(ភ្នំពេញ)៖ កម្លាំងនគរបាលខណ្ឌដូនពេញ និងកម្លាំងនគរបាលប៉ុស្តិ៍ទាំង៣ ប៉ុស្តិចតុមុខ ប៉ុស្តិ៍ផ្សារចាស់ និងប៉ុស្តិ៍វត្តភ្នំ បានសហការជាមួយកម្លាំងនគរបាលព្រហ្មទណ្ឌកម្រិតស្រាល និងកម្លាំងនគរបាលអន្តរាគមន៍ នៅរសៀលថ្ងៃទី២៨ ខែកញ្ញា ឆ្នាំ២០១៦នេះ បានដេញបង្ក្រាបក្រុមសិស្សសាលាអនុវិទ្យាល័យចតុមុខ២នាក់ ក្រោយឆក់ស្បោងលុយពីស្រ្តីជនជាតិបារាំង ចំនួន៥ពាន់ដុល្លារនៅចំណុចផ្លូវលេខ១៩ កែងមហាវិថីព្រះសុរាម្រិត ភូមិ៣ សង្កាត់ចតុមុខ  ខណ្ឌដូនពេញ។

អធិការនគរបាលខណ្ឌដូនពេញ លោក ហួត ចាន់យ៉ារ៉ាន់ បានបញ្ជាក់ថា ជនសង្ស័យទាំង២នាក់ដែលត្រូវកម្លាំងនគរបាលបង្ក្រាបបានរួមមាន:
១.ឈ្មោះ វ៉ា សុខរ៉ុង ភេទប្រុស អាយុ១៨ឆ្នាំ មុខរបរសិស្សថ្នាក់ទី៨C1 នៃ អនុវិទ្យាល័យចតុមុខ ស្នាក់នៅម្តុំវត្តបទុមវតី ផ្លូវលេខ១៩ សង្កាត់ចតុមុខ ខណ្ឌដូនពេញ។
២.ឈ្មោះ ស៊ុនហេង ភេទប្រុស អាយុ១៨ឆ្នាំ មុខរបរសិស្សថ្នាក់ទី៨A1 នៃ អនុវិទ្យាល័យចតុមុខ ស្នាក់នៅសង្កាត់ជ្រោយជង្វារ ខណ្ឌជ្រោយជង្វារ។

លោក ហួត ចាន់យ៉ារ៉ាន់ បានបន្តទៀតថា ក្រោយចាប់ខ្លួនជនសង្ស័យទាំង២នាក់រួចមក កម្លាំងនគរបាលបានដកហូត
១- ម៉ូតូមួយគ្រឿងម៉ាកឌ្រីម សេ១២៥ ស៊េរី២០១៦ ពណ៌ទឹកប៊ិច ពាក់ស្លាកលេខ ភ្នំពេញ 1FY-0685 (របស់ជនសង្ស័យជិះធ្វើសកម្មភាព) ។
២- ប្រាក់ដុល្លាចំនួន៥០០០ដុល្លារអាមេរិក (របស់ជនរងគ្រោះ ប្រគល់ជូនជនរងគ្រោះវិញ) ដោយឡែកជនរងគ្រោះឈ្មោះ PHUOENG MONIQUE ភេទស្រី អាយុ៥៨ឆ្នាំ ជនជាតិ បារាំង ស្នាក់នៅផ្ទះលេខ ២៣៥បេ ផ្លូវ១៩ ភូមិ៣ សង្កាត់ចតុមុខ ខណ្ឌដូនពេញ។

លោក ហួត ចាន់យ៉ារ៉ាន់ បានបញ្ជាក់ទៀតថា ក្រោយមានការណែនាំផ្ទាល់ និងជាប្រចាំរបស់នាយឧត្តមសេនីយ៍ស្នងការ ជួន សុវណ្ណ លើការពង្រឹងបញ្ហាសន្តិសុខ និងការពារបញ្ហាសណ្តាប់ធ្នាប់នោះ លោកបានដាក់ផែនការដល់កងកម្លាំងទាំងអស់ចុះល្បាតតាមមូលដ្ឋានទាំងយប់ទាំងថ្ងៃ ដើម្បីចេញជួយអន្តរាគមន៍ទាន់ពេលវេលា ជាក់ស្តែងករណីខាងលើនេះ ក្រោយជនសង្ស័យទាំង២នាក់ ឆក់កាបូបរបស់ជនរងគ្រោះភ្លាម គឺកម្លាំងនគរបាលបានដេញបង្ក្រាបបានភ្លាមៗតែម្តង។

នៅចំពោះមុខសមត្ថកិច្ចជនសង្ស័យទាំង២នាក់ បានសារភាពថា ពួកគេធ្លាប់បានធ្វើសកម្មភាពចំនួន១៩លើក តែលើកនេះមកអស់លក្ខ៍ណ នៅទឹកដីខណ្ឌដូនពេញតែម្តង។

បច្ចុប្បន្នជនសង្ស័យកំពុង ឃាត់ខ្លួននៅអធិការដ្ឋាននគរបាល ខណ្ឌដូនពេញដើម្បីកសាងសំណុំរឿង តាមនិតិវិធីច្បាប់៕