(ហាណូយ)៖ បន្ទាប់ពីប្រធានាធិបតីហ្វីលីពីន លោក Rodrigo Duterte បានប្រកាសពីគោលបំណងបិទ បញ្ចប់ការធ្វើសមយុទ្ធយោធារួមគ្នាជាមួយនឹងសហរដ្ឋអាមេរិក នៅថ្ងៃព្រហស្បតិ៍នេះ រដ្ឋមន្ត្រីការបរទេស របស់ លោកគឺលោក Perfecto Yasay បានអះអាងថាការធ្វើសមយុទ្ធធារួមគ្នានៅឆ្នាំ២០១៧ នឹងប្រព្រឹត្តទៅដូចការគ្រោងទុក ខណៈសមយុទ្ធយោធាសម្រាប់ឆ្នាំ២០១៨ អាចនឹងត្រូវបានពិនិត្យជាថ្មី ឡើងវិញ។ នេះបើយោងតាមការចុះផ្សាយដោយសារព័ត៌មាន Channel News Asia នៅរសៀលថ្ងៃព្រហស្បតិ៍ ទី២៩ ខែកញ្ញា ឆ្នាំ២០១៦។

ថ្លែងក្នុងឱកាសបំពេញដំណើរទស្សនកិច្ច មកកាន់ប្រទេសវៀតណាម លោក Duterte​ បានប្រកាសថា សមយុទ្ធយោធារវាងទីក្រុងម៉ានីល និង ទីក្រុងវ៉ាស៊ីនតោន​ ដែលគ្រោងនឹងធ្វើឡើងចាប់ពី ថ្ងៃទី០៤ ដល់ថ្ងៃទី១២ ខែតុលា ខាងមុខនេះ នឹងក្លាយជាសមយុទ្ធយោធាលើកចុងក្រោយរវាងប្រទេសទំាងពីរ។ តែយ៉ាងណាក៏ដោយ លោក Perfecto Yasay បានគូសបញ្ជាក់នៅថ្ងៃព្រហស្បតិ៍នេះថា សមយុទ្ធយោធាសម្រាប់ឆ្នាំ២០១៧ ត្រូវបានអនុម័តរួចមកហើយ ដោយរដ្ឋាភិបាលកាលពីអណត្តិមុន រីឯសមយុទ្ធយោធានៅឆ្នាំបន្តបន្ទាប់ទៀត នឹងត្រូវពិនិត្យឡើងវិញ។

គួរបញ្ជាក់ថា សេចក្ដីថ្លែងការណ៍របស់ក្រសួងការបរទេសហ្វីលីពីន ធ្វើឡើងនៅចំបរិបទនៃភាពតានតឹង នៅក្នុងតំបន់សមុទ្រចិនខាងត្បូង និង ក្រោយពេលដែលលោក Duterte អះអាងថា លោកនឹងបង្កើតសម្ព័ន្ធភាពថ្មីមួយ ជាមួយចិន និងរុស្ស៊ី។ វាមិនមែនជាលើកទីមួយទេ​ ដែលរដ្ឋមន្ត្រី ការបរទេសហ្វីលីពីន ចេញមុខបកស្រាយក្រោយលោក Duterte ថ្លែងរឿងរសើប ដូចជាកាលពី ការជេរលោក បារ៉ាក់ អូបាម៉ា និង លោក បាន គីមូន ព្រមទាំងសហភាពអឺរ៉ុបនោះ ក៏ប្រមុខការទូត ហ្វីលីពីន បានចេញមុខបកស្រាយសម្រួលស្ថានការណ៍ផងដែរ៕