(ភ្នំពេញ)៖ នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ និងបេឡាជាតិសន្ដិសុខសង្គម (ប.ស.ស) នៅព្រឹកថ្ងៃទី១៣ ខែកញ្ញា ឆ្នាំ២០២៤នេះ បានសហការគ្នាធ្វើសមយុទ្ធពន្លត់អគ្គិភ័យ និងការសង្គ្រោះបឋម នៅអគារទីស្នាក់ការកណ្ដាលរបស់បេឡាជាតិសន្ដិសុខសង្គម ដែលមានទីតាំងស្ថិតនៅសង្កាត់ឃ្មួញ ខណ្ឌសែនសុខ រាជធានីភ្នំពេញ។
សមយុទ្ធរួមគ្នារវាងស្ថាប័នជំនាញរបស់អគ្គស្នងការដ្ឋាននគរបាលជាតិ និងវិស័យឯកជននៅពេលនេះ ធ្វើឡើងក្រោមអធិបតីភាព លោក ម៉េង ហុង ប្រតិភូរាជរដ្ឋាភិបាលទទួលបន្ទុកជា អគ្គនាយកបេឡាជាតិសន្ដិសុខសង្គម (ប.ស.ស) និងលោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ។ នៅទីស្នាក់ការកណ្ដាលនេះ មានមន្ដ្រីរាជការ និងបុគ្គលិកបម្រើការងារប្រមាណ១,២០០នាក់។
ថ្លែងក្នុងឱកាសនោះ លោកឧត្តមសេនីយ៍ឯក នេត វន្ថា បានគូសបញ្ជាក់ថា ការធ្វើសមយុទ្ធពន្លត់អគ្គិភ័យ និងសង្គ្រោះបឋមនៅពេលនេះ ធ្វើឡើងដើម្បីឲ្យមន្ដ្រី និងបុគ្គលិកទាំងអស់ បានយល់ដឹងអំពីវិធីប្រើប្រាស់ឧបករណ៍ សម្ភារៈ បរិក្ខាប្រព័ន្ធបង្ការ និងពន្លត់អគ្គិភ័យ ដើម្បីទប់ស្កាត់បានទាន់ពេលវេលានៅពេលមានហេតុការណ៍កើតឡើង កុំឲ្យរីករាលដាលទ្រង់ទ្រាយធំ។
ប្រធាននាយកដ្ឋានរូបនេះ បានបន្ថែមទៀតថា ក្នុងការធ្វើសមយុទ្ធនេះបុគ្គលិកទាំងអស់ ក៏បានយល់ដឹងផងដែរអំពីមធ្យោបាយក្នុងការផ្ដល់ព័ត៌មានទៅកាន់ស្ថាប័នមានសមត្ថកិច្ច ដើម្បីចេញជួយអន្ដរាគមន៍ និងរបៀបក្នុងការជម្លៀសខ្លួនចេញពីតំបន់ដែលមានហានិភ័យទៅកាន់កន្លែងដែលមានសុវត្ថិភាព។
បើតាមលោកឧត្តមសេនីយ៍ឯក នេត វន្ថា, រហូតមកដល់ពេលនេះ បណ្ដាស្ថាប័នរដ្ឋ វិស័យឯកជនជាច្រើនបានយកចិត្តទុកដាក់ និងសហការជាមួយសមត្ថកិច្ចជំនាញអគ្គិភ័យ ក្នុងការត្រួតពិនិត្យលក្ខណៈបច្ចេកទេស និងបង្ការអគ្គិភ័យ និងការធ្វើសមយុទ្ធពន្លត់អគ្គិភ័យ និងសង្គ្រោះ។ លោកវាយតម្លៃខ្ពស់ ចំពោះការផ្ដល់កិច្ចសហការរបស់បេឡាជាតិសន្ដិសុខសង្គម ដែលយកចិត្តទុកដាក់សហការជាមួយស្ថាប័នជំនាញបង្ការ និងពន្លត់អគ្គិភ័យនៅពេលនេះ។
ជាមួយគ្នានេះ លោក ម៉េង ហុង ប្រតិភូរាជរដ្ឋាភិបាលទទួលបន្ទុកជា អគ្គនាយកបេឡាជាតិសន្ដិសុខសង្គម បានថ្លែងអំណរគុណដល់អគ្គស្នងការដ្ឋាននគរបាលជាតិ ពិសេសនាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ ដែលបានសហការក្នុងការធ្វើសមយុទ្ធពន្លត់អគ្គិភ័យ និងសង្គ្រោះនៅពេលនេះ។ លោកបានចាត់ទុកថា នេះជាកាយវិការដ៏ប្រពៃក្នុងការជួយបណ្ដុះបណ្ដាលដល់មន្ដ្រី និងបុគ្គលិកទាំងអស់របស់ ប.ស.ស ដើម្បីបន្ថែមចំណេះដឹងលើការងារបង្ការ និងសង្គ្រោះនៅពេលមានអគ្គិភ័យកើតឡើង។
អគ្គនាយក ប.ស.ស រូបនេះបានអះអាងថា កន្លងទៅ ប.ស.ស ក៏ធ្លាប់បានអញ្ជើញគ្រូឧទ្ទេសដើម្បីមកជួយបណ្ដុះបណ្ដាលបំប៉នជំនាញអគ្គិភ័យកាតព្វកិច្ចដល់មន្ដ្រី និងបុគ្គលរបស់បេឡាជាតិសន្ដិសុខសង្គមផងដែរ។ លោកគូសបញ្ជាក់ថា អគារទីស្នាក់ការកណ្ដាលរបស់បេឡាជាតិសន្ដិសុខសង្គមនេះ មានកម្ពស់២១ជាន់ និងមានបុគ្គលិកបម្រើការងារប្រចាំថ្ងៃចំនួន១,២០០នាក់ ព្រមទាំងភ្ញៀវចេញចូលក្នុងមួយថ្ងៃៗចន្លោះពី៦០០ ទៅ៧០០នាក់។
លោក ម៉េង ហុង បានបន្ថែមទៀតថា ដោយមើលឃើញពីការងារបង្ការ និងសង្គ្រោះអគ្គិភ័យជារឿងចាំបាច់នោះ អគារបេឡាជាតិសន្ដិសុខសង្គម បានបំពាក់នូវគ្រឿងឧបករណ៍សង្គ្រោះ ប្រព័ន្ធខ្យល់ ប្រព័ន្ធពន្លត់អគ្គិភ័យ និងជម្លៀសនៅពេលមានអាសន្ន (ទ្វារសុវត្ថិភាព) បានយ៉ាងល្អត្រឹមត្រូវ ក៏ដូចជាផ្ដល់នូវទំនុកចិត្តខ្ពស់ដល់មន្ដ្រី បុគ្គលិក និងភ្ញៀវដែលមកទទួលសេវានៅទីតាំងស្នាក់ការកណ្ដាលនេះ៕
