(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា ផ្ញើសារលិខិតសម្ដែងនូវការអបអរសាទរ និងជូនពរ សម្តេច មហាមន្ត្រី គុយ សុផល ក្នុងឱកាសដែលត្រូវបាន ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា សព្វព្រះរាជហឬទ័យប្រោសព្រះរាជទានគោរមងា សម្ដេច មហាមន្រ្តី គុយ សុផល តាមរយៈព្រះរាជក្រឹត្យ ចុះថ្ងៃទី២ ខែកញ្ញា ឆ្នាំ២០២៤។
ព្រះរាជទានត្រាស់បង្គាប់តែងតាំងមុខតំណែងជា ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង ជាសក្ខីភាពឆ្លុះបង្ហាញ អំពីកិច្ចខិតខំយកអស់កម្លាំងកាយកម្លាំងពលានុពល បំពេញភារកិច្ចយ៉ាងសកម្មទាំងយប់ ទាំងថ្ងៃ នៅគ្រប់ទីកន្លែងយ៉ាងខ្ជាប់ខ្ជួនបានយ៉ាងល្អប្រពៃប្រកបដោយមនសិការ និងដោយស្មារតីយកចិត្តទុកដាក់ខ្ពស់បំផុត តាំងពីក្នុងរជ្ជកាលព្រះករុណា ព្រះមហាវរក្សត្រ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងរហូតដល់បច្ចុប្បន្នកាល នៃការគ្រងរាជរបស់ ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពស់ខ្ពស់បំផុត។
ក្នុងឱកាសដ៏ប្រសើរថ្លៃថ្លានេះ សូមបួងសួងដល់វត្ថុស័ក្តិសិទ្ធិទាំងអស់ក្នុងលោក ទេវតាថែរក្សាព្រះរាជាណាចក្រកម្ពុជា សូមជួយអភិបាលគ្រងរក្សា ប្រោះព្រំប្រសិទ្ធពរ បវរមហាប្រសើរជូនសម្ដេច មហាមន្រ្តី និងលោកជំទាវ សូមបានប្រកបដោយព្រះពុទ្ធពរ និងពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
