី០៣ ខែតុលា ឆ្នាំ២០១៦នេះ ​យ៉ាងដូច្នេះថា «ខ្ញុំសូមបដិសេធចោលទាំងស្រុង​ ​ហើយកម្ពុជាគ្មានជំងឺ Zika ដូចការចោទប្រកាន់របស់ស្ថានទូតអាមេរិកនោះទេ ​ចាប់តាំងពីឆ្នាំ២០១០មក ប្រទេសកម្ពុជាពុំទាន់រកឃើញករណី​​ Zikaទេ។ បច្ចុប្បន្ននេះបញ្ហាជំងឺ Zika ក្រសួងសុខាភិបាល និងស្ថាប័នពាក់ព័ន្ធ បាននឹងកំពុងយកចិត្តទុកដាក់ជាទីបំផុត និងតម្លាភាព ហើយពេលនេះ កម្ពុជាបានសហការគ្នាជាមួយ អង្គការសុខភាពពិភពលោក និងវិទ្យាស្ថានជាតិប៉ាស្ទ័រ ដើម្បីទប់ស្កាត់ជំងឺនេះ ដាច់ខាតមិនឲ្យចូលកម្ពុជា»។

​សូមបញ្ជាក់ថា ការប្រកាសបដិសេធរបស់លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល ត្រូវបានធ្វើឡើងភ្លាមៗ បន្ទាប់ពីលោក ទទួលព័ត៌មានថា ស្ថានទូតអាមេរិក នៅទីក្រុងភ្នំពេញ បានចេញផ្សាយព័ត៌មានស្តីពីជំងឺ Zika នៅកម្ពុជា, ដោយបានលើកឡើងថា «ជំងឺ Zika កំពុងកើតមាននៅតាមតំបន់ខ្លះ នៃប្រទេសកម្ពុជា ហើយគេមិនដឹងថា អ្នកធ្វើដំណើរប្រឈមនឹងជំងឺនេះប៉ុនណាទេ។ ដូច្នេះនារីដែលមានផ្ទៃពោះ ឬគ្រោងនឹងមានផ្ទៃពោះ គួរតែពិភាក្សាពីគំរោងធ្វើដំណើរជាមួយវេជ្ជបណ្ឌិត ហើយគួរពិចារណាផ្អាកការធ្វើដំណើរណាដែលមិនចាំបាច់មកប្រទេសកម្ពុជា»៕