(ស្ទឹងត្រែង)៖ លោក សរ សុពុត្រា អភិបាលខេត្តស្ទឹងត្រែង នារសៀលថ្ងៃទី១៣ ខែកញ្ញា ឆ្នាំ២០២៤នេះ បានទទួលជួបប្រតិភូអង្គការអភិរក្សសៀមប៉ាង និងក្រុមហ៊ុនរ៉ាយហ្ស៊ីងហ្វ៉ីងហ្វីនិក ដឹកនាំដោយលោក ម៉េង ហៀង ប្រធានអង្គការអភិរក្សសៀមប៉ាង។ ជំនួបនេះដើម្បីសម្តែងការគួរសម និងរាយការណ៍ អំពីលទ្ធផលការងាររបស់អង្គការអភិរក្សសៀមប៉ាង នៅដែនជម្រកសត្វព្រៃសៀមប៉ាង និងប្រតិបត្តិការណ៍របស់ក្រុមហ៊ុនរ៉ាយហ្ស៊ីងហ្វ៉ីងហ្វីនិក។

លោក ម៉េង ហៀង ប្រធានអង្គការអភិរក្សសៀមប៉ាង និងក្រុមការងារបានបង្ហាញអំពីសកម្មភាពការងារ ក៏ដូចជាដៃគូប្រតិបត្តិដែលបាននិងកំពុងធ្វើសកម្មភាពអភិរក្ស នៅតំបន់ដែនជម្រកសត្វព្រៃសៀមប៉ាង ដើម្បីលើកកម្ពស់ប្រសិទ្ធភាពនៃកិច្ចគាំពារ បរិស្ថាន ការការពារ និងអភិរក្សធនធានធម្មជាតិ ប្រព័ន្ធអេកូឡូស៊ីជីវៈចម្រុះនិងសត្វព្រៃ ក្នុងគោលដៅរួមចំណែកអភិវឌ្ឍន៍សកម្មភាពទេសចរណ៍ធម្មជាតិ ផ្សាភ្ជាប់នឹងទឹកដី ដោយឈរលើគោលការណ៍សមធម៌ សម្រាប់ឧត្តមប្រយោជន៍ជាតិ និងប្រជាសហគមន៍ក្នុងមូលដ្ឋាន។

លោកបានគូសបញ្ជាក់ថា ការចូលជួបសម្តែងការគួរសមនេះ មានគោលបំណងសំខាន់ គឺដើម្បីរាយការណ៍អំពីលទ្ធផលការងារ ក៏ដូចជាស្នើសុំអនុសាសន៍បន្ថែម ក្នុងគោលបំណងបង្កើនប្រសិទ្ធភាព និងសមិទ្ធផល លើការងារអភិរក្សផ្សាភ្ជាប់នឹងការអភិវឌ្ឍទេសចរណ៍ធម្មជាតិ នៅតំបន់ដែនជម្រកសត្វព្រៃសៀមប៉ាង។

លោក សរ សុពុត្រា អភិបាលខេត្តស្ទឹងត្រែង បានស្វាគមន៍យ៉ាងកក់ក្តៅចំពោះប្រតិភូអង្គការអភិរក្សសៀមប៉ាង និងក្រុមហ៊ុនរ៉ាយហ្ស៊ីងហ្វ៉ីងហ្វីនិក ដែលបានអញ្ជើញចូលជូបសម្តែងការគួរសមនាពេលនេះ។ លោកបានថ្លែអំណរគុណចំពោះកិច្ចសហការល្អរវាងអាជ្ញាធរពាក់ព័ន្ធ និងអង្គការដៃគូរ ជាពិសេសអង្គការអភិរក្សសៀមប៉ាង និងក្រុមហ៊ុនរ៉ាយហ្ស៊ីងហ្វ៉ីងហ្វីនិក ក្នុងការចូលរួមអភិរក្សធនធានធម្មជាតិនៅក្នុងស្រុកសៀមប៉ាង ព្រមទាំងបានស្វែងរកដៃគូការចូលរួមសហការបង្កើតប្រាក់ចំណូលដល់ប្រជាពលរដ្ឋក្នុងតំបន់នេះ។

លោកបានសង្កត់ធ្ងន់ថា ការពិតខេត្តស្ទឹងត្រែងជាខេត្តមួយ ដែលមានសក្តានុពលធនធានធម្មជាតិច្រើន ប៉ុន្តែដោយសារការមិនចេះឆ្អែតឆ្អន់របស់បុគ្គលមានអំណាច និងមនុស្សចំនួនបានប្រែក្លាយទៅជាស្រអាប់។ យ៉ាងណាមិញ លោកមិនភ្លេចបញ្ជាក់ទេថា ការមកដល់របស់លោកជាថ្នាក់ដឹកនាំខេត្តនេះ គឺដើម្បីមកបោសសំអាត និងប្រែក្លាយឲ្យតំបន់នេះ(ខេត្តស្ទឹងត្រែង) ឲ្យទៅជាតំបន់មានសក្តានុពលឡើងវិញ។

លោកប្រាប់ដល់ប្រតិភូអង្គការអភិរក្សសៀមប៉ាង និងក្រុមហ៊ុនរ៉ាយហ្ស៊ីងហ្វ៉ីងហ្វីនិក ត្រូវធ្វើបែបណាអនុវត្តការងារឲ្យស្របទៅនឹងច្បាប់ ជាពិសេសត្រូវធ្វើការដោយមានកិច្ចសហការជាមួយអាជ្ញាធរពាក់ព័ន្ធ និងរៀបចំរបាយការណ៍ពាក់ព័ន្ធនានា ដាក់ចូលអាជ្ញាធរខេត្តដើម្បីឲ្យអាជ្ញាធរបានដឹងពីដំណើរបេសកកម្ម ផែនការសកម្មភាព ចក្ខុវិស័យ និងកិច្ចសហការល្អជាមួយគ្នា៕