(សាន់ហ្រា្វន់ស៊ីស្កូ)៖ ក្រុមហ៊ុន Facebook Inc នៅថ្ងៃចន្ទនេះ​ បាន ផ្ដើមដាក់ឱ្យប្រើប្រាស់នូវ កំណែទម្រង់​Version ទាបថ្មីមួយរបស់​កម្មវិធី Messenger ក្នុងគោលបំណងពង្រីកទីផ្សារ នៅលើឆាកអន្តរជាតិ។ នេះបើតាមឱ្យដឹងពីនាយក Messenger ​លោក David Marcus ដកស្រង់ដោយសារព័ត៌មាន Channel News Asia ​នៅរសៀលថ្ងៃចន្ទ ទី០៣ ខែតុលា ឆ្នាំ២០១៦។

កម្មវិធី Messenger Lite​ ដែលប្រើប្រាស់ទិន្នន័យ Internet​ តិចតួចត្រូវបានរចនាឡើងសម្រាប់ បំពេញតម្រូវការប្រើប្រាស់នៅតាមតំបន់ឬ បណ្ដាប្រទេសមាន Internet ដើរយឺត ជាឧទាហរណ៍ កម្មវិធីថ្មីនេះនឹងត្រូវដំណើរការ នៅក្នុងប្រទេសមួយចំនួនដូចជា កេនយ៉ា ទុយនីស៊ី ម៉ាឡេស៊ី ស្រីលង្កា វេណេស៊ុយអេឡា និង បណ្ដាប្រទេសជាច្រើនផ្សេងទៀតនៅពេលអនាគត។ បន្ថែមពីលើនេះ អ្នកប្រើប្រាស់ទូរសព្ទដៃស្មាតហ្វូន ប្រភេទ Android​ នៅតែអាចបន្តប្រើប្រាស់នូវកម្មវិធីស្នូលរបស់ Messenger​​ ដូចជា ការផ្ញើរូបភាព ​ឬក៏ Links ជាដើម លើកលែងតែ Video និង Voice​ Call។

គួរបញ្ជាក់ថា ក្រុមហ៊ុន Facebook ​ក៏មានគំរោងផ្ដល់ជូនផងដែរ កំណែរទម្រង់ Version ប្រើប្រាស់​​ទិន្នន័យ Internet តិចតួចនៅតាមបណ្ដាប្រទេសជាច្រើន ដោយផ្អែកលើគោលការណ៍ មិនយកកម្រៃ ដើម្បីភា្ជប់មនុស្ស ទៅនឹងប្រព័ន្ធ Internet ដែលពួកគេមិនមានការទំនាក់ទំនងគ្នាគួរឱ្យទុកចិត្តបាន៕