(កំពង់ស្ពឺ)៖ ដូចអ្វីដែលក្រសួងធនធានទឹក និងឧតុនិយម បានជូនដំណឹង និងអំពាវនាវឲ្យមានការប្រុងប្រយ័ត្ននាសប្តាហ៍កន្លងទៅ ពេលនេះជំនន់ទឹកភ្លៀង បាន និងកំពុងគម្រាមកំហែង​ភាគខាងជើង ខេត្តកំពង់ស្ពឺ នេះបើយោងតាមលោក ចាន់ យុត្ថា អ្នកនាំពាក្យក្រសួងធនធានទឹក បានថ្លែងប្រាប់អង្គភាព Fresh News នៅល្ងាចថ្ងៃទី០៣ ខែតុលានេះ។

ជំនន់នៅពេលនេះកើតឡើងដោយសារភ្លៀងធ្លាក់ខ្លាំងៗជាបន្តបន្ទាប់ជាប់ៗគ្នា នៅជួរភ្នំឱរ៉ាល់ ស្រុកឧដុង្គ ថ្ពង សំរោងទង និងក្រុងច្បារមន។ ជំនន់ទឹកភ្លៀងបាន​ធ្វើឲ្យលិច​ភូមិឋាន ហេដ្ឋារចនាសម្ព័ន្ធ និងស្រែរបស់បងប្អូនប្រជាកសិករមួយចំនួន នៅភាគខាងជើង ខេត្តកំពង់ស្ពឺ ក្នុងភូមិសាស្ត្រ ស្រុកឧដុង្គ និងស្រុកថ្ពង ហើយទឹកនឹងបន្តហូរចុះមកតំបន់ទំនាប និងបង្កឲ្យមានការជន់លិចនៅតំបន់​មួយចំនួនទៀត។

លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានប្រាប់អង្គភាពព័ត៌មាន Fresh News នៅមុននេះបន្តិចយ៉ាងដូច្នេះថា «ឯកឧត្តម លឹម គានហោ កំពុងដឹកនាំបញ្ជាលើការ​រំដោះទឹកជំនន់នេះដោយផ្ទាល់ ដោយបង្វែរទឹកជំនន់នេះ តាមប្រឡាយមេរលាំងជ្រៃខាងជើង មកកាន់អូរក្រាំងអំបិល រួចបន្តបង្ហូរតាមប្រឡាយមេតាហោ ទម្លាក់ចូលទៅស្ទឹងព្រែកត្នោត ក្នុងភូមិសាស្ត្រខេត្តកណ្តាល។ ទន្ទឹមនឹងវិធានការនេះ ក្រុមគ្រឿងចក្រធុនធ្ងន់ ក៏បានរៀបចំបញ្ជូនទៅ កាន់តំបន់មានជំនន់ ដើម្បីត្រៀមលក្ខណ:កាយបើកផ្លូវទឹកបន្ថែម ក្នុងករណីចាំបាច់»