(ភ្នំពេញ)៖ ចក្រភពអង់គ្លេសបានចាប់ផ្តើមបើកឱកាសអាហារូបករណ៍ «Chevening ASEAN» ដើម្បីពង្រឹងអ្នកដឹកនាំនាពេលអនាគត ហើយការពង្រីកគម្រោងអាហារូបករណ៍នេះ គឺមានគោលបំណងបណ្តុះបណ្តាលអនាគតអ្នកដឹកនាំ មកពីប្រទេសសមាជិកអាស៊ាន និងទីម័រខាងកើត។

ក្នុងឆ្នាំនេះ មានការចាប់ផ្តើមកម្មវិធីអាហារូបករណ៍ Chevening ASEAN របស់ចក្រភពអង់គ្លេស ដោយបន្ថែមពីលើកម្មវិធីអាហារូបករណ៍ Chevening និងបានផ្តល់នូវឱកាសដែលទទួលបានមូលនិធិយ៉ាងពេញលេញ សម្រាប់ជ័យលាភីអាហារូបករណ៍ ដើម្បីបន្តការសិក្សាថ្នាក់អនុបណ្ឌិតនៅសាកលវិទ្យាល័យកំពូលមួយរបស់ចក្រភពអង់គ្លេស ក៏ដូចជាឱកាសបន្ថែមតាមតម្រូវការផងដែរ។ បេក្ខជនទាំងអស់មកពីក្នុងតំបន់នឹងត្រូវបានពិចារណាដោយស្វ័យប្រវត្តិ សម្រាប់អាហារូបករណ៍អាស៊ាន លុះត្រាតែពួកគេជ្រើសរើសមិនចូលរួម។ ឱកាសអាហារូបករណ៍ថ្មីនេះបញ្ជាក់ពីការប្តេជ្ញាចិត្តរបស់ចក្រភពអង់គ្លេស ក្នុងការជំរុញការផ្លាស់ប្តូរផ្នែកអប់រំ និងការពង្រឹងទំនាក់ទំនងជាមួយបណ្តាប្រទេសសមាជិកអាស៊ាន។

លោកស្រី Sarah Tiffin ឯកអគ្គរាជទូតចក្រភពអង់គ្លេសប្រចាំនៅអាស៊ាន មានប្រសាសន៍ថា៖ «ខ្ញុំមានសេចក្តីសោមនស្សរីករាយ ដែលចក្រភពអង់គ្លេសចាប់ផ្តើមផ្តល់អាហារូបករណ៍ Chevening ASEAN ថ្មីនេះ។ គំនិតផ្តួចផ្តើមនេះមិនត្រឹមតែផ្តល់ឱកាសពិសេសសម្រាប់បុគ្គលដែលមានទេពកោសល្យក្នុងការបន្តការសិក្សាថ្នាក់ឧត្តមសិក្សានៅចក្រភពអង់គ្លេសប៉ុណ្ណោះទេ ប៉ុន្តែថែមទាំងផ្តល់ឱ្យជ័យលាភីអាហារូបករណ៍ ASEAN Chevening ជាមួយនឹងកម្មវិធីបន្ថែមតាមតម្រូវការ ការអញ្ជើញជាអាទិភាពចំពោះព្រឹត្តិការណ៍សំខាន់ៗ និងការចូលរួមជាមួយបណ្តាញអតីតនិស្សិតអាហារូបករណ៍ ASEAN Chevening ថ្មី។ វាគឺជាឯកសិទ្ធិក្នុងការពង្រឹងជ័យលាភីអាហារូបករណ៍អាស៊ានទាំងនេះ តាមរយៈឱកាសអប់រំដ៏អស្ចារ្យនេះ និងបទពិសោធន៍ដែលមិនអាចកាត់ថ្លៃបាន»។

