(ពោធិ៍សាត់)៖ លោក កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ នាថ្ងៃទី១៣ ខែកញ្ញា ឆ្នាំ២០២៤នេះ បានផ្ញើសារលិខិតរំលែកទុក្ខ ជូនចំពោះលោកស្រី ជា ចិន្តា ព្រមទាំងក្រុមគ្រួសារ ចំពោះមរណភាព លោកវេជ្ជបណ្ឌិត ច័ន្ទ សុខា អតីតប្រធានមន្ទីរពេទ្យបង្អែកពោធិ៍សាត់ កាលពីវេលាម៉ោង ១២ និង០២នាទីរំលងអាធ្រាត ឆ្លងចូលថ្ងៃទី១១ ខែកញ្ញា ឆ្នាំ២០២៤ ក្នុងជន្មាយុ៦០ឆ្នាំ ដោយរោគាពាធ។
 ក្នុងសារលិខិតនោះ បានសរសេររៀបរាប់ថា «ខ្ញុំមានក្តីរន្ធត់ក្នុងចិត្តយ៉ាងក្រៃលែង និងសោកស្តាយជាទីបំផុត ដោយបានទទួលដំណឹងមរណភាព របស់លោកវេជ្ជបណ្ឌិត ច័ន្ទ សុខា អតីតប្រធានមន្ទីរពេទ្យបង្អែកពោធិ៍សាត់ ត្រូវជាស្វាមីរបស់លោកស្រី ជា ចិន្តា ដែលបានទទួលមរណភាព នៅថ្ងៃពុធ ៩កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែកញ្ញា ឆ្នាំ២០២៤ វេលាម៉ោង ១២ និង០២នាទី ក្នុងជន្មាយុ៦០ឆ្នាំ ដោយរោគាពាធ។

 ក្នុងវេលាដ៏ក្រៀមក្រំបំផុតនេះ តាងនាមក្រុមការងាររាជរដ្ឋាភិបាល ចុះមូលដ្ឋានខេត្តពោធិ៍សាត់ និងក្នុងនាមខ្ញុំផ្ទាល់ ព្រមទាំងភរិយា សូមសម្តែងនូវការសោកស្តាយស្រណោះយ៉ាងក្រៃលែង និងសូមចូលរួមរំលែកទុក្ខ ជាមួយលោកស្រី ព្រមទាំងក្រុមគ្រួសារ ប្រកបដោយសមានទុក្ខ និងក្តីអាឡោះអាល័យជាទីបំផុត។
 មរណភាពរបស់ លោកវេជ្ជបណ្ឌិត ច័ន្ទ សុខា គឺជាការបាត់បង់នូវឪពុក ក៏ដូចជាជីតា ដ៏ឧត្តុង្គឧត្តមប្រកបដោយ ព្រហ្មវិហារធម៌ជាម្លប់ត្រជាក់ សម្រាប់កូនចៅ ធ្លាប់ជ្រកកោនកន្លងមក។ ជាការរំលែកទុក្ខដ៏ក្រៀមក្រំនេះ យើងខ្ញុំសូម បួងសួងដល់វិញ្ញាណក្ខន្ធ លោកវេជ្ជបណ្ឌិត ច័ន្ទ សុខា បានទៅកាន់សុគតិភពកុំបីឃ្លៀងឃ្លាតឡើយ។
 សូមលោកស្រី ជា ចិន្តា ព្រមទាំងក្រុមគ្រួសារ ទទួលនូវមនោសញ្ចេតនា រំលែកទុក្ខដ៏ក្រៀមក្រំ និងសោកស្តាយបំផុតពីខ្ញុំ។

 គួរជម្រាបជូនថា បច្ចុប្បន្នសព លោកវេជ្ជបណ្ឌិត ច័ន្ទ សុខា អតីតប្រធានមន្ទីរពេទ្យបង្អែកពោធិ៍សាត់ ត្រូវបានតម្កល់ទុកធ្វើបុណ្យទក្ខិណានុប្បទានតាមប្រពៃណីជាតិ និងព្រះពុទ្ធសាសនា នៅគេហដ្ឋានសព ដែលស្ថិតក្នុងភូមិថ្នល់ជប៉ុន សង្កាត់រលាប ក្រុងពោធិ៍សាត់ (ទីតាំង៖ https://maps.app.goo.gl/ReTDefwQNE2St2kC7) ចាប់ពីថ្ងៃទី១១ ខែកញ្ញា ឆ្នាំ២០២៤តទៅ។ សពនឹងដង្ហែទៅបញ្ចុះនៅព្រឹកថ្ងៃសៅរ៏ ១២កើត ខែភទ្របទ ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី១៤ ខែកញ្ញា ឆ្នាំ២០២៤ នៅវត្តកណ្តាល ស្ថិតក្នុងឃុំសន្ទ្រែ ស្រុកភ្នំក្រវាញ ខេត្តពោធិ៍សាត់៕