(កំពង់ស្ពឺ)៖ លោកឧត្តមសេនីយ៍ត្រី ជុ សារុន មេបញ្ជាការកងរាជអាវុធហត្ថខេត្ត នៅរសៀលថ្ងៃទី២៩ ខែកញ្ញា ឆ្នាំ២០១៦ បានកោះប្រធានមន្ទីរទាំង៥ដែលពាក់ព័ន្ធមាន មន្ទីរជំនាញ ការិយាល័យ មេបញ្ជាការ ក្រុង ស្រុក ស្នាក់ការសន្តិសុខ ប្រជុំផ្សព្វផ្សាយជាបន្ទាន់ កិច្ចការការពារធនធានធម្មជាតិ និងការអភិរក្ស។
រាជរដ្ឋាភិបាលកម្ពុជា ដែលដឹកនាំដោយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រគល់ភារកិច្ចជូនក្រសួង៦ស្ថាប័ន ដែលក្នុងនោះរាជរដ្ឋាភិបាល បានចាត់តាំងចំពោះកងយោធពលខេមរភូមិន្ទ ត្រូវផ្សព្វផ្សាយនៅគោលការណ៏មួយចំនួន ដូចជាទី១-ហាមយករថយន្តអង្គភាព (ស្លាកលេខរដ្ឋ) មកធ្វើអាជីវកម្មខុសច្បាប់ ទី២-ត្រូវចូលសហការបង្រ្កាបគ្រប់បទល្មើសព្រៃឈើ ទី៣-ជាពិសេសការចូលរួមដាំដើមឈើ ឡើងតាមតំបន់គ្រប់គ្រងរបស់អង្គភាពនិមួយៗ។
លោកឧត្តមសេនីយត្រី ជូ សារុន មេបញ្ជាការកងរាជអាវុធហត្ថខេត្ត បានលើកឡើងថា ដោយសារតែបទល្មើសនៅតែបន្តកើតមានគ្រាដែល នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ជាប្រធានក្រុមការងារបង្ក្រាបបទល្មើសព្រៃឈើ ហើយចំណាត់ការ ត្រូវបានបង្រ្កាបករណីបទល្មើសព្រៃឈើទ្រង់ទ្រាយធំៗ បានថយចុះគួរឲ្យកត់សម្គាល់ តែដោយឡែកបទល្មើសតូចៗ មួយចំនួនបន្តកើតមានមិនថយចុះឡើយ។
មេបញ្ជាការ បានបន្តថា «ដោយសារតែព្រៃឈើមានសត្រូវច្រើន យើងជាកងកម្លាំងដាច់ខាតបន្តការសហការជាមួយជំនាញ ស្ថាប័នរដ្ឋ សង្គមស៊ីវិល ដែលមានគោលដៅដូចគ្នា គឺការពារ និងអភិរក្សធនធានធម្មជាតិ ហើយជាពិសេសកម្លាំងតាមមូលដ្ឋានត្រូវចូលរួមអប់រំ ផ្សព្វផ្សាយ ចំពោះបងប្អូនប្រជាពលរដ្ឋ ឲ្យពួកគាត់កាត់បន្ថយការប្រើប្រាស់អុស ធ្យូង មកប្រើហ្គាស(Gas) អប់រំកុំឲ្យបន្តមុខរបរពីរកស៊ីឈើ (កាប់ឈើ)ឲ្យរកស៊ីមុខរបរផ្សេង»៕
