(ត្បូងឃ្មុំ)៖ នៅក្នុងពិធីសំណេះសំណាលនៅព្រឹកថ្ងៃទី២៩ ខែកញ្ញា ឆ្នាំ២០១៦នេះ សម្តេចកិត្តិព្រឹទ្ធបណ្ឌិត ក៏បានធ្វើការអំពាវនាវដល់បងប្អូនប្រជាពលរដ្ឋ ប្រមាណ១២០០គ្រួសារ មកពី ភូមិចំនួន ២៤ នៃឃុំពពេល និងឃុំកោងកាង នៃស្រុកពញាក្រែក ខេត្តត្បូងឃ្មុំថា ត្រូវប្រុងប្រយ័ត្នខ្ពស់ចំពោះគ្រោះថ្នាក់ចរាចរណ៍ ជំងឺអេដស៍ ពិសេសគ្រោះថា្នក់ចរាចរណ៍ គឺសម្លាប់មនុស្សក្នុងមួយពព្រិចភ្នែកតែប៉ុណ្ណោះ ។
សម្ដេចកិត្ដិព្រឹទ្ធបណ្ឌិត ថ្លែងបន្ដថា «សូមបងប្អូនប្រជាពលរដ្ឋសូមគោរពច្បាប់ចរាចរណ៍ ហើយត្រូវប្រុងប្រយ័ត្នខ្ពស់គ្រប់ពេលវេលាដែលបើកបរ ព្រោះវាមិនប៉ះពាល់តែអ្នកបើកបរម្នាក់ប៉ុណ្ណោះទេ គឺនឹងប៉ះពាល់ដល់ដទៃផ្សេងទៀតផងដែរ ហើយសម្រាប់ជំងឺអេដស៍ក៏ដូច្នេះដែរ សូមបងប្អូនដែលឆ្លងជំងឺអេដស៍សូមកុំដើរចម្លងទៅអ្នកដទៃផ្សេងទៀត។ ជាងនេះទៅទៀតសុំអំពាវនាវ ដល់បងប្អូនយើងទាំងអស់ ត្រូវរក្សាសុខភាពឲ្យបាល្អ ត្រូវមានអនាម័យល្អជានិច្ច ហើយត្រូវពិសារទឹកដាំពុះ, ហើយក្មួយប្រុសស្រី សូមកុំសេពគ្រឿងញៀន»។
គួរបញ្ជាក់ថា ប្រជាពលរដ្ឋទាំង១២០០គ្រួសារ អញ្ជើញមកពី ភូមិចំនួន ២៤ នៃឃុំពពេល និងឃុំកោងកាង នៃស្រុកពញាក្រែក ខេត្តត្បូងឃ្មុំ ហើយគ្រួសារនីមួយៗទទួលបាន ៖ អង្ករ ៣០គក្រ មី១កេស ត្រីខ១០កំប៉ុង មុង១ ភួយ១ សារុង១ ក្រមា១ ទឹកសុទ្ធ ៤ដប នំបុ័ង១ដើម និងថវិកា ២មុឺនរៀល។ ដោយឡែក ក្រណាត់ស ១ដុំ និងថវិកា ១មុឺនរៀលទៀត ជាអំណោយរបស់ សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត។
សូមជម្រាបថា កាកបាទក្រហមកម្ពុជា ដែលមានសម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ គង់ប្រថាប់ជាព្រះប្រធានកិត្តិយសកាកបាទក្រហមកម្ពុជា និងមានសម្ដេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជានិច្ចកាលតែងតែយកព្រះទ័យ និងយកចិត្តទុកដាក់ចំពោះសុខទុក្ខប្រជាពលរដ្ឋជួបការលំបាក ជនរងគ្រោះ និងជនងាយរងគ្រោះ គ្រប់ប្រភេទ ដោយមិនរើសអើង និងប្រកាន់វណ្ណៈ ពូជសាសន៍ ពណ៌សម្បុរ ឬនិន្នាការនយោបាយឡើយ៕