ជាមួយគ្នានេះ លោកបណ្ឌិត កៅ គឹមហួន អគ្គលេខាធិការអាស៊ាន បានមានប្រសាសន៍ថា៖ «ខ្ញុំជឿជាក់ថានេះគឺជាព្រឹត្តិការណ៍ដ៏គួរឱ្យកត់សម្គាល់មួយ នៅក្នុងការប្តេជ្ញាចិត្តរួមរបស់យើង ក្នុងការបណ្តុះបណ្តាលអ្នកដឹកនាំនាពេលអនាគតក្នុងតំបន់។ អាហារូបករណ៍នេះមិនមែនគ្រាន់តែជាឱកាសសិក្សាទេ វាគឺជាកាតាលីករដ៏មានឥទ្ធិពលសម្រាប់សមាហរណកម្មក្នុងតំបន់ និងកិច្ចខិតខំប្រឹងប្រែងកសាងសហគមន៍អាស៊ាន។ នៅពេលដែលយើងប្រឈមមុខនឹងពិភពលោកដែលមានទំនាក់ទំនងគ្នាកាន់តែខ្លាំងឡើង កម្មវិធីនេះមានតួនាទីជាស្ពានដ៏សំខាន់មួយ ដែលអាចឱ្យជ័យលាភីអាហារូបករណ៍របស់យើងផ្លាស់ប្តូរគំនិត បង្កើតបណ្តាញ ជំរុញការយល់ដឹងពីវប្បធម៌ និងបណ្តុះដំណោះស្រាយយ៉ាងច្នៃប្រឌិតចំពោះបញ្ហាប្រឈម និងតម្រូវការនៃពេលវេលារបស់យើង»។

បន្ថែមពីលើការផ្តល់ជូននៃអាហារូបករណ៍ Chevening ជ័យលាភីអាហារូបករណ៍ Chevening អាស៊ាន នឹងទទួលបានអត្ថប្រយោជន៍ពីកម្មវិធីអាស៊ានផ្តាច់មុខដែលរួមមាន៖

*កម្មវិធីស្វាគមន៍នៅ Foreign, Commonwealth and Development Office (FCDO)

*ការអញ្ជើញជាអាទិភាពទៅចូលរួមក្នុងបណ្តាញគោលនយោបាយអាស៊ីអាគ្នេយ៍ និងកម្មវិធីអាស៊ានដែលរៀបចំដោយ FCDO

*ការចូលរួមជាមួយ FCDO សភា និងជាមួយអ្នកដឹកនាំវិស័យឯកជន និស្សិត និងស្ថាប័នស្រាវជ្រាវ និងសន្និសីទ Chevening អាស៊ាន ក្រោយបញ្ចប់ការសិក្សា។

អាហារូបករណ៍នេះ គឺជាគំនិតផ្តួចផ្តើមថ្មីមួយក្នុងចំណោមគំនិតផ្តួចផ្តើមថ្មីជាច្រើន ដោយបេសកកម្មចក្រភពអង់គ្លេសទៅកាន់អាស៊ាន ដែលបង្ហាញពីការចូលរួមកាន់តែស៊ីជម្រៅរវាងចក្រភពអង់គ្លេស និងអាស៊ីអាគ្នេយ៍។ នៅពេលបញ្ចប់ការសិក្សា ជ័យលាភីអាហារូបករណ៍នឹងចូលរួមជាមួយបណ្តាញអតីតនិស្សិត Chevening អាស៊ាន ដែលនឹងក្លាយជាក្រុមប្រឹក្សាភិបាលសម្រាប់ការចូលរួមជាបន្តបន្ទាប់របស់យើងជាមួយអាស៊ាន និងវាគ្មិន/អ្នកចូលរួមដែលមានសក្តានុពលនៅក្នុងសិក្ខាសាលា និងព្រឹត្តិការណ៍ UK-ASEAN នៅក្នុងផ្នែកជំនាញរបស់ពួកគេ។ ក្នុងនាមជាអតីតនិស្សិត Chevening ពួកគេក៏នឹងក្លាយជាផ្នែកមួយនៃសហគមន៍អតីតនិស្សិត Chevening សកលរបស់យើង ហើយមានសិទ្ធិស្នើសុំមូលនិធិពីមូលនិធិកម្មវិធីអតីតនិស្សិត Chevening ដើម្បីរៀបចំគម្រោង និងព្រឹត្តិការណ៍ក្នុងតំបន់ផ្ទាល់ខ្លួនរបស់ពួកគេ៕

សម្រាប់ព័ត៌មានបន្ថែម សូមចូលទៅកាន់៖

*Chevening Resource Hub: (https://www.chevening.org/resource-hub/)
*Contact us: (https://www.chevening.org/about/contact-us/)
*Email: [email protected]