(ពោធិ៍សាត់)៖ នាព្រឹកថ្ងៃទី២៤ ខែកញ្ញា ឆ្នាំ២០២៤ លោកជំទាវ ម៉ុក ប៉ូប៉ុនរិទ្ធ ពេជសោភ័ន ត្រូវជាមាតាបង្កើតលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងក្រុមគ្រួសារ បានអញ្ជើញចូលរួមក្នុងពិធីបុណ្យកាន់បិណ្ឌវេនទី៧ នៅវត្តនទីសេដ្ឋា (ហៅវត្តបន្ទាយយួន) ស្ថិតក្នុងភូមិបឹងចក ឃុំស្យា ស្រុកណ្តៀង ខេត្តពោធិ៍សាត់ ដែលជាវត្តក្រុមគ្រួសារលោកជំទាវ បានបាត់បង់អាយុជីវិតយ៉ាងអយុត្តិធម៌ ក្នុងរបបប្រល័យពូជសាសន៍ប៉ុលពត។
ក្នុងឱកាសនោះ ក៏បានការទទួលស្វាគមន៍ ពីសំណាក់ លោក ខូយ រីដា អភិបាលនៃគណៈអភិបាលខេត្តពោធិ៍សាត់ និងលោកស្រី អាំង សុជាតា ខូយរីដា ប្រធានកិត្តិយស សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត។
នាឱកាសនៃពិធីបុណ្យប្រពៃណីជាតិ ដែលប្រជាពុទ្ធបរិស័ទខ្មែរគ្រប់ស្រទាប់វណ្ណៈ ទូទាំងព្រះរាជាណាចក្រកម្ពុជា មានសេចក្តីអំណរសាទរយ៉ាងក្លៀវក្លា និងរួមសាមគ្គីគ្នាធ្វើបុណ្យធ្វើទាន ដោយសេចក្តីជ្រះថ្លា នៅក្នុងរដូវកាលបុណ្យកាន់បិណ្ឌ-ភ្ជុំបិណ្ឌ នៅតាមទីអារាមនានាដែលជាទីសក្ការៈ។
ជាក់ស្តែងក្នុងឱកាសបិណ្ឌទី៧នេះ លោកជំទាវ ម៉ុក ប៉ូប៉ុនរិទ្ធ ពេជសោភ័ន ត្រូវជាមាតាបង្កើតលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងក្រុមគ្រួសារ បានអញ្ជើញបូជាទៀនធូបគន្ធពិដោ ថ្វាយចំពោះព្រះពុទ្ធបដិមា នៅលើឧបដ្ឋានសាលា និងប្រារព្ធពិធីសូត្រមន្ត សមាទានសីល តាមសិក្ខាបទ ដើម្បីរំលឹកនឹកដល់គុណបុណ្យព្រះរតនត្រ័យ និងព្រះសម្មាសម្ពុទ្ធ ព្រះបរមគ្រូនៃយើង។
បន្ទាប់អំពីបទនមស្សការសមាទានសីលចប់សព្វគ្រប់ លោកជំទាវ ម៉ុក ប៉ូប៉ុនរិទ្ធ ពេជសោភ័ន និងក្រុមគ្រួសារ បានឧទ្ទិសកុសលផលបុណ្យជូនវិញ្ញាណក្ខន្ធ បុព្វការីជន លោកយាយ លោកតា ដែលបានចែកឋាន ទៅកាន់បរលោកខាងមុខ ក្នុងនោះមានវិញ្ញាណក្ខន្ធសាច់ញ្ញាតិ លោកឪពុក អ្នកម្តាយទាំងសង្ខាង រួមទាំងញ្ញាតិកាទាំង៧សណ្តាន ដែលបានចែកឋានទៅកាន់វរៈលោកខាងមុខហើយនោះ សូមវិញ្ញាណក្ខន្ធ អ្នកមានគុណទាំងអស់ បានសោយសុខក្នុងឋានដ៏ខ្ពង់ខ្ពស់ និងសុគតិភព កុំបីឃ្លាងឃ្លាតឡើយ។
មួយផ្នែកនៃកុសល ផលបុណ្យ ដែលកើតមានក្នុងថ្ងៃនេះលោកជំទាវ ម៉ុក ប៉ូប៉ុនរិទ្ធ ពេជសោភ័ន និងក្រុមគ្រួសារសូមឧទ្ទិសជូន វិញ្ញាណក្ខន្ធ វីរជនអ្នកស្នេហាជាតិ ដែលបានពលីជីវិត ក្នុងបុព្វហេតុជាតិមាតុភូមិ ព្រមទាំងវិញ្ញាណក្ខន្ធ ជនរួមជាតិខ្មែរស្លូតត្រង់ ជាង៣លាននាក់ ដែលបានបាត់បង់អាយុជីវិតយ៉ាងអយុត្តិធម៌ ក្នុងរបបប្រល័យពូជសាសន៍ប៉ុលពត សូមឱ្យវិញ្ញាណក្ខន្ធ អ្នកទាំងអស់នោះបានសោយសុខ ក្នុងឋានសុគតិភពគ្រប់ៗគ្នា។
សូមបញ្ជាក់ថា ក្នុងឱកាសបុណ្យកាន់បិណ្ឌវេនទី៧ នៅវត្តនទីសេដ្ឋា (ហៅវត្តបន្ទាយយួន)នេះដែរ លោកជំទាវ ម៉ុក ប៉ូប៉ុនរិទ្ធ ពេជសោភ័ន ត្រូវជាមាតាបង្កើតលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងក្រុមគ្រួសារ បាននាំយកទេយ្យទានប្រគេនព្រះសង្ឃ និងចែកទានដល់លោកតា លោកយាយ ពុទ្ធបរិស័ទ និងក្មួយៗតូចៗផងដែរ៕
