(កំពង់ធំ)៖ រដ្ឋមន្រ្តីក្រសួងទេសចរណ៍ លោក ថោង ខុន ប្រធានក្រុមការងារថ្នាក់ជាតិ ចុះមូលដ្ឋានខេត្តកំពង់ធំ និងជាប្រធានក្រុម ការងារថ្នាក់កណ្តាល ចុះជួយស្រុកបារាយណ៍ ក្នុងឱកាសពិធីបុណ្យកាន់បិណ្ឌវេនទី១២ នៅថ្ងៃទី២៨ ខែកញ្ញា ឆ្នាំ២០១៦នេះ បានបន្តអំពាវនាវប្រាប់ឱ្យប្រជាពលរដ្ឋទាំងអស់ ត្រូវចូលរួមធ្វើអត្តសញ្ញាណប័ណ្ណសញ្ជាតិខ្មែរគំរូថ្មី និងទៅចុះឈ្មោះបោះឆ្នោត ឱ្យបានគ្រប់ៗគ្នា។
ការទទូចអំពាវនាវនេះ ត្រូវបានធ្វើឡើង ក្នុងឱកាសដឹកនាំប្រតិភូក្រសួងទេសចចរណ៍ និងក្រុមការងារចុះជួយស្រុក ឃុំ និងភូមិរួមទាំង ក្រុមគ្រួសារ ចូលរួមក្នុងពិធីបុណ្យកាន់បិណ្ឌវេនទី១២ នៅវត្តគោកត្របែក ស្ថិតនៅភូមិគោកត្របែក ឃុំស្រឡៅ ស្រុកបារាយណ៍ ខេត្តកំពង់ធំ។
ក្នុងឱកាសនោះលោក ថោង ខុន បានជួបសំណេះសំណាលជាមួយប្រជាពលរដ្ឋ នៅភូមិគោកត្របែក ដោយបានលើកឡើងពីការ រីកចម្រើន ទាំងផ្នែកអាណាចក្រ និងពុទ្ធចក្រនៅភូមិនេះ ពិសេសដោយមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត បានកសាងនូវសមិទ្ធផលដ៏ធំធេង មានដូចជាព្រះវិហារថ្មី សាលារៀន មណ្ឌលសុខភាព អាងទឹក ប្រឡាយទឹក ស្រះទឹក អណ្តូងទឹកស្អាត និងការឆ្វៀលដីតំបន់៣ ចែកជូនប្រជាពលរដ្ឋ ដើម្បីអាស្រ័យផល។
លោកថោង ខុន បានផ្តាំផ្ញើឱ្យប្រជាពលរដ្ឋទាំងអស់ ជួយថែរក្សាសមិទ្ធផលទាំងនោះឱ្យបានយូរអង្វែង និងអំពាវនាវឱ្យពួកគាត់ ទៅធ្វើអត្តសញ្ញាណប័ណ្ណសញ្ជាតិខ្មែរគំរូថ្មី និងចុះឈ្មោះបោះឆ្នោត ឱ្យបានគ្រប់ៗគ្នា ពិសេសបោះឆ្នោតឱ្យគណបក្សប្រជាជនកម្ពុជា ដើម្បីបានសម្តេចតេជោ ហ៊ុន សែន ជានាយករដ្ឋមន្ត្រីនៃកម្ពុជា នៅអាណត្តិក្រោយៗទៀត។
លោករដ្ឋមន្រ្តី ថោង ខុន និងប្រតិភូអមដំណើរ ក៏បានវេរចង្ហាន់ គ្រឿងឧបភោគ-បរិភោគ ភេសជ្ជៈ និងបច្ច័យមួយចំនួនប្រគេនថ្វាយ ព្រះសង្ឃដែលគង់ចាំព្រះវស្សា នៅវត្តគោកត្របែកនោះផងដែរ។ ការប្រគេនចង្ហាន់ថ្វាយព្រះសង្ឃ ក្នុងឱកាសនោះធ្វើឡើងដើម្បីឧទ្ទិស បុណ្យកុសល ជូនទៅជីដូនជីតា បងប្អូន និងញ្ញាតិទាំង៧សណ្តាន ដែលបានទទួលមរណភាព ទៅកាន់សុគតិភពនោះដែរ៕
